រាជធានីភ្នំពេញ ៖ រថយន្ដមួយគ្រឿងបានបើកបរក្នុងល្បឿនលឿនតាមបណ្ដោយមហាវិថីព្រះនរោត្តម មកដល់មុខស្ថានទូតថៃ ស្រាប់តែរ៉េចង្កូតមកខាងឆ្វេងឆ្លងផ្លូវបញ្ច្រាស់ទិសដៅទៅបុកនឹងប៉ុស្ដិ៍សមត្ថកិច្ចយាម នៅមុខស្ថានទូត បណ្តាលឱ្យរងការខូចខាតយ៉ាងដំណំ នឹងជ្រុលទៅបុកដើមត្របែកព្រៃ១ដើមទៀតធ្វើឱ្យបាក់រលើងទាំងឫសរាបដល់ដី ចំណែករថយន្តក៏អស់ល្បឿនទៅមុខលែងរួចតែម្តងបង្កឱ្យមានការភ្ញាក់ផ្អើលកាលពីម៉ោង2និង30រំលងអធ្រាត្រឈានចូលថ្ងៃទី11 ខែវិច្ឆិកា ឆ្នាំ២០១៩ នៅទល់មុខស្ថានទូតថៃ តាមបណ្ដោយមហាវិថីព្រះនរោត្តម ស្ថិតនៅក្នុងសង្កាត់ទន្លេរបាសាក់ ខណ្ឌចំការមន ។
សេចក្រីរាយការណ៍បន្តថា ហេតុការណ៍គ្រោះថ្នាក់ខាងលើនេះដែលបង្កឡើងដោយរថយន្ដតូយូតាព្រូស មួយគ្រឿង ពណ៌ស ពាក់ស្លាកលេខភ្នំពេញ 2BC:5335 បើកបរដោយបុរសម្នាក់ មិនស្គាល់អត្តសញ្ញាណ។
តាមប្រភពពីអ្នកឃើញហេតុការណ៍ប្រាប់ថា មុនកើតហេតុ គឺឃើញរថយន្តបង្កខាងលើធ្វើដំណើរតាមបណ្តោយផ្លូវមហាវិថីព្រះនរោត្តមពីជើងទៅត្បូង ចេញពីស្តុបចំការមនសំដៅទៅស្ពានអាកាសក្បាលថ្នល់ ក្នុងល្បឿនលឿនដូចហោះ លុះមកដល់ជិតស្ថានទូតថៃ ស្រាប់តែរថយន្តបង្ករ៉េចង្កូតមកខាងឆ្វេងឆ្លងផ្លូវបញ្ច្រាស់ទិសដៅចរាចរណ៍គេ ក៏ជ្រុលទៅបុកប៉ុស្ដិ៍សមត្ថកិច្ចយាមមុខស្ថានទូត បណ្តាលឱ្យរងការខូចខាតយ៉ាងដំណំ។
ប្រភពដដែលបន្តថា ពេលនោះរថយន្ដមិនទាន់អស់ល្បឿនទេ ក៏ជ្រុលទៅបុកនឹងដើមត្របែកព្រៃមួយដើមទៀតដែលនៅមុខរបងស្ថានទូតនោះ បណ្តាលឱ្យបាក់រលើងទាំងឫសរាបដល់ដីតែម្តង ចំណែករថយន្ដបង្កក៏អស់ល្បឿនទៅមុខលែងរួច ហើយរថយន្តបង្កនោះរងការខូចខាតខ្ទេចមួយកំណាត់មុខ តែសំណាងល្អក្នុងហេតុការណ៍នេះមិនបង្កឱ្យនរណារម្នាក់រងរបួសឡើយ គឺខូចតែរថយន្តបង្កតែប៉ុណ្ណោះ។
តាមសម្តីសមត្ថកិច្ចយាមមុខស្ថានទូតថៃ បានបញ្ជាក់ប្រាប់ឱ្យដឹងថា រាល់ថ្ងៃនៅក្នុងនប៉ុស្តិ៍យាមនោះ តែងតែមានសមត្ថកិច្ចនៅប្រចាំការរាល់យប់ជានិច្ច តែថ្ងៃកើតហេតុនេះសមត្ថកិច្ចដែលយាមនោះ មិនបានសម្រាកនៅក្នុងប៉ុស្ដិ៍យាមឡើយ គឺពួកគាត់បានចងអង្រឹងនៅដើមឈើក្បែរនោះសម្រាក ទើបមិនមានអ្នកកើតអ្វីឡើយ នេះបើសិនជាពួកគាត់សម្រាកនៅក្នុងប៉ុស្តិ៍យាមនោះ មិនដឹងថាទៅជាយ៉ាងណានោះទេ បើរថយន្ដបង្កបើកលឿនដូចហោះយ៉ាងនេះ។
បន្ទាប់ពីបង្កហេតុ អ្នកបើកបររថយន្តខាងលើបានប្រាប់សមត្ថកិច្ចឱ្យដឹងថា មូលហេតុដែលបង្កឱ្យមានហេតុការណ៍នេះកើឡើង គឺបណ្ដាលមកពីគាត់ងងុយគេង ងោកមួយភាំង ក៏រ៉េចង្កូតទៅបុកបែបនេះតែម្តង។
ក្រោយកើតហេតុ អ្នកបើករថយន្ត ត្រូវបានសមត្ថកិច្ចទូតឃាត់ខ្លួនបណ្តោះអាសន្ន ចំណែករថយន្តបង្កត្រូវបានសមត្ថកិច្ចមូលដ្ឋាន ប្រគល់ទៅឱ្យខាងជំនាញចរាចរណ៍ក្រុង ធ្វើការវាស់វែងយកទៅកាន់ការិយាល័យនរគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយគ្នានៅពេលក្រោយ។ (កែសម្រួលដោយ ៖ បុប្ផា)
ចែករំលែកព័តមាននេះ