នាំអំណោយផ្តល់ជូនកងរាជអាវុធហត្ថរាជធានីភ្នំពេញ

ថ្ងៃទី ០៧ ខែ វិច្ឆិកា ឆ្នាំ ២០១៩

ម៉ោង ១៥:៥៧

រាជធានីភ្នំពេញ ៖ ក្រោមការចង្អុលបង្ហាញពីលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច នៅរសៀលថ្ងៃទី៦ ខែវិច្ឆិកា ឆ្នាំ២០១៩ លោកជំទាវ កង ណែម និងក្រុមហ៊ុនមេធាវី អេស.វី.ភី ដឹកនាំដោយលោក លី ច័ន្ទតុលា បានអញ្ជើញចុះដល់បញ្ជាការដ្ឋានកងរាជអាវុធហត្ថរាជធានីភ្នំពេញ ដោយនាំយកអំណោយផ្តល់ជូនដល់កងរាជអាវុធហត្ថរាជធានីភ្នំពេញ ដើម្បីចូលរួមគាំទ្រ និងអបអរសាទរក្នុងឱកាសបុណ្យឯករាជ្យជាតិ និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក ដែលនឹងឈានមកដល់នាពេលខាងមុខនេះ ។

អំណោយទាំងអស់ខាងលើរួមមាន ថវិកាចំនួន៧.០០០ដុល្លារ (ប្រាំពីរពាន់ដុល្លារអាមេរិក), ទឹកបរិសុទ្ធចំនួន១០០កេស, ទឹកផ្លែឈើចំនួន៥០កេស, មីចំនួន៦០កេសតូច ស្មើ១០កេសធំ, ត្រីងៀតចំនួន១៥គីឡូក្រាម, សាច់ក្រកចំនួន១០គីឡូក្រាម, ផ្លែសារីចំនួន៥កេស, ផ្លែទន្លាប់ចំនួន៥កេស, ទឹកស៊ីអ៊ីវ-ទឹកត្រីចំនួន៥០យួរ, ជ្រក់ឆៃថាវ, ជ្រក់ត្រសក់ចំនួន២០ គីឡូក្រាម និងប៊ីចេងមួយការ៉ុង ស្មើនឹងទម្ងន់៥០គីឡូក្រាម ។

ក្នុងឱកាសនោះផងដែរ លោកជំទាវ កង ណែម និងក្រុមមេធាវី លី ច័ន្ទតុលា ត្រូវបានទទួលស្វាគមន៍យ៉ាងកក់ក្តៅពីសំណាក់លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធ ហត្ថលើផ្ទៃប្រទេស នឹងជាមេបញ្ជាការកងរាជអាវុធហត្ថរាជធានីភ្នំពេញ បានដើរទស្សនា ហេដ្ឋារចនាសម្ព័ន្ធ កងរាជអាវុធហត្ថរាជធានីភ្នំពេញមួយចំនួន ដែលកងរាជអាវុធហត្ថរាជធានីភ្នំពេញសម្រេចបាននាពេលកន្លងមក ៕ (កែសម្រួលដោយ ៖ ធីតា)