ខេត្តត្បូងឃ្មុំ ៖ គម្រោងស្ដារប្រឡាយ និងជួសជុលផ្លូវក្រាលក្រួសក្នុងឃុំចំនួន៤ ដែលមានទឹកប្រាក់ជាង ៣០០លានរៀល ត្រូវបានដាក់ឲ្យដេញថ្លៃនៅសាលប្រជុំសាលាស្រុកក្រូចឆ្មារ នាព្រឹកថ្ងៃទី២៥ វិច្ឆិកា ២០១៩។ ហើយការដេញថ្លៃនោះ ត្រូវបានគេសង្ស័យមើលឃើញថា មានការរៀបចំទុកជាមុន គឺដេញត្រូវទឹកតែ ព្រោះមានក្រុមហ៊ុនមួយចំនួនធំដែលមិនបានដាក់សំណើរ ព្រោះគេសន្យាអោយថ្លៃទឹកតែម្នាក់២០០ដុល្លារ បែរជាមិនឲ្យទៅវិញ។
លោក សយ ទូច អភិបាលស្រុកក្រូចឆ្មារ បានលើកឡើងថា គម្រោងដេញថ្លៃក្នុង១ឃុំៗនៅឆ្នាំនេះ និងឆ្នាំកន្លងទៅ គឺមិនមានទឹកប្រាក់ច្រើននោះទេ គឺមានក្នុងរង្វង់៦០លានរៀលទៅជាង ១០០លានរៀលតែប៉ុណ្ណោះ។
លោកអភិបាលស្រុកក្រូចឆ្មារបានបន្តថា ក្រោមការយកចិត្តទុកដាក់របស់ប្រមុខរាជរដ្ឋាភិបាលកម្ពុជា នៅក្នុងឆ្នាំ២០២០ខាងមុខនេះ មូលនិធិសម្រាប់អភិវឌ្ឍន៍ក្នុងមួយឃុំ គឺមានរហូតទៅដល់ជាង៧ម៉ឺនដុល្លារ ហើយនឹងឆ្នាំតទៅមុខទៀត ថវិកានឹងកើនឡើងរហូតទៅដល់១៥ម៉ឺនដុល្លារ។ ដូច្នេះថវិកាដែលទទួលបានមកមានចំនួនច្រើន ហើយឃុំនឹងធ្វើការអភិវឌ្ឍនៅលើវិស័យជាច្រើន ក្នុងនោះមានផ្លូវក្រាលក្រួសក្រហម គម្រោងស្ដារប្រឡាយទឹក ទ្វារទឹកប្រយោជន៍ទប់ទឹក សម្រាប់ស្រោចស្រពដំណាំស្រូវ ដែលនៅក្នុងឆ្នាំ២០១៩ នេះ កំពុងតែជួបបញ្ហាកង្វះទឹក។
ព័ត៌មានពិស្តារបន្តនឹងមានផ្សាយនៅលើកាសែតកោះសន្តិភាព។ (កែមស្រួលដោយ ៖ បុប្ផា)
ចែករំលែកព័តមាននេះ