រាជធានីភ្នំពេញ ៖ ថ្វីដ្បិតទើបតែមានមុខឡើងប្រកួតបានមួយប្រាវប៉ុណ្ណោះ ប៉ុន្តែកីឡាករវ័យក្មេង រិទ្ធិ តូលូ ត្រូវបានគេលើកឲ្យឡើងប្រកួតក្នុងនាមជាគូអន្តរជាតិហើយ ដែលនេះគឺជាអ្វីដែលកីឡាកររូបនេះប្រាប់ថាស្រមៃជាយូរមកហើយ ។
កីឡាករថៃ Aram Boy ត្រូវបានគេដាក់ឲ្យ ប្រកួតស្ទាបស្ទង់មើលសមត្ថភាព ។ អ្នកទាំងពីរនឹងប៉ះគ្នានៅល្ងាចថ្ងៃសៅរ៍ទី៩ ខែវិច្ឆិកា នៅក្នុងព្រឹត្តិការណ៍ TV5 Knock Out Serie by K-
Cement ក្នុងពេលដែលការប្រកួតជើងឯករដូវ កាលទី៦នេះ ស្ថិតក្នុងដំណាក់កាលជម្រុះពី១៦នាក់យក៨នាក់ សម្រាប់ជំហានបន្ត ។
កីឡាករកម្ពុជាដែលជាជើងខ្លាំងឡើងកូដ ត្រូវបានគេចាប់អារម្មណ៍ហួសប្រមាណ ក្រោយពីមានការប្រកាសថា តម្រូវឲ្យស្វាគមន៍ជើងខ្លាំងមកពីប្រទេសថៃ Aram Boy ដែលអ្នកណាៗក៏ស្គាល់ថាជាជើងខ្លាំង ធ្លាប់ប្រកួតឈ្នះកីឡាករកម្ពុជាកន្លង មក ។ វត្តមានកីឡាករទាំងកម្ពុជានិងថៃ ក្នុងសប្ដាហ៍នេះ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈមិត្តភាពក្នុងស្រុកនោះទេ ពិតជាធ្វើឲ្យអ្នកស្នេហាកីឡាប្រដាល់ មានការចាប់អារម្មណ៍ ជាពិសេសគឺវត្តមានរបស់ កីឡាករ រិទ្ធិ តូលូ ធ្វើឲ្យមានការចាប់អារម្មណ៍យ៉ាងខ្លាំង ដោយសារតែគេកំពុងឡើងកូដ ។
សមាសភាពគូអន្តរជាតិនេះ ត្រូវបានគេអះអាងថា មានការសម្រាំងយ៉ាងពិសេស ដើម្បីឲ្យអ្នកទស្សនាកាន់តែកន្ត្រាក់អារម្មណ៍ ក្នុងពេលដែលសប្ដាហ៍នេះគឺជាសប្ដាហ៍ដែលតម្រូវឲ្យអ្នកមានឈ្មោះក្នុងការប្រកួតជ្រើសរើសជើងឯកទាំង១៦រូប ប្រកួតជម្រុះយក៨រូប ដើម្បីបន្តយកអ្នកឈ្នះ៨រូបទៅប្រកួតយក៤រូប នៅជុំទី៣បន្តទៀត ។
លោក សេង កដិកា អ្នករៀបចំការប្រកួតបញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ រិទ្ធិ តូលូ ដោយសារតែគេគឺជាជើងខ្លាំង ហើយបើទោះ
ជាមិនសូវមានបទពិសោធន៍ច្រើននៅក្នុងការប្រកួតជាអន្តរជាតិកន្លងមក ប៉ុន្តែសមត្ថភាពគេល្អលោកពេញចិត្ត ។ ម្យ៉ាង មកពីលោកចង់លើកមុខម្ចាស់ពានផង ទើបសម្រេចដាក់ឲ្យប្រកួតជាលក្ខណៈអន្តរជាតិ ដើម្បីឲ្យកាន់តែទទួលបានការចាប់អារម្មណ៍នៅក្នុងកីឡាប្រដាល់ ។
វត្តមានរបស់កីឡាករ Aram Boy លោកចង់ផ្ដល់ឱកាសឲ្យ រិទ្ធិ តូលូ ដោយសារតែអ្នកទាំងពីរសុទ្ធតែជាជើងខ្លាំងដូចគ្នា ទើបលោកហ៊ានសម្រេចផ្គូផ្គង បើទោះជាអ្នកគាំទ្រភាគច្រើនថាកីឡាករកម្ពុជារូបនេះ អាចនឹងពិបាកទប់កីឡាករថៃ ព្រោះគេគ្រាន់តែជាជើងថ្មី ។ លោកបានកំណត់ឲ្យកីឡាករកម្ពុជាហ្វឹកហាត់ជាប់លាប់មិនតិចជាង១សប្ដាហ៍ទេ មុនពេលផ្គូផ្គង ទើបលោកយល់ថាសមត្ថភាពកីឡាករកម្ពុជារូបនេះ គ្រប់គ្រាន់សម្រាប់ឲ្យស្ថានីយទូរទស្សន៍ប៉ុស្តិ៍លេខ៥ដាក់ឲ្យប្រកួតជាលក្ខណៈអន្តរជាតិ នៅថ្ងៃសៅរ៍ទី៩ ខែវិច្ឆិកា ។
លោក សេង កដិកា ថ្លែងថា កីឡាករកម្ពុជានិងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងៗខ្លួន និងមិនចង់បាត់បង់ក្រេឌីត
ក្រោយពេលប៉ះគ្នា ។ គូនេះមានការចាប់អារម្មណ៍ភាគច្រើន ដោយរំពឹងថានឹងមានអ្នកស្នេហាកីឡាប្រដាល់ជក់ចិត្ត និងចង់ដឹងពីបទពិសោធន៍អ្នកទាំងពីរនៅពេលប៉ះគ្នា ។
លោក សេង កដិកា បន្តថា ជំនួបជាលក្ខណៈអន្តរជាតិដែលធ្វើឡើងនៅសង្វៀនស្ថានីយទូរ
ទស្សន៍ប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឲ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២រូប លោកជឿជាក់ថានឹងកក្រើក ដោយសារកីឡាករថៃលោកស្គាល់ថ្វីដៃច្បាស់ហើយថា មិនធម្មតា ហើយសម្រាប់កីឡាករកម្ពុជាវិញ ក៏ល្អស្ថិតក្នុងទំនុកចិត្តរបស់លោកតាំងពីមុនផ្គូផ្គង ៕ (កែសម្រួលដោយ ៖ បុប្ផា)
ចែករំលែកព័តមាននេះ