រាជធានីភ្នំពេញ ៖ មានករណីអគ្គីភ័យបានឆាបឆេះនៅក្នុងបរិវេណឃ្លាំងស្តុកគ្រឿងបរិក្ខារអគ្គិសនីកម្ពុជា ហើយមូលហេតុសង្ស័យបណ្ដាលមកពីឆ្លងចរន្តភ្លើងអាគុយរថយន្តស្ទូច១គ្រឿង ទើបបង្កជាអគ្គីភ័យឆាបឆេះរថយន្តនោះទាំងមូល ព្រមទាំងឆេះរាលដាលដល់ឡាំងក្រដាស និងគ្រឿងបរិក្ខារអគ្គិសនីនៅក្បែរនោះយ៉ាងសន្ធោសន្ធៅ ហើយទំហំនៃការខូចខាត បើគិតជាទឹកប្រាក់ខ្ទង់ម៉ឺនដុល្លារ ។…
រាជធានីភ្នំពេញ ៖ មានករណីអគ្គីភ័យបានឆាបឆេះនៅក្នុងបរិវេណឃ្លាំងស្តុកគ្រឿងបរិក្ខារអគ្គិសនីកម្ពុជា ហើយមូលហេតុសង្ស័យបណ្ដាលមកពីឆ្លងចរន្តភ្លើងអាគុយរថយន្តស្ទូច១គ្រឿង ទើបបង្កជាអគ្គីភ័យឆាបឆេះរថយន្តនោះទាំងមូល ព្រមទាំងឆេះរាលដាលដល់ឡាំងក្រដាស និងគ្រឿងបរិក្ខារអគ្គិសនីនៅក្បែរនោះយ៉ាងសន្ធោសន្ធៅ ហើយទំហំនៃការខូចខាត បើគិតជាទឹកប្រាក់ខ្ទង់ម៉ឺនដុល្លារ ។
អគ្គិភ័យបានឆាបឆេះតែខាងនៅក្រៅអគារឃ្លាំងប៉ុណ្ណោះ ខណៈនោះដោយសារមានការជួយអន្តរាគមន៍ពីសំណាក់រថយន្តពន្លត់អគ្គីភ័យជិត១០គ្រឿងបានចុះទៅបាញ់ពន្លត់ កុំអីភ្លើងអាចឆេះឆ្លងចូលដល់ក្នុងអគាឃ្លាំងដែលមានស្តុកសុទ្ធតែគ្រឿងបរិក្ខារអគ្គិសនីថ្លៃៗនិងសំខាន់ៗជាមិនខានឡើយ។
ហេតុការណ៍ខាងលើនេះបានកើតឡើងកាលពីវេលាម៉ោង១១ព្រឹកថ្ងៃទី២៦ ខែវិច្ឆិកា ឆ្នាំ២០១៩ នៅចំណុចក្នុងបរិវេណឃ្លាំងស្តុកគ្រឿងបរិក្ខាអគ្គិសនីកម្ពុជា ដែលមានទីតាំងស្ថិតនៅក្នុងភូមិប្រទះឡាង សង្កាត់ប្រទះឡាង ខណ្ឌកំបូល រាជធានីភ្នំពេញ។
តាមប្រភពពព័ត៌មានបានឱ្យដឹងថា ផ្លូវចូលទៅកាន់ទីតាំងកើតហេតុនោះពោរពេញទៅដោយជង្ហុកតូចធំជាច្រើន គ្មានការស្ថាបនា ឬឈូសឆាយ ដែលជាហេតុបង្កការលំបាកដល់រថយន្តពន្លត់អគ្គីភ័យចូលទៅជួយអន្តរាគមន៍បាញ់ទឹកពន្លត់ ។
តាមប្រភពព័ត៌មានបានឲ្យដឹងបន្តថា រថយន្តស្ទូចមួយគ្រឿងដែលបានឆ្លងចរន្តភ្លើងបង្កការឆាបឆេះនោះគឺត្រូវបានទុកចោលអត់ប្រើយូរមកហើយ ព្រោះមួយរយៈពេលកន្លងមកនេះនៅទីនោះគឺមិនមានការស្ទូចលើកដាក់អ្វីទេ ប្រសិនបើលើកដាក់សម្ភារៈគឺភាគច្រើនប្រើតែប៊ុកលីបប៉ុណ្ណោះ ។
តាមប្រភពព័ត៌មានបានឱ្យដឹងបន្តថា នៅវេលាព្រឹកថ្ងៃកើតហេតុ នៅសុខៗស្រាប់តែមានភ្លើងឆាបឆេះចេញពីផ្នែកកាប៊ីនរថយន្តស្ទូចនោះ ដោយសារតែឆ្លងចរន្តភ្លើងអាគុយ ដែលជាហេតុបង្កឲ្យមានការឆាបឆេះរាលដាលដល់ឡាំងក្រដាស់និងគ្រឿងបរិក្ខារអគ្គិសនីយ៉ាងឆាប់រហ័ស ហើយភ្លាមៗនោះបុគ្គលិកដែលបម្រើការងារនៅក្នុងទីតាំងកើតហេតុបានយកបំពង់ពន្លត់អគ្គីភ័យតូចធំជាច្រើនបំពង់ទៅបាញ់ពន្លត់ដែរ ប៉ុន្តែមិនរលត់ឡើយ ។ ផ្ទុយទៅវិញ ភ្លើងឆេះកាន់តែខ្លាំងឡើងៗរហូតមានការអន្តរាគមន៍ពីសំណាក់រថយន្តពន្លត់អគ្គីភ័យជិត១០គ្រឿងចេញទៅបាញ់ពន្លត់ ទើបភ្លើងរលត់ទៅវិញទាំងស្រុងនៅវេលាម៉ោងជាង១រសៀលថ្ងៃដដែលនោះ។
តាមប្រភពព័ត៌មានបានឱ្យដឹងបន្តទៀតថា ទោះបីជាបែបណា នៅក្នុងហេតុការណ៍គ្រោះអគ្គីភ័យខាងនេះមិនបានបណ្ដាលឲ្យមនុស្សណាម្នាក់រងរបួសឬក៏ស្លាប់បាត់បង់ជីវិតនោះទេ ប៉ុន្តែភ្លើងបានឆាបឆេះបណ្ដាលឲ្យរងការខូចខាតប្រអប់ជ័រសម្រាប់ដាក់កុងទ័រភ្លើងរាប់រយប្រអប់ រួមជាមួយគ្រឿងបរិក្ខារអគ្គិសនីជាច្រើនទៀត ព្រមទាំងរថយន្តស្ទូចធុនធំ១គ្រឿងផងដែរ ដែលគិតជាទឹកប្រាក់ខ្ទង់ម៉ឺនដុល្លារ ហើយសម្ភារៈដែលត្រូវភ្លើងឆេះទាំងអស់នេះគឺស្ថិតនៅក្នុងបរិវេណទីតាំងឃ្លាំងជាប់ជញ្ជាំងឃ្លាំង តែពុំមែននៅក្នុងអគារឃ្លាំងនោះឡើយ។ចំណែកនៅក្នុងអគារឃ្លាំងមានសុទ្ធតែគ្រឿងសំខាន់ៗ និងមានតម្លៃថ្លៃ ប្រសិនបើពន្លត់ពុំទាន់ ហើយភ្លើងឆេះរាលចូលដល់ក្នុងអគារឃ្លាំងទាំងមូលវិញ នឹងមានការខាតបង់រាប់លានដុល្លារជាមិនខានឡើយ៕ (កែសម្រួលដោយ ៖ ធីតា)
ចែករំលែកព័តមាននេះ