ប្រទេសស៊ីលី ៖ បាតុកម្មតវ៉ាសង្គមដែលមានរយៈពេលចាប់ពីជិត៣សប្ដាហ៍មកហើយនៅស៊ីលី បណ្ដាលឲ្យមនុស្សស្លាប់២០នាក់រួចហើយ នាថ្ងៃទី៦វិច្ឆិកា បានរាលដានដល់បណ្ដាសង្កាត់ពាណិជ្ជកម្មក្នុងរដ្ឋធានីសាន់ត្យាហ្គោ ។ មនុស្សច្រើនរយនាក់ភាគច្រើនជាយុវជនបានលើកគ្នាទៅកាន់ច្រកចូល នៃមជ្ឈមណ្ឌលពាណិជ្ជកម្មCOSTANERA CENTER…
ប្រទេសស៊ីលី ៖ បាតុកម្មតវ៉ាសង្គមដែលមានរយៈពេលចាប់ពីជិត៣សប្ដាហ៍មកហើយនៅស៊ីលី បណ្ដាលឲ្យមនុស្សស្លាប់២០នាក់រួចហើយ នាថ្ងៃទី៦វិច្ឆិកា បានរាលដានដល់បណ្ដាសង្កាត់ពាណិជ្ជកម្មក្នុងរដ្ឋធានីសាន់ត្យាហ្គោ ។
មនុស្សច្រើនរយនាក់ភាគច្រើនជាយុវជនបានលើកគ្នាទៅកាន់ច្រកចូល នៃមជ្ឈមណ្ឌលពាណិជ្ជកម្មCOSTANERA CENTER ជាមជ្ឈមណ្ឌលពាណិជ្ជកម្មធំជាងគេបំផុត នៅអាមេរិកខាងត្បូងដើម្បីតវ៉ាប្រឆាំងការកែទម្រង់សង្គមរបស់រដ្ឋាភិបាល ប្រធានាធិបតីលោកSEBASTIAN PINERA។ រាំងខ្ទប់ដោយកងកម្លាំងប៉ូលិស ពួកបាតុករបានរាយគ្នានៅតាមកន្លែងផ្សេងៗនៃសង្កាត់ប្រូវីដេនស្យា ចូលក្នុងតំបន់ហិរញ្ញវត្ថុព្រមទាំងតំបន់ សម្បូរអ្នកមាននៃរដ្ឋធានី។
ការប៉ះទង្គិចគ្នានានាជាមួយប៉ូលិសកើតមាន ពេលឱសថស្ថានមួយនិងទីភ្នាក់ងារធនាគារ២រងការលុកចូលប្លន់និងបំផ្លាញ ហើយទីតាំងអចលនទ្រព្យមួយរងការបំផ្លាញ។ ចៅសង្កាត់ប្រូវីដេនស្យាលោកអ៊ីវីលីនម៉ាថៃនិយាយថា យើងជួបប្រទះកម្រិតនៃអំពើហិង្សានិងការបំផ្លិចបំផ្លាញ ដែលពុំធ្លាប់ជួបប្រទះសោះពីមុនមក។ ចំណែកមនុស្សច្រើនពាន់នាក់ក៏ប្រមូលផ្ដុំគ្នាដែរនៅទីលានប្លាហ្សាអីុតាលីយ៉ា ជាទីលានសំខាន់នៃការតវ៉ាតាំងពីចាប់ផ្ដើមចលនាបាតុកម្មមក រួចឧប្បត្តិហេតុដាច់ដោយឡែកពីគ្នានានាបានផ្ទុះឡើង។
ម្យ៉ាងវិញទៀតក្នុងសង្កាត់រេនកា នាភាគខាងជើងក្រុងសាន់ត្យាហ្គោមនុស្សប្រមាណជា២០នាក់បានវាយប្រហារ ទីតាំងប៉ូលិសមួយបណ្ដាលឲ្យប៉ូលិស៥នាក់រងរបួស ហើយបណ្ដាអ្នកបើករថយន្ត បានលើកគ្នាយករថយន្តរាំងខ្ទប់ផ្លូវថ្នល់ទាំងឡាយ។
បាតុកម្មនានាដែលចាប់ផ្ដើមពីថ្ងៃទី១៨តុលាមក ជាមួយការប្រកាសពីការដំឡើងថ្លៃសំបុត្រជិះមេត្រូ ដែលបន្ទាប់មកលុបចោលវិញ បានបន្តរាលដាលមកទល់បច្ចុប្បន្ន ទាមទារឲ្យប្រធាធិបតីលាលែងចេញពីតំណែង៕ (កែសម្រួលដោយ ៖ បុប្ផា)
ចែករំលែកព័តមាននេះ