រាជធានីភ្នំពេញ ៖ បែរចិញ្ចឹមត្រី និងផ្ទះទឹកអានាធិបតេយ្យរបស់ជនជាតិវៀតណាម នៅតាមដងទន្លេសាប ក្នុងភូមិដើមគរ សង្កាត់ជ្រោយចង្វារ ត្រូវបានអាជ្ញាធរខណ្ឌជ្រោយចង្វារ ប្រើវិធានការរដ្ឋបាល ដោយអូរចេញបញ្ច្រាស់ទឹកហូរ…
រាជធានីភ្នំពេញ ៖ បែរចិញ្ចឹមត្រី និងផ្ទះទឹកអានាធិបតេយ្យរបស់ជនជាតិវៀតណាម នៅតាមដងទន្លេសាប ក្នុងភូមិដើមគរ សង្កាត់ជ្រោយចង្វារ ត្រូវបានអាជ្ញាធរខណ្ឌជ្រោយចង្វារ ប្រើវិធានការរដ្ឋបាល ដោយអូរចេញបញ្ច្រាស់ទឹកហូរ ដោយប្តូរទីតាំងយកទៅដាក់សង្កាត់ព្រែកតាសេកវិញ ដោយអះអាងថា ដើម្បីរៀចំសណ្តាប់ធ្នាប់សម្រួលដល់ចំណតទូកង។
ទោះបីជាយ៉ាង ការរៀបចំសណ្តាប់ធ្លាប់សម្រាប់ចំណតទូកងនេះ ហាក់ដូចជាមានការយឺតយ៉ាវបន្តិច ខណៈដែលព្រះរាជពិធីបុណ្យអុំទូក បណ្តែតប្រទីប និងអកអំបុក សំពះព្រះខែ នឹងចូលមកដល់២ថ្ងៃទៀត ហើយទូកងមកបណ្តើៗហើយនោះ។
ការប្រើវិធានការរដ្ឋបាលនេះ បានធ្វើឡើងកាលពីម៉ោងប្រមាណ៨ព្រឹក ថ្ងៃទី០៨ ខែវិច្ឆិកា ឆ្នាំ ២០១៩ ដោយអាជ្ញាធរបានប្រើម៉ារីន សម្រាប់អូសចំនួន៣គ្រឿង ។ នៅព្រឹកនោះដែរ ដោយសារតែស្ថានភាពទឹកហូរខ្លាំងនៅពេលដែលអូរទាញ ក៏បណ្តាលឱ្យបែរខ្លះដាច់ក្រឡាប់លិចបាត់ បង្កឱ្យមានការប្រតិកម្មយ៉ាងខ្លាំងពីម្ចាស់ ដែលជាជនជាតិវៀតណាមផងដែរ។
តាមលោក កៅ សារ៉ាវុធ អភិបាលរងខណ្ឌជ្រោយចង្វារ បានអោយដឹងថា ការអូសផ្ទះទឹក បែរចិញ្ចឹមត្រីប្តូរទីតាំង ធ្វើឡើងតាមការណែកនាំរបស់រដ្ឋបាលរាជធានីភ្នំពេញ ដើម្បីរៀបចំសណ្តាប់ធ្លាប់នៅតាមដងទន្លេសាប សម្រួលដល់ចំណតទូកងមកឈប់ចតក្នុងព្រះរាជពិធីបុណ្យអុំទូក បណ្តែតប្រទីប និងអកអំបុកសំពះព្រះខែ ។ តាមការណែនាំ អាជ្ញាធរ បានតម្រូវអោយអូសបែរចិញ្ចឹមត្រី និងផ្ទះទឹកទាំងនោះ យកទៅដាក់នៅសង្កាត់ព្រែកតាសេក បណ្តោះអាសន្ន។
លោក អភិបាលរង បានអោយដឹងទៀតថា មុននឹងប្រើវិធានការណ៍រដ្ឋបាលអាជ្ញាធរ ក៏បានជួនដំណឹងដល់ម្ចាស់បែរចិញ្ចឹមត្រី និងផ្ទះទឹកទាំងនោះចំនួន៣ដងអោយប្តូរទីតាំង តែម្ចាស់មិនស្តាប់តាមការណែនាំ អូសយកចេញដោយខ្លូនឯងនោះទេ ទើបអាជ្ញាធរចុះមកអូសចេញតែម្តង ។ តាមព័ត៌មានអោយដឹងទៀតថា នៅព្រឹកនោះអាជ្ញាធរ មានការលំបាកក្នុងការអូរបំលាស់ទីផ្ទះទឹក និងបែរចិញ្ចឹមត្រីទាំងនោះ ព្រោះអូសបញ្ច្រាស់ទឹកហូរខ្មួលខ្មាញ់។
បើតាមលោកច្រឹង យ៉ាំងធី ភេទប្រុស អាយុ៧២ឆ្នាំ ជនជាតិវៀតណាម ជាម្ចាស់បែរចិញ្ចឹមត្រីបានអោយដឹងថា រយៈពេលប្រមាណ១ខែមកហើយ ដែលអាជ្ញាធរបានជួនដំណឹងអោយម្ចាស់បែរ និងផ្ទះទឹកទាំងអស់អូរចេញដោយអះអាងថា រៀបចំអោយទូកងចត។ ដោយសារតែស្ថានភាពទឹកហូរខ្លាំង ពួកគាត់មិនអាចអូរបែរកើតនោះទេ ព្រោះអាចប្រឈមមុខនឹងទឹកហូរបោករងការខូចខាត។
ម្ចាស់បែររូបនោះបានអោយដឹងទៀតថា លោកមិនជំទាស់នឹងអាជ្ញាធរនោះទេ សូមពន្យារពេលដល់បុណ្យចូលចិនហើយ ទើបទឹកស្រក លែងហូរ ហើយអាចចល័តទីតាំងបែរបានស្រួល។ ម្ចាស់បែរបានបន្តទៀតថា គាត់មានការលំបាក់ក្នុងការរស់នៅ ការបំលាស់ទីតាំងទៅកន្លែងផ្សេងៗត្រូវបានគេដេញចុះឡើង។
តាមអាជ្ញាធរខណ្ឌជ្រោយចង្វារ បានអោយដឹងថា ផ្ទះទឹក និងបែរចិញ្ចឹមត្រីទាំងអស់ ដែលតម្រូវអោយអូសចេញ មានចំនួន ៧៣ ផ្ទះទឹក និងបែរចិញ្ចឹមត្រី។
គួរបញ្ជាក់ថា បែរចិញ្ចឹមត្រីនិងផ្ទះទឹកនោះ មួយចំនួនទើបតែបម្លាស់ទីចេញពីទន្លេសាប នៅខេត្តកំពង់ឆ្នាំង ហើយបានមកចតនៅច្រាំងទន្លេសាប នៅភូមិដើមគរនេះ កាន់តែច្រើនឡើង។មិនថា តែនៅខណ្ឌជ្រោយចង្វារ នោះទេ នៅខណ្ឌឬស្សីកែវ និងខណ្ឌព្រែកព្នៅ ផ្ទះទឹក និងបែរចិញ្ចឹមត្រីមកតាំងទីលំនៅលើទឹកយ៉ាងអានាធិបតេយ្យកាន់តែច្រើន៕ (កែសម្រួលដោយ ៖ បុប្ផា)
ចែករំលែកព័តមាននេះ