ខេត្តកំពង់ឆ្នាំង ៖ កម្មករ២នាក់ប្តីប្រពន្ធបានស្លាប់ភ្លាមនៅនឹងកន្លែងកើតហេតុ បន្ទាប់ពីជួបគ្រោះថ្នាក់ចរាចរណ៍យ៉ាងរន្ធត់មួយបានកើតឡើងកាលពីនៅម៉ោង៥និង៣០នាទីព្រឹក ថ្ងៃទី០៩ ខែវិច្ឆិកា ឆ្នាំ២០១៩ នៅលើកំណាត់ផ្លូចជាតិលេខ៥ ត្រង់ចន្លោះគីឡូម៉ែត្រលេខ៦៤ និងលេខ៦៥ ស្ថិតនៅភូមិធ្លកយល់ ឃុំតាជេស ស្រុកកំពង់ត្រឡាច ខណៈដែលរថយន្តទួរីស១គ្រឿងបើកវ៉ាជែងមិនប្រយ័ត្ន បណ្តាលបុកម៉ូតូជនរងគ្រោះ២នាក់ប្តីប្រពន្ធ ។
សមត្ថកិច្ចនគរបាលមូលដ្ឋានបានឲ្យដឹងថា ជនរងគ្រោះដែលបានស្លាប់ក្នុងហេតុការណ៍គ្រោះថ្នាក់ខាងលើ ឈ្មោះ បេង លុច ភេទប្រុស អាយុ២៦ឆ្នាំ មានទីលំនៅភូមិចាន់ត្រក ឃុំក្រាំងស្គារ ស្រុកទឹកផុស ជាអ្នកបើកបរម៉ូតូ ចំណែកប្រពន្ធជិះពីក្រោយឈ្មោះ សែន សុខខឿន អាយុ២៤ឆ្នាំ រស់នៅភូមិចំបក់ប្រសាទ ឃុំក្រាំងស្គារ ។
ប្រភពដដែលបន្តថា មុនកើតហេតុ ជនរងគ្រោះទាំង២នាក់ប្ដីប្រពន្ធ បានជិះម៉ូតូម៉ាក suzuki smah ពណ៌ក្រហម ពាក់ស្លាកលេខព្រៃវែង 1c .62 99 ពីត្បូងទៅជើង លុះមកដល់ចំណុចកើតហេតុ ស្រាប់តែមានរថយន្តមួយគ្រឿងម៉ាកសាំយ៉ុង ពណ៌ស ពាក់ស្លាកលេខភ្នំពេញ 2N-5893 បើកបរដោយជនពុំស្គាល់ឈ្មោះជើងទៅត្បូង បានបើកវ៉ាជែង រួចក៏ជ្រុលទៅបុកម៉ូតូជនរងគ្រោះ បណ្ដាលឱ្យស្លាប់ទាំង២នាក់ប្តីប្រពន្ធយ៉ាងអាណោចអាធ័មតែម្ដង ។ ក្រោយពេលកើតហេតុ អ្នកបើកបររថយន្តបង្កបានរត់គេចខ្លួនបាត់ ។
តាមសាក្សីដែលធ្វើដំណើរជាមួយ ប៉ុន្តែជិះម៉ូតូ២គ្រឿងផ្សេងគ្នា និងបានគេចពីគ្រោះថ្នាក់ខាងលើនេះ បានប្រាប់សមត្ថកិច្ចថា ជនរងគ្រោះទាំង២នាក់ប្តីប្រពន្ធជាកម្មកររោងចក្រ ហើយក្នុងថ្ងៃឈប់សម្រាកបាននាំគ្នាជិះម៉ូតូទៅផ្ទះនៅឃុំក្រាំងស្គា ស្រុកទឹកផុសជាមួយគា្ន។ ដោយប្តីប្រពន្ធទាំង២នាក់ជិះខាងមុខ រូបគាត់ជិះពីក្រោយ។
ប្រភពដដែលបន្តថា លុះមកដល់ចំណុចកើតហេតុ ស្រាប់តែឃើញឡានទួរីសមួយគ្រឿងបើកវ៉ាជែងយ៉ាងលឿន ហើយក៏ជ្រុលទៅបុកម៉ូតូជនរងគ្រោះទាំងពីរនាក់ប្ដីប្រពន្ធតែម្តង ចំណែករូបគាត់បានគេចធ្លាក់ផ្លូវទើបរួចខ្លួន។
ក្រោយពេលកើតហេតុ សមត្ថកិច្ចបានយករថយន្តបង្ក និងម៉ូតូជនរងគ្រោះទៅរក្សាទុកនៅអធិការនគរបាលស្រុកកំពង់ត្រឡាច ដើម្បីធ្វើការដោះស្រាយតាមនីតិវិធី។ ចំណែកជនរងគ្រោះទាំង២នាក់ប្តីប្រពន្ធត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕ (កែសម្រួលដោយ ៖ បុប្ផា)
ចែករំលែកព័តមាននេះ