ចៅភ្លោះប្រុស៣នាក់សម្ដេចតេជោប្រសូត្រនៅមណ្ឌលសុខភាពពាមជីលាំង
- កំពង់ចាម
ខេត្តកំពង់ចាម ៖ កូនភ្លោះ៣របស់សម្ដេចតេជោ ហ៊ុន សែន បានប្រសូត្រនៅមណ្ឌលសុខភាពពាមជីលាំង ឃុំពាមជីលាំង ស្រុកត្បូងឃ្មុំ ខេត្តត្បូងឃ្មុំ នារសៀលថ្ងៃទី០៦…
ខេត្តកំពង់ចាម ៖ កូនភ្លោះ៣របស់សម្ដេចតេជោ ហ៊ុន សែន បានប្រសូត្រនៅមណ្ឌលសុខភាពពាមជីលាំង ឃុំពាមជីលាំង ស្រុកត្បូងឃ្មុំ ខេត្តត្បូងឃ្មុំ នារសៀលថ្ងៃទី០៦ វិច្ឆិកានេះ ។ ដោយសារតែសុខភាពរាងខ្សោយនោះកូនភ្លោះទាំង៣ត្រូវបានជីដូនបង្កើតបានប្រញាប់យកមកសង្គ្រោះដាក់ចិញ្ចឹមនៅក្នុងកែវវិទ្យាសាស្ត្រ ក្នុងមន្ទីរពេទ្យខេត្តកំពង់ចាម ។
ស្ត្រីឈ្មោះ ផៃ ដានី អាយុ៣០ឆ្នាំ រស់នៅក្នុងឃុំពាមជីលាំង ប្រាប់ឲ្យដឹងនៅព្រឹកថ្ងៃទី០៧ វិច្ឆិកានេះថា ក្នុងពេលដែលប្អូនស្រីឈ្មោះ ផៃ ធារី អាយុ២៧ឆ្នាំ ក្នុងគ្រាដែលមានផ្ទៃពោះ ៥ ទៅ៦ខែបានទៅពិនិត្យអេកូមើលនៅកំពង់ឬស្សីក្នុងឃុំរកាពប្រាំ ស្រុកត្បូងឃ្មុំ ដោយឃើញកូនភ្លោះចំនួន២នាក់ តែមិនច្បាស់ថា៣នាក់ សូមឲ្យតាមដានបន្ថែម ។
ស្ត្រីឈ្មោះផៃ ដានី បានប្រាប់បន្តថា រហូតមកដល់វេលាម៉ោង២និង៣០នាទីរសៀល ថ្ងៃទី០៦ វិច្ឆិកានេះ ប្អូនស្រីរបស់គាត់បានប្រសូត្រកូនភ្លោះប្រុស៣នាក់ ក្នុងនោះកូនបងគេទម្ងន់ 1.50kg ទីពីរទម្ងន់1.50kg និងទីបីទម្ងន់ 1.95kg ដោយសារតែសុខភាពរបស់ក្មួយភ្លោះទាំង ៣រាងខ្សោយក៏ប្រញាប់ដឹកមកសង្គ្រោះដាក់ចិញ្ចឹមក្នុងកែវវិទ្យាសាស្ត្រនៅមន្ទីរពេទ្យខេត្តកំពង់ចាម ក្រោមការយកចិត្តទុកដាក់របស់គ្រូពេទ្យរហូតមកដល់ព្រឹកថ្ងៃទី០៧ វិច្ឆិកាធ្វើឲ្យសុខភាពរបស់ក្មួយភ្លោះទាំង៣ ប្រសើរបន្តិច ។
ក្នុងពេលដែលប្អូនស្រីមានផ្ទៃពោះក៏បានយល់សប្តិឃើញគេឲ្យកងដៃចំនួន៣ នោះពេលដែលប្រសូត្រកូនមកបានភ្លោះបីនាក់ ។ ប្អូនស្រីដែលត្រូវជាម្ដាយរបស់កូនភ្លោះមិនបានមកសម្រាកនៅមន្ទីរពេទ្យខេត្តកំពង់ចាមលោកទេ ដោយសារតែបញ្ហាសុខភាពចុះខ្សោយ គឺសម្រាកនៅឯផ្ទះ ដោយមានប្ដីមើលថែរក្សា ។
អ្នកស្រីធីម ថា អាយុ៥២ឆ្នាំ ត្រូវជាជីដូនបង្កើតរបស់កូនភ្លោះបីនាក់បានប្រាប់ឲ្យដឹងថា ក្នុងពេលដែលកូនស្រីរបស់គាត់បានប្រសូត្រនៅមណ្ឌលសុខភាពពាមជីលាំង ភ្លាមៗនោះគាត់មិនបានមកនោះទេ ។ បន្ទាប់មកទៀតពេលដែលដឹងថា បានកូនភ្លោះ៣ ហើយសុខភាពរបស់ចៅមិនសូវធានាប៉ុន្មាននោះទេ ។ ក៏ប្រញាប់ធ្វើដំណើរមកឃុំពាមជីលាំង ស្រុកត្បូងឃ្មុំ រួចក៏យកចៅប្រុសទាំង៣នាក់មកសង្គ្រោះនៅមន្ទីរពេទ្យខេត្តកំពង់ចាម ។
ជីដូនរូបនេះបានបញ្ជាក់ថា កាលពីមុនគាត់ធ្លាប់ប្រសូត្របានកូនភ្លោះ៣ដែរ ក្នុងនោះកូនបង និងពៅបានស្លាប់បាត់ទៅហើយ នៅសល់តែកូនកណ្ដាល សព្វថ្ងៃអាយុ ៣២ឆ្នាំហើយដែលជាអ្នកមើលថែរក្សារូបគាត់ (ធីម ថា) នៅឃុំឈូក ស្រុកក្រូចឆ្មារ ។
ជាចុងក្រោយគាត់ក៏លើកដៃម្រាមដប់សំពះអង្វរដល់សម្ដេចតេជោហ៊ុន សែន និងសម្ដេចគតិព្រឹទ្ធបណ្ឌិតប៊ុន រ៉ានី-ហ៊ុន សែន សូមមេត្តាជួយសង្គ្រោះចៅភ្លោះទាំងបីនាក់របស់គាត់ ឱ្យបានរស់ផង គាត់មានជំនឿយ៉ាងមុតមាំថា សម្ដេច និងជួយដល់ចៅទាំងបីនាក់ព្រោះកន្លងមកសម្ដេចបានចាត់ទុកថា ឲ្យតែប្រជាពលរដ្ឋកម្ពុជាប្រសូត្របានបុត្រ៣ គឺសម្ដេចបានចាត់ទុកថា ជាចៅរបស់សម្ដេច ។
បើតាមគ្រូពេទ្យខេត្តកំពង់ចាមវិញប្រាប់ថា កូនភ្លោះ៣នាក់នេះ ប្រសូត្រមិនគ្រប់ខែដោយម្ដាយមានផ្ទៃពោះជាង៨ខែក៏ប្រសូត្រនេះអាចធ្វើឱ្យសុខភាពរបស់កូនមិនសូវល្អ តែទោះបីជាយ៉ាងណាក៏ដោយគ្រូពេទ្យ និងប្រឹងថែទាំសង្គ្រោះដល់កូនភ្លោះទាំងបី ៕ កែសម្រួលដោយ ៖ សុឃាក់
ចែករំលែកព័តមាននេះ