រាជធានីភ្នំពេញ ៖ ខណៈប្រព័ន្ធអនុគ្រោះពន្ធដែលសហភាពអឺរ៉ុបផ្ដល់ជូនកម្ពុជា កំពុងតែប្រឈមនឹងបាត់បង់ មតិមួយចំនួនលើកឡើងថាអាចនឹងបង្កផលប៉ះពាល់ដល់សេដ្ឋកិច្ចកម្ពុជា ហើយមួយចំនួនទៀតបានបង្ហាញ ពីសុទិដ្ឋិនិយមទៅវិញដោយបានលើកឡើងថា វាគ្មានជះឥទ្ធិពលឬផលអាក្រក់ណាស់ណាដល់សេដ្ឋកិច្ចកម្ពុជានោះទេ ប៉ុន្តែក៏បានទទួលស្គាល់ថាវានឹងមានផលប៉ះពាល់ជៀសមិនរួចគ្រាន់តែតិចឬច្រើនតែប៉ុណ្ណោះ ។
តែសម្រាប់អ្នកជួញដូរខាងវិស័យធនាគារនៅកម្ពុជាវិញក៏ហាក់បង្ហាញពីសុទិដ្ឋិ
និយមចំពោះវិស័យធនាគារទាំងមូលផងដែរ បើសិនជាសហភាពអឺរ៉ុបដកប្រព័ន្ធអនុគ្រោះពន្ធគ្រប់យ៉ាងលើកលែងតែអាវុធ ដែលហៅកាត់ថា EBA នេះក៏ដោយ ។
លោកបណ្ឌិត អ៊ិន ចាន់នីប្រធានសមាគមធនាគារកម្ពុជា បានមានប្រសាសន៍ថា ផលប៉ះពាល់ពីការបាត់បង់ប្រព័ន្ធអនុគ្រោះពន្ធពីសហភាពអឺរ៉ុបប្រាកដជាមាន ក៏ប៉ុន្តែត្រូវដឹងថា ការធ្វើអាជីវកម្មមិនអាចនៅពឹងពាក់លើការអនុគ្រោះនេះយូរអង្វែងតទៅទៀត គឺត្រូវពឹងពាក់លើកំលាំងសេដ្ឋកិច្ចនៃប្រទេសនោះ ដូចជាពឹងលើការនាំចេញក៏ដូចជាពឹងទៅលើទីផ្សារក្នុងប្រទេស ។ លោកបណ្ឌិត អ៊ិន ចាន់នី បានបន្តថា «អ្វីដែលត្រូវធ្វើបន្ត មិនមែននៅព្រួយបារម្ភខ្លាចបាត់ការអនុគ្រោះពន្ធនោះទេ តែសហគ្រិនក្នុងប្រទេសទាំងអស់ត្រូវបង្កើនសមត្ថភាព ដោយបណ្ដុះបណ្ដាលធនធានមនុស្សក្នុងសហគ្រាសទាំងអស់ ពិនិត្យមើលឡើងវិញ នូវខ្សែសង្វាក់ផលិតកម្មនៃសហគ្រាសទាំងអស់ក្នុងស្រុក ដើម្បីអោយការចំណាយធ្លាក់មកនៅតិចបំផុត » ។
លោកបន្តថា ការរស់នៅដោយពឹងលើគេវាមិនស្រួលប៉ុន្មាននោះទេ ជាក់ស្ដែង ផលដែលសហគមន៍បានផ្ដល់មកកម្ពុជា លោកមិនគិតថាវាធំប៉ុន្មាននោះទេ ហើយបើសិនជាយើងនៅតែពឹងលើគេ គេនឹងគំរាមយើងបានគ្រប់ពេល ដូច្នេះ មានការបើកចំហរពាណិជ្ជកម្មខាងក្រៅ ហើយពង្រឹងផលិតកម្មខាងក្នុង ដើម្បីរក្សាស្ថេរភាពសេដ្ឋកិច្ច ដែលអាចជំរុញអោយយើងអាចរស់នៅបានដោយខ្លួនហើយ ។ ប៉ុន្តែបើក្រលេកមកមើលសហគមន៍ ដែលកំពុងធ្វើនីតិវិធីដកប្រព័ន្ធអុគ្រោះពន្ធពីកម្ពុជា វាជារឿងអយុត្តិធម៌មួយសម្រាប់កម្ពុជា ។ តួយ៉ាង ការដាក់ពន្ធលើការនាំចូលអង្ករពីកម្ពុជាចូលទីផ្សារអឺរ៉ុប គឺជារឿងមិនសមហេតុផល ដោយគ្រាន់តែយកលេសថា ដើម្បីទុកផលប្រយោជន៍អោយកសិករអឺរ៉ុប ។តាមពិតគឺអង្កររបស់កសិករអឺរ៉ុប មិនអាចប្រកួតប្រជែង ជាមួយអង្ករកម្ពុជាបាន ទើបគេធ្វើជាដាក់ពន្ធ ដើម្បីអោយអង្ករកម្ពុជាឡើងថ្លៃ នៅទីផ្សារអឺរ៉ុប ។
លោកបន្ថែមថា «សម្រាប់ EBA ក៏ដូចគ្នា គេយកបញ្ហាសិទ្ធិមនុស្សមកជជែកដើម្បីដកការអនុគ្រោះពន្ធ ក៏ប៉ុន្តែបើក្រលេកទៅមើលប្រទេសក្នុងតំបន់អាស៊ាន ដូចជាទាន់មានប្រទេសណាមួយល្អប្រសើរជាងកម្ពុជានៅឡើយទេ» ។យ៉ាងណាក៏ដោយ កម្ពុជានឹងធ្វើជាម្ចាស់ផ្ទះក្នុងប្រជុំអាស៊ីអឺរ៉ុបនៅពេលឆាប់ៗ ដូច្នេះអឺរ៉ុប អាចមកកម្ពុជា និងសង្កេតដោយផ្ទាល់ ហើយពេលនោះ ពួកគាត់នឹងយល់កាន់តែច្បាស់ពីកម្ពុជា» ។ លោកក៏បានបញ្ជាក់បន្ថែមថាសម្រាប់វិស័យធនាគារ ក្នុងប្រទេសកម្ពុជានៅឆ្នាំ ២០២០ខាងមុខ លោកនៅតែមានសុទិដ្ឋិនិយមខ្ពស់ចំពោះការធ្វើប្រតិបត្តិការ ជាក់ស្ដែងធនាគារអេសីលីដាផ្ទាល់ នឹងកំណត់ផែនការលូតលាស់របស់ខ្លួនប្រមាណជាង១២ភាគ
រយ ។
បើតាមលោកផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បាននិយាយថាកុំយក EBA មកគំរាមកម្ពុជា ហើយ ក៏សូមអោយបណ្ដាស្ថាប័នផ្សព្វផ្សាយទាំងឡាយបញ្ឈប់ការនិយាយពីបញ្ហា EBA ។ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏បានបញ្ជាក់ផងដែរថាកម្ពុជា បានត្រៀមខ្លួនហើយក្នុងការបង់ពន្ធទៅទីផ្សារអឺរ៉ុបបើសិនជាសហគមន៍អឺរ៉ុបដកប្រព័ន្ធអនុគ្រោះពន្ធ EBA ពីកម្ពុជា ។
សូមបញ្ជាក់ថា បច្ចុប្បន្នអឺរ៉ុបជាទីផ្សារធំទី២របស់កម្ពុជាបន្ទាប់ពីសហរដ្ឋអាមេរិក ដែលមានចំណែកប្រមាណ២៤ភាគរយនៃទីផ្សារនាំចេញសរុប ។ ការនាំចេញទៅកាន់សហភាពអឺរ៉ុបភាគច្រើន ឬស្ទើរតែទាំងអស់ ត្រូវនាំចេញដោយមិនមានការបង់ពន្ធនោះឡើយ ក្រោមកម្មវិធី អ្វីគ្រប់យ៉ាងលើកលែងអាវុធ ( EBA ) ។ ការសិក្សានានាក៏បានបង្ហាញផងដែរថា បើសិនជាអឺរ៉ុបដកប្រព័ន្ធ EBA នេះពីកម្ពុជា ក្នុងមួយឆ្នាំកម្ពុជាត្រូវបង់ពីរង្វង់៦០០លាន ទៅ៧០០លានអាមេរិកលើទំនិញដែលនាំចូលទៅកាន់ទីផ្សារអឺរ៉ុប ៕ កែសម្រួលដោយ ៖ សុឃាក់
ចែករំលែកព័តមាននេះ