រាជធានីភ្នំពេញ ៖ កម្លាំងនគរបាលប៉ុស្តិ៍ចោមចៅ៣ បានធ្វើការចាប់ខ្លួនអ្នកជួញដូរ និងប្រើប្រាស់គ្រឿងញៀនចំនួន៦នាក់ ដោយដកហូតបានអាវុធខ្លីស៊េរីទំនើប១ដើម រួមជាមួយសម្ភារៈពាក់ព័ន្ធមួយចំនួនទៀតផងដែរ ។ ប្រតិបត្តិការនេះធ្វើឡើងកាលពីម៉ោង១២និង៣០នាទីរសៀល ថ្ងៃទី០៨ ខែវិច្ឆិកា ឆ្នាំ២០១៩ ស្ថិតក្នុងភូមិព្រៃព្រីងជើង១ សង្កាត់ចោមចៅ៣ ខណ្ឌពោធិ៍សែនជ័យ ។
ជនសង្ស័យដែលត្រូវចាប់ខ្លួននោះ រួមមាន ១-ឈ្មោះ អៀង ម៉េងហៀង ភេទប្រុស អាយុ២៨ឆ្នាំ មានទីលំនៅក្នុងភូមិចំការឪឡឹក១ សង្កាត់កាកាប១ ខណ្ឌពោធិ៍សែនជ័យ ជននេះជាអ្នកជួញដូរគ្រឿងញៀន និងកាន់កាប់អាវុធខ្លីម៉ាកឡុក១ដើម ហើយត្រូវនគរបាលដកហូត។
២-ឈ្មោះ វ៉ែន វៀន ភេទប្រុស អាយុ២២ឆ្នាំ មុខរបររើសអេតចាយ ស្នាក់នៅភូមិខាងលើ មានថ្នាំ១កញ្ចប់តូច ។ ៣-ឈ្មោះ យឿង ស្រឹប ភេទប្រុស អាយុ២០ឆ្នាំ មុខរបររើសអេតចាយ ស្នាក់នៅភូមិជម្ពូវ័ន សង្កាត់ចោមចៅ៣ ។ ៤-ឈ្មោះ ឈិត សុលៀង ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅភូមិព្រៃព្រីងជើង សង្កាត់ចោមចៅ៣ ។ ៥-ឈ្មោះ ជ័យ ផាន ភេទប្រុស អាយុ៤១ឆ្នាំ មុខរបរមិនពិតប្រាកដ និង៦ – ឈ្មោះ មាស សុភ័ក្រ ភេទប្រុស អាយុ៤៧ឆ្នាំ មុខរបរមិនពិតប្រាកដ ។ ជនទាំង៥នាក់ គឺជាអ្នកប្រើប្រាស់គ្រឿងញៀន ។
បើតាមនគរបាលបានឲ្យដឹងថា មុនពេលឈានដល់ការចាប់ខ្លួនជនខាងលើនេះ កម្លាំងនគរបាលប៉ុស្តិ៍ចោមចៅ៣ បានធ្វើការស្រាវជ្រាវស្វែងរកមុខសញ្ញាគ្រប់ប្រភេទនៅក្នុងមូលដ្ឋាន ដើម្បីបង្ការទប់ស្កាត់រាល់បទល្មើសផ្សេងៗមិនឲ្យកើតមាន។ ខណៈនោះក៏ទទួលព័ត៌មានពីប្រជាពលរដ្ឋប្រាប់មកថា មានជនសង្ស័យ១ក្រុមកំពុងជួញដូរ និងប្រើប្រាស់គ្រឿងយ៉ាងសកម្ម ទើបកម្លាំងនគរបាលប៉ុស្តិ៍ចោមចៅ៣ ដឹកនាំដោយលោកនាយប៉ុស្តិ៍ ថេង កុសល ចុះទៅបង្ក្រាប និងចាប់ខ្លួនបានទាំងសម្បុកតែម្ដង។
ប្រភពដដែលបានបន្តថា ខណៈនោះកម្លាំងនគរបាលបានធ្វើការដកហូតកាំភ្លើងខ្លីម៉ាកឡុក១ដើម ពីជនសង្ស័យឈ្មោះអៀងម៉េងហៀង ដែលជាអ្នកជួញដូរថ្នាំញៀន រួមជាមួយសម្ភារផ្សេងៗមួយចំនួនទៀត។ បន្ទាប់មកបាននាំទៅកាន់ប៉ុស្តិ៍ ដើម្បីសាកសួរមួយជំហ៊ាន មុននឹងបញ្ជូនបន្តទៅកាន់ផ្នែកព្រហ្មទណ្ឌនគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ