ស្រុកកៀនស្វាយ ៖ បើតាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍មួយរវាងរថយន្តបុកជាមួយរថយន្ដបន្តទៅបុកម៉ូតូទៀត បណ្តាលឱ្យស្លាប់ម្នាក់ របួសធ្ងន់ ស្រាល៤នាក់ បង្កឱ្យមានការភ្ញាក់ផ្អើលកាលពី៦និង១៥នាទីល្ងាច នៅថ្ងៃទី០៩ វិច្ឆិកា ២០១៩ ស្ថិតនៅលើផ្លូវជាតិលេខ១ ក្នុងចន្លោះគីឡូម៉ែត្រលេខ ២១-២២ ចំណុចភូមិស្លាបតាអោន ឃុំគគីរ ស្រុកកៀនស្វាយ ខេត្តកណ្តាល។
សេចក្តីរាយការណ៍បន្តថា រថយន្តបង្កខាងលើម៉ាក LEXUS 470 ពណ៌ខ្មៅ ប្រភេទទេសចរណ៍ ពាក់ផ្លាកលេខ ភ្នំពេញ 2F-8877 អ្នកបើកបរមិនស្គាល់អត្តសញ្ញាណ ចំណែករថយន្ត១គ្រឿងទៀតម៉ាក HIGHLANDER ពណ៌ទឹកប្រាក់ ប្រភេទសទេសចរណ៍ ពាក់ផ្លាកលេខ ភ្នំពេញ 2V-6634 អ្នកបើកបរ ឈ្មោះចាប សុខី ភេទប្រុស អាយុ៣៦ឆ្នាំ មានទីលំនៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល ព្រមទាំងអ្នករួមដំណើរ២នាក់ទៀត ម្នាក់ឈ្មោះសុង គន្ធា ភេទស្រី អាយុ២៧ឆ្នាំ និងម្នាក់ឈ្មោះសុង ចាន់ធី មានទីលំនៅភូមិជាមួយគ្នា រងរបួសធ្ងន់ -ស្រាលទាំង៣នាក់។
ចំណែកម៉ូតូ១គ្រឿងផ្សេងទៀតម៉ាក HONDA DREAM 125 ពណ៌ខ្មៅ ពាក់ផ្លាលេខ ភ្នំពេញ 1GP-4566 បើកបរដោយឈ្មោះចាន់ ស៊ីដេត ភេទប្រុស អាយុ៤២ឆ្នាំ បានស្លាប់ មានទីលំនៅភូមិតារាប ឃុំគគីរ ស្រុកកៀនស្វាយ ខេត្តកណ្តាល និងប្រពន្ធឈ្មោះប៊ុន សារ៉ុន ភេទស្រី អាយុ៣៩ឆ្នាំ រងរបួសស្រាល។
បើតាមនគរបាលស្រុកកៀនស្វាយ បានប្រាប់ឱ្យដឹងថា នៅមុនកើតហេតុ មានរថយន្ត១គ្រឿងម៉ាក LEXUS 470 ពណ៌ខ្មៅ បើកបរដោយជនមិនស្គាល់អត្ដសញ្ញាណ បានបើកពីអ្នកលឿងទៅភ្នំពេញតាមផ្លូវជាតិលេខ១ លុះពេលបើកមកដល់កន្លែងកើតហេតុខាងលើ ក៏បុកជាមួយរថយន្ដម៉ាក HIGHLANDER ពណ៌ទឹកប្រាក់ ដែលមានអ្នករួមដំណើរ២នាក់ក្នុងនោះ បណ្តាលឱ្យរបួសធ្ងន់-ស្រាលទាំង៣នាក់ ។
ប្រភពដដែលបន្តថា ក្រោយមករថយន្ត LEXUS 470 នេះ មិនទាន់អស់ល្បឿនក៏បត់ទៅខាងឆ្វេង ស្រាប់តែទៅបុកម៉ូតូ១គ្រឿងទៀតម៉ាក HONDA DREAM 125 ពណ៌ខ្មៅ ដែលជិះ២នាក់ប្តីប្រពន្ធ បណ្ដាលឱ្យបុរសជាប្តីស្លាប់ ចំណែកប្រពន្ធរងរបួសស្រាល រីឯអ្នកបើករថយន្ត LAXUS បានរត់គេចបាត់ស្រមោល ។
ក្រោយពេលកើតហេតុសមត្ថកិច្ចមូលដ្ឋានផ្នែកជំនាញចរាចរណ៍ផ្លូវគោក បានចុះមកដល់កន្លែងកើតហេតុ ធ្វើការនវាស់វែង រួចយកម៉ូតូនិងរថយន្តទាំង២គ្រឿងទៅរក្សាទុកនូវអធិការនគរបាលស្រុកកៀនស្វាយ ដើម្បីរង់ចាំដោះស្រាយនៅពេលក្រោយ ។ ចំណែកសពជនរងគ្រោះសមត្ថកិច្ចបានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕ (កែសម្រួលដោយ ៖ បុប្ផា)
ចែករំលែកព័តមាននេះ