រាជធានីភ្នំពេញ ៖ បុរសជាកម្មករសំណង់ម្នាក់ត្រូវបានអ្នកជិតខាងប្រទះឃើញដេកស្លាប់បង្កឲ្យមានការភ្ញាក់ផ្អើលទាំងព្រឹក ហើយសង្ស័យថា គាត់មានជំងឺគាំងបេះដូង បន្ទាប់មកអ្នកជិតខាងក៏រាយការណ៍ជូននគរបាលប៉ុស្តិ៍ចោមចៅ៣ចុះទៅមើលភ្លាមៗដែរ។ ហេតុការណ៍នោះបានបង្កឲ្យមានការភ្ញាក់ផ្អើលកាលពីម៉ោង៨ព្រឹក ថ្ងៃទី៩ ខែ វិច្ឆិកា…
រាជធានីភ្នំពេញ ៖ បុរសជាកម្មករសំណង់ម្នាក់ត្រូវបានអ្នកជិតខាងប្រទះឃើញដេកស្លាប់បង្កឲ្យមានការភ្ញាក់ផ្អើលទាំងព្រឹក ហើយសង្ស័យថា គាត់មានជំងឺគាំងបេះដូង បន្ទាប់មកអ្នកជិតខាងក៏រាយការណ៍ជូននគរបាលប៉ុស្តិ៍ចោមចៅ៣ចុះទៅមើលភ្លាមៗដែរ។ ហេតុការណ៍នោះបានបង្កឲ្យមានការភ្ញាក់ផ្អើលកាលពីម៉ោង៨ព្រឹក ថ្ងៃទី៩ ខែ វិច្ឆិកា ឆ្នាំ២០១៩ នៅចំណុចបន្ទប់ផ្ទះជួល នៅក្នុងភូមិអូរដឹម សង្កាត់ចោមចៅ៣ ខណ្ឌពោធិ៍សែនជ័យ ។
បុរសរងគ្រោះខាងលើឈ្មោះស៊ិន រស់ អាយុ២១ឆ្នាំ មុខរបរកម្មករសំណង់ មានប្រពន្ធជាកម្មការិនីរោងចក្រកាត់ដេរ មានទីលំនៅក្នុងភូមិស្វាយទាប ឃុំចំការលើ ស្រុកស្វាយទាប ខេត្តកំពង់ចាម ។
តាមប្រភពព័ត៌មានបានឲ្យដឹងថា កាលពីល្ងាចថ្ងៃទី៨ ខែវិច្ឆិកា ខណៈពេលដែលប្រពន្ធចេញពីធ្វើការ បុរសរូបនេះបានជូនដំណើរប្រពន្ធឡើងរថយន្តទៅកាន់ស្រុកកំណើត ព្រោះប្រពន្ធត្រូវឈប់សម្រាកពីការងារនាឱកាសបុណ្យឯករាជ្យជាតិ និងបុណ្យអុំទូក។ ចំណែករូបគាត់ជាប្ដីមិនបានឈប់សម្រាកឡើយ គឺនៅធ្វើការងារ។ លុះជូនដំណើរប្រពន្ធរួច ក៏បានត្រឡប់ទៅកាន់ផ្ទះជួលវិញ ហើយបានផឹកស៊ីបន្តិចបន្តួច បន្ទាប់ពីហូបបាយល្ងាច រួចបុរសនេះបានចូលដេកជាធម្មតា។
ប្រភពដដែលបន្តឲ្យដឹងទៀតថា រហូតដល់ព្រឹកថ្ងៃកើតហេតុ ខណៈមិនឃើញបុរសរងគ្រោះក្រោក អ្នកជិតខាងក៏ចូលទៅដាស់ឲ្យក្រោកទៅធ្វើការ ស្រាប់តែប្រទះឃើញបុរសរូបនេះបានស្លាប់បាត់ទៅហើយ ទើបមានការភ្ញាក់ផ្អើលឆោឡោតែម្ដង។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅ៣ ចុះទៅមើលភ្លាមៗដែរ និងរាយការណ៍បន្តទៅកាន់នគរបាលការិយាល័យវិទ្យាសាស្ត្របច្ចេកទេសនៃស្នងការដ្ឋាននគរបាលរាជធានីភ្នំពេញ ចុះទៅធ្វើការពិនិត្យកោសល្យវិច័យ។ បន្ទាប់មកបានប្រគល់សាកសពទៅឲ្យក្រុមគ្រួសារនាំយកទៅធ្វើបុណ្យតាមប្រពៃណីនៅឯស្រុកកំណើត៕ (កែសម្រួលដោយ ៖ បុប្ផា)
ចែករំលែកព័តមាននេះ