ខេត្តប៉ៃលិន ៖ រហូតមកដល់ចុងឆ្នាំ២០១៩នេះ ប្រជាកសិករជាច្រើននាក់ ដែលដាំដំណាំស្វា យកែវរមៀត បានចាប់ផ្តើមប្រមូលផលផ្លែស្វាយរបស់ខ្លួនជាបណ្តើរៗហើយ ដោយតម្លៃមិនមានការធ្លាក់ចុះអ្វីនោះទេ គឺអាចទទួលយកបាន ។ ចំណែកឈ្មួញកណ្តាល ក៏សប្បាយរីករាយ ក្នុងការដើរម៉ៅទិញផ្លែស្វាយនៅតាមចម្ការនីមួយៗ រួចជួលគោយន្ត ឬរថយន្ត ដឹកយកទៅលក់ដូរបន្តនៅប្រទេសថៃផងដែរ ។
បើតាមប្រភពពីកសិករម្នាក់ឈ្មោះ សារ៉ាត់ រស់នៅភូមិប៉ាហ៊ីជើង សង្កាត់ប៉ៃលិន បានរៀបរាប់ឱ្យដឹងថា គាត់បានដាំដំណាំស្វាយកែវរមៀតរាប់រយដើមនៅក្នុងចម្ការ ត្រង់ចំណុចខកមូស ក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន ។
គាត់បន្តទៀតថា រហូតមកដល់ពេលនេះ គាត់បានម៉ៅផ្លែស្វាយឱ្យឈ្មួញច្រកថង់ខ្លះ និងម៉ៅផ្លែស្វាយដែលសេសសល់ទៅឱ្យឈ្មួញដទៃទៀត គេបេះយកទៅលក់ដូរនៅប្រទេសថៃ ។ ចំពោះតម្លៃទីផ្សារ មិនមានអ្វីខុសប្លែកពីឆ្នាំមុនៗប៉ុន្មានដែរ គឺបើផ្លែល្អអាចលក់បាន១គីឡូក្រាម ក្នុងតម្លៃ១៥០០រៀលទៅ១៦០០រៀល ។ តែបើផ្លែស្វាយមិនសូវល្អ តម្លៃក៏ធ្លាក់ចុះទៅតាមនោះដែរ ប៉ុន្តែមិនមានការធ្លាក់ចុះខ្លាំងនោះឡើយ ពោលគឺប្រហាក់ប្រហែលទៅនឹងឆ្នាំមុនៗដែរ ។
បើតាមប្រភពពីឈ្មួញកណ្តាលដើរម៉ៅផ្លែស្វាយម្នាក់ឈ្មោះ ពែង ភេទប្រុស អាយុ៤១ឆ្នាំ និងប្រពន្ធឈ្មោះ វឿន អាយុ៤០ឆ្នាំ រស់នៅខេត្តបាត់ដំបង បានរៀបរាប់ឱ្យដឹងថា គាត់បានដើរម៉ៅផ្លែស្វាយតាមចំការនៅបណ្តាខេត្តនានាជាច្រើន ដូចជា កំពង់ចាម កំពង់ស្ពឺ កំពង់ធំ សៀមរាប បាត់ដំបង រហូតមកដល់ខេត្តប៉ៃលិន ហើយក៏ជួលកម្មករឱ្យបេះដាក់លើរថយន្តដឹកយកទៅលក់បន្តនៅប្រទេសថៃ ។
ប្រភពបន្តទៀតថា ចំពោះតម្លៃ គឺទាក់ទងទៅថៅកែជនជាតិថៃជាមុន រួចបើគេឱ្យទិញក្នុងតម្លៃប៉ុន្មាន ខាងគាត់ក៏ទិញទៅតាមនោះដែរ ដោយមិនខាតនោះទេ ទោះជាតម្លៃទីផ្សារមានការធ្លាក់ចុះក៏ដោយ ។
ជាក់ស្តែង រហូតមកដល់រសៀលថ្ងៃទី១២ ខែវិច្ឆិកា ឆ្នាំ២០១៩នេះ ខាងលោ កបានបេះផ្លែស្វាយ ដែលខ្លួនម៉ៅដឹកទៅលក់នៅប្រទេសថៃ ដោយ១គីឡូក្រាមតម្លៃ១១បាត(ប្រាក់ថៃ) ប្រហែល១៣០០រៀល ហើយបើផ្លែស្វាយល្អជាងនេះ តម្លៃក៏ខ្ពស់ជាងនេះបន្តិចទៀតដែរ ។ ប៉ុន្តែ បើទូទាត់ថ្លៃដឹក ថ្លៃនាំចេញ និងថ្លៃឈ្នួលកម្មករក្នុង១ថ្ងៃៗ គាត់ចំណាយរហូតដល់១០០០ដុល្លារឯណោះ ពោលគឺកម្មករម្នាក់ក្នុង១ថ្ងៃជួលគាត់២៥០០០រៀល ដោយទិញម្ហូបអាហារឱ្យពួកគាត់ទទួលទានថែមទៀត ។ តែទោះបីជាយ៉ាងណា ខាងលោកអាចសល់ថវិកាសម្រាប់យកទៅផ្គត់ផ្គង់ជីវភាពរស់នៅប្រចាំថ្ងៃដែរ។
សូមបញ្ជាក់ថា បច្ចុប្បន្ន ប្រជាពលរដ្ឋ ដែលមានដីច្រើនកន្លែង គេដាំដំណាំច្រើនមុខ ដូចជា ពោតក្រហម ដំឡូងមី តាង៉ែន ហៅមៀនប៉ៃលិន និងទុកដីមួយចំនួនទៀត ដាំដំណាំស្វាយកែវរមៀតផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ