តាម​ប្រភព​ព័ត៌មាន Soccer Laduma បានឱ្យ​ដឹង​ថា លោក Josep Maria Bartomeu នាយក​ក្លិប​អ្នកមាន​បុណ្យ Barcelona បាន​ធ្វើ​សេចក្តីថ្លែងការណ៍​យ៉ាង​មុតមាំ អំពី​អ្វី​ដែល​ទាក់ទង​នឹង​អនាគត​របស់​កីឡាករ​ជើង​ខ្លាំង​ផ្តាច់​គេ Lionel Messi​។

ខណៈ​ដែល Messi ធ្លាប់​បាន​ប្រាប់​ពី​ការ​វិល​ត្រឡប់​ទៅ​កាន់​ប្រទេស​អា​ហ្ស​ង់​ទី​ន ដែល​ជា​ប្រទេស​កំណើត​របស់​គាត់​នោះ ឥឡូវនេះ លោក Bartomeu ហាក់ដូចជា​បាន​ព្យាយាម​បន្ធូរបន្ថយ​ការ​ភ័យ​ខ្លាច​របស់​អ្នកគាំទ្រ Barcelona តាម​រយៈ​ការ​ធ្វើ​សេចក្តីថ្លែងការណ៍​យ៉ាង​មុតមាំ​អំពី​អនាគត​របស់ Messi​។

បើ​តាម​ការ​ចុះ​ផ្សាយ​របស់ Daily Mail បានអោយ​ដឹង​ថា លោក Bartomeu បាន​មាន​ប្រសាសន៍​ថា​៖ «Leo Messi នឹង​នៅ​តែ​លេង​ជាមួយ​យើង​សំរាប់ ២​ឆ្នាំ ឬ ៥​ឆ្នាំ​ទៀត ខ្ញុំ​គ្មាន​មន្ទិល​សង្ស័យ​អ្វី​បន្តិច​ទេ​។ ប្រាកដ​ណាស់ វា​នឹង​ក្លាយជា​បំណងប្រាថ្នា​របស់​គ្រប់​ភាគី​ទាំងអស់ ប្រសិនបើ​គាត់ (Messi) មាន​ចង់​បន្ត​កិច្ចសន្យា​នេះ​ដោយ​គ្មាន​កំណត់​។

លោក​បាន​បន្ត​ថា​៖ «​នៅ​ទីបំផុត គឺ​គាត់​ដែល​ត្រូវ​តែ​សម្រេចចិត្ត​។ គាត់​ទទួល​បាន​សិទ្ធិ​ក្នុង​ការ​សម្រេចចិត្ត​ថា តើ​ពេល​ណា​គាត់​នឹង​ឈប់​លេង​បាល់ទាត់0x017d7 ប៉ុន្តែ​ដូច​អ្វី​ដែល​គាត់​បាន​និយាយ​កាលពី​ប៉ុន្មាន​ស​ប្តា​ហ៍​មុន គាត់​ចង់​បញ្ចប់​អាជីព​បាល់ទាត់​របស់​គាត់​ត្រឹម​ក្លិប Barcelona»​។

លោក Bartomeu ក៏​បាន​បង្ហើប​ផង​ដែរ​ថា នឹង​មាន​កន្លែង​មួយ​នៅ​ឯ​ក្លឹ​ប​សម្រាប់ Messi អាយុ ៣២​ឆ្នាំ ទោះបីជា​គាត់​បញ្ចប់​អាជីព​ជា​កីឡាករ​ក៏​ដោយ​។

គួរ​បញ្ជាក់​ផង​ដែរ​ថា Messi រកបាន​៩​គ្រាប់ និង​ជួយ​ទាត់ Assist បាន ៥​គ្រាប់​ក្នុង​ការ​បង្ហាញខ្លួន ១១​លើក សម្រាប់ Barca រហូត​មក​ដល់​រដូវ​កាល​នេះ ហើយ​ត្រូវ​បាន​គេ​តែងតាំង​សម្រាប់​ពានរង្វាន់ Ballon d’Or ឆ្នាំ ២០១៩៕ (​កែសម្រួល​ដោយ ៖ បុប្ផា​)