រាជធានីភ្នំពេញ ៖ ក្នុងក្របខ័ណ្ឌកិច្ចសហប្រតិបត្តិការគណៈកម្មការទន្លេមេគង្គ (Mekong River Commission-MRC) កម្ពុជា ក្នុងនាមជាប្រធានក្រុមប្រឹក្សា MRC សម្រាប់ឆ្នាំ២០១៩ បានធ្វើជាម្ចាស់ផ្ទះនៃក្រុមប្រជុំក្រុមប្រឹក្សាលើកទី២៦ និងកិច្ចប្រជុំពិគ្រោះយោបល់ជាមួយប្រទេសដៃគូអភិវឌ្ឍន៍ក្នុងក្របខ័ណ្ឌ MRC លើកទី២៤ ដែលបានប្រព្រឹត្តិទៅនាថ្ងៃទី២៦ ខែវិច្ឆិកា ឆ្នាំ២០១៩ នៅសណ្ឋាគារ សូហ្វីតែល ភ្នំពេញភូគីត្រា នារាជធានីភ្នំពេញ។
ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម ប្រធានគណៈកម្មាធិការជាតិទន្លេមេគង្គកម្ពុជា និងជាប្រធានក្រុមប្រឹក្សា MRC សម្រាប់ឆ្នាំ២០១៩ បានអញ្ជើញដឹកនាំកិច្ចប្រជុំខាងលើ ដោយមានវត្តមានចូលរួមពីសមាជិកក្រុមប្រឹក្សា MRC ថ្នាក់រដ្ឋមន្ត្រីនៃប្រទេសជាសមាជិក MRC រួមមាន ៖ កម្ពុជា ឡាវ ថៃ និងវៀតណាម តំណាងប្រទេសដៃគូអភិវឌ្ឍន៍ តំណាងប្រទេសដៃគូសន្ទនា (ចិន និងមីយ៉ាន់ម៉ា) តំណាងនៃអង្គការតំបន់និងអន្តរជាតិ និងមន្ត្រីលេខាធិការដ្ឋានMRC សរុប ចំនួន ១០០ រូប។
កិច្ចប្រជុំ និងពិនិត្យពិភាក្សាលើវឌ្ឍនភាពនៃការអនុវត្តយុទ្ធសាស្ត្រអភិវឌ្ឍន៍អាង និងផែនការយុទ្ធសាស្ត្ររបស់ MRC ឆ្នាំ២០១៦-២០២០ និងការរៀបចំបន្តសម្រាប់ដំណាក់កាលបន្ទាប់, កិច្ចសហប្រតិបត្តិការតំបន់, ការអនុវត្តនីតិវិធីស្តីពីការគ្រប់គ្រងការប្រើប្រាស់ទឹក, ការតាមដានត្រួតពិនិត្យទន្លេ និងកិច្ចការសំខាន់មួយចំនួនទៀត ។ កិច្ចប្រជុំ ក៏នឹងពិនិត្យ អនុម័តផែនការការងារ MRC សម្រាប់ឆ្នាំ២០២០-២០២១ និងយុទ្ធសាស្ត្រគ្រប់គ្រងគ្រោះរាំងស្ងួត ឆ្នាំ២០២០-២០២៥។
ក្នុងសុន្ទរកថាថ្លែងបើកកិច្ចប្រជុំ, ឯកឧត្តម លឹម គានហោ តាងនាមរាជរដ្ឋាភិបាលកម្ពុជា បានសំដែងនូវការស្វាគមន៍យ៉ាងកក់ក្តៅចំពោះវត្តមានគណៈប្រតិភូដែលបានអញ្ជើញចូលរួមក្នុងកិច្ចប្រជុំ និងក្នុងនាមប្រធានក្រុមប្រឹក្សា MRC បានវាយតម្លៃខ្ពស់ចំពោះវឌ្ឍនភាពការងារ និងសមិទ្ធផលដែល MRC សម្រេចបានក្នុងឆ្នាំ២០១៩ តាមរយៈការអនុវត្តប្រកបដោយប្រសិទ្ធភាព នូវផែនការការងាររបស់ខ្លួនដែលបានដាក់ចេញ ក្រោមការសម្របសម្រួលអនុវត្តប្រកបដោយប្រសិទ្ធភាពរបស់លេខាធិការដ្ឋាន MRC និងដោយមានកិច្ចខិតខំប្រឹងប្រែងរួម ការប្តេជ្ញាចិត្តក្នុងចំណោមប្រទេសជាសមាជិក, ការគាំទ្រ ក៏ដូចជាភាពជាដៃគូយ៉ាងល្អពី និងជាមួយភាគីពាក់ព័ន្ធ ក្នុងកិច្ចសហប្រតិបត្តិការតំបន់ សម្រាប់ការអភិវឌ្ឍប្រកបដោយចីរភាពក្នុងអាងទន្លេមេគង្គ។
ឯកឧត្តមរដ្ឋមន្ត្រី ក៏បានលើកឡើងនូវបញ្ហាប្រឈមក្នុងអាងទន្លេមេគង្គ ជាពិសេសគ្រោះរាំងស្ងួតដ៏ធ្ងន់ធ្ងរដែលធ្វើឲ្យលំហូរទឹកទន្លេមេគង្គក្នុងឆ្នាំ២០១៩ មានកម្រិតទាបបំផុតដែលមិនធ្លាប់ជួបប្រទះនាពេលកន្លងមក។ ក្នុងបរិបទនេះ ឯកឧត្តមរដ្ឋមន្ត្រី បានសំដែងក្តីសង្ឃឹមថា យុទ្ធសាស្ត្រគ្រប់គ្រងគ្រោះរាំងស្ងួត ឆ្នាំ២០២០-២០២៥ បានអនុម័តនាពេលនេះ នឹងជួយដោះស្រាយបញ្ហាគ្រោះរាំងស្ងួត ក្នុងការគ្រប់គ្រង និងកាត់បន្ថយហានីភ័យគ្រោះទឹកជំនន់ដែលនឹងកើតមាន ឲ្យមានប្រសិទ្ធភាព។
ក្នុងនាមប្រធានក្រុមប្រឹក្សា MRC សម្រាប់ឆ្នាំ២០១៩, ឯកឧត្តមរដ្ឋមន្ត្រី បានថ្លែងអំណរគុណដល់ដៃគូអភិវឌ្ឍន៍ ដៃគូសន្ទនា និងភាគីពាក់ព័ន្ធផ្សេងទៀត ដែលបានជួយធ្វើឲ្យ MRC សម្រេចបាននូវសមិទ្ធផលធំៗជាច្រើនរហូតមកដល់ពេលនេះ ក្នុងកិច្ចប្រឹងប្រែង និងកិច្ចសហប្រតិបត្តិការតំបន់សម្រាប់ការអភិវឌ្ឍប្រកបដោយចីរភាពក្នុងអាងទន្លេមេគង្គ។
ឯកឧត្តមរដ្ឋមន្ត្រី បានគូសបញ្ជាក់ថា MRC បាននិងកំពុងរៀបចំយុទ្ធសាស្ត្រអភិវឌ្ឍន៍អាង ឆ្នាំ២០២១-២០៣០ និងផែនការយុទ្ធសាស្ត្ររបស់ខ្លួន ឆ្នាំ២០២១-២០២៥ ក្នុងគោលបំណងដើម្បីរួមចំណែក និងសម្រេចឲ្យបាននូវគោលដៅអភិវឌ្ឍន៍ប្រកបដោយចីរភាពក្នុងអាងទន្លេមេគង្គ ដូចដែលបានដាក់ចេញក្នុងសេចក្តីថ្លែងការណ៍ក្រុងសៀមរាប ដែលប្រមុខរដ្ឋាភិបាលនៃប្រទេសជាសមាជិក កម្ពុជា ឡាវ ថៃ និងវៀតណាម បានអនុម័តក្នុងកិច្ចប្រជុំកំពូល MRC លើកទី៣ ក្នុងខែមេសា ឆ្នាំ២០១៨ នៅខេត្តសៀមរាប ។ ឯកឧត្តមរដ្ឋមន្ត្រី បានស្នើដៃគូ និងភាគីពាក់ព័ន្ធបន្តជួយគាំទ្រ និងសហការក្នុងដំណើរការឆ្ពោះទៅគោលដៅនេះ ឲ្យទទួលបានជោគជ័យ។
សូមជម្រាបថា នៅមុនកិច្ចប្រជុំក្រុមប្រឹក្សាលើកទី២៦, ក្នុងនាមជាប្រធានក្រុមប្រឹក្សា MRC សម្រាប់ឆ្នាំ២០១៩, ឯកឧត្តមរដ្ឋមន្ត្រី ក៏បានអនុញ្ញាតឲ្យឯកឧត្តម Jean Bernard Carrasco ឯកអគ្គរដ្ឋទូតអូស្រា្តលី ប្រចាំប្រទេសឡាវ និងបច្ចុប្បន្នជាប្រធានក្រុមប្រទេសដៃគូអភិវឌ្ឍក្នុងក្របខ័ណ្ឌ MRC បានចូលជួបសំដែងការគួរសម និងពិភាក្សាការងារ។ នៅក្នុងជំនួបភាគីទាំងពីរ បានពិភាក្សាអំពីវឌ្ឍនភាពការងារ, បញ្ហាប្រឈម តម្រូវការ និងអាទិភាព របស់ MRC ក៏ដូចជាការពង្រឹងកិច្ចសហប្រតិបត្តិការរវាង MRC និងដៃគូអភិវឌ្ឍន៍ សម្រាប់ការគ្រប់គ្រង និងអភិវឌ្ឍន៍ប្រកបដោយចីរភាព ក្នុងអាងទន្លេមេគង្គ។ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ