ADផ្ទាំងផ្សព្វផ្សាយពាណិជ្ជកម្ម

Picture

ភូមិ​សិប្បកម្ម​មឈូស ​និង​មេន​សម្រាប់​អ្នក​ក្រីក្រ

4 ឆ្នាំ មុន
  • ភ្នំពេញ

ខេត្តតាកែវ ៖ អ្នក​ភូមិ​បឹង​លា​ច ឃុំ​ចំបក់ ស្រុក​បាទី ខេត្តតាកែវ មិនមែន​មាន​តែ​មុខរបរ​ជួល​មេន​(​មេរុ​)​សម្រាប់​បូជាសព​មួយ​មុខ​ទេ គឺ​មាន​សិប្បកម្ម​ធ្វើ​មឈូស​លក់​សម្រាប់​ជន​ខ្សត់ខ្សោយ​ក្នុងភូមិ ក៏​ដូច​ជា​តាម​បណ្តា​ស្រុក និង​ខេត្ត​នានា​ផង​ដែរ…

ខេត្តតាកែវ ៖ អ្នក​ភូមិ​បឹង​លា​ច ឃុំ​ចំបក់ ស្រុក​បាទី ខេត្តតាកែវ មិនមែន​មាន​តែ​មុខរបរ​ជួល​មេន​(​មេរុ​)​សម្រាប់​បូជាសព​មួយ​មុខ​ទេ គឺ​មាន​សិប្បកម្ម​ធ្វើ​មឈូស​លក់​សម្រាប់​ជន​ខ្សត់ខ្សោយ​ក្នុងភូមិ ក៏​ដូច​ជា​តាម​បណ្តា​ស្រុក និង​ខេត្ត​នានា​ផង​ដែរ ។

អ្នកស្រី​យ៉ង សា​មឺ​ឌី អាយុ​៣៥​ឆ្នាំ ជា​ម្ចាស់​សិប្បកម្ម​ធ្វើ​មឈូស​បាន​រៀបរាប់​ឲ្យ​ដឹង​កាលពី​ពេល ថ្មី​ៗ​កន្លង​មក​ថា អ្នកស្រី និង​ស្វាមី​បាន​ចាប់​យកមុខ​របរ​ធ្វើ​មឈូស​លក់​អស់​រយៈពេល​ជា​ច្រើន​ឆ្នាំ​មក​ហើយ ។ ក្នុង​មួយ​ថ្ងៃ​ធ្វើ​មឈូស​បាន​ពី​១០​ទៅ​២០​គ្រឿង ហើយ​ក្នុង​មួយ​ខែ​លក់​មឈូស​ឲ្យ​ម៉ូយ​តាម​បណ្តាល​ខេត្ត និង​នៅ​ក្នុង​ខេត្តតាកែវ​មិន​តិច​ពី​៧០​ទៅ​៩០​មឈូស​ទេ ។ ម៉ូយ​ទិញ​មឈូស​តាម​ខេត្ត​មាន​ដូច​ជា ខេត្តព្រៃវែង កណ្តាល សៀមរាប ស្វាយ​រៀង កំពង់ស្ពឺ …​។ ពួក​គេ​ទិញ​យក​ទៅ​លក់​បន្ត​លក់​ឲ្យ​ម៉ូយ ក្នុង​មឈូស​មួយ​តែ​១០​ម៉ឺន​រៀល​ប៉ុណ្ណោះ ហើយ​លក់​ឲ្យ​អ្នក​ជួល​មេន​ក៏​តម្លៃ​ប៉ុណ្ណឹង​ដែរ ។ មាន​ពេល​ខ្លះ​រកម​ឈូស​លក់​ឲ្យ​មិន​បាន​ផង ដោយសារ​ខ្វះ​គ្រឿង​ឈ ។ ក៏​មាន​មឈូស​សម្រាប់​អ្នក​ធូរធារ​ដែរ​តម្លៃ​៦០​ម៉ឺន​រៀល​តែ​ក្នុង​មួយ​ខែល​ក់បាន​២ ឬ​៣​ប៉ុណ្ណោះ ។

លោក​ចឹក សា​ម៉​ន អាយុ​៥០​ឆ្នាំ ឲ្យ​ដឹង​ថា គាត់​ចាប់​អាជីព​ធ្វើ​មឈូស​លក់​នេះ​ប្រហែល​២០​ឆ្នាំ​មក​ហើយ មុខរបរ​នេះ​មិន​អាច​ឲ្យ​គ្រួសារ​ធ្វើ​អ្នកមាន​មែន តែ​វា​ជួយ​សម្រួល​ដល់​ជីវភាព​រស់នៅ​ប្រចាំ​ថ្ងៃ ។ គាត់​លក់​មឈូស​មួយ​១០​ម៉ឺន​រៀល តែបើ​ជួប​អ្នក​ខ្វះខាត​ខ្លាំង​មិន​យក​លុយ​ទេ​ចាត់​ទុកដូចជា​ធ្វើបុណ្យ​ទៅ​ចុះ ។

នៅ​ក្នុងភូមិ​បឹង​លា​ច​នា​ពេល​បច្ចុប្បន្ន​នេះ​ក៏​មាន​អ្នក​ធ្វើ​មេន​លក់​ដែរ តម្លៃ​មួយ​៥៥០០​ដុល្លារ ហើយ​ទាល់តែ​គេ​កុម្ម៉ង់​ឲ្យ​ធ្វើ​ទើប ព្រោះ​បោះទុន​ធំ​ពេក​មិនមែន​ចេះ​តែ​ធ្វើ​ទុក​មុន​ឡើយ ។ ក្នុង​មេន​មួយ​ចំណាយ​អស់​ពេល​មិន​តិច​ពី​១៥​ថ្ងៃ​ទៅ​២០​ថ្ងៃ​នោះ​ទេ ។ ចំណែក​ទីតាំង​ធ្វើ​មឈូស​កម្រិត​អ្នកក្រ​ខ្សត់​ទិញ​នេះ​មិន​ក្រោម​ពី​២០​ទីតាំង​ទេ ក្នុងភូមិ​បឹង​លា​ច ។

លោកយាយ​សាន ក្នុង​វ័យ​ជាង​៧០​ឆ្នាំ បាន​រំឭក​ថា គ្រួសារ​គាត់​ជា​អ្នក​ប្រកប​មុខរបរ​ជួល​មេន​មុនគេ​បង្អស់ គឺ​ក្នុងភូមិ​បឹង​លា​ច​មាន​តែ​មេន​គាត់​មួយ​ប៉ុណ្ណោះ ក្នុង​មួយ​ខែ​មេន​គាត់​រវល់​រហូត​។ ក្រោយមក​ទើប​មាន​អ្នក​ភូមិ​ដូច​គ្នា​ចាប់​យក​អាជីព​នេះ​បន្ត​គ្នា​រហូត​ដល់​កើន​អ្នក​ធ្វើ​មេន​ជួល​មិន​ក្រោម​ពី​៦០​ទៅ​៧០​មេន​ទេ ។

លោកយាយ​សាន ដកដង្ហើម​ធំ បញ្ជាក់​ថា ៖ ឥឡូវ​គាត់​ចាស់​ហើយ​ទុក​ឲ្យ​កូនចៅ​ជំនាន់​ក្រោយ​គេ​ធ្វើ​ម្តង​ចុះ ហើយ​មុខរបរ​នេះ​វា​ជា​មុខរបរ​សុចរិត​សម្រាប់​អ្នក​ភូមិ​បឹង​លា​ច ។

សមាជិក​ក្រុមប្រឹក្សា​ឃុំ​ចំបក់​ឲ្យ​ដឹង​ថា នៅ​ភូមិ​បឹង​លា​ច​នា​ពេល​បច្ចុប្បន្ន​ប្រជាពលរដ្ឋ​ធ្វើ​មឈូស ធ្វើ​មេន​លក់ និង​ជួល​មេន​កាន់តែ​កើនឡើង ម្យ៉ាងទៀត​ដើម្បី​ជួយ​ទប់ទល់​ជីវភាព​គ្រួសារ​របស់​ពួក​គេ​ក្រោយ​ពី​ការ​ធ្វើស្រែ ។ បើ​និយាយ​ពីមុខ​របរ​ជួល​មេន ឬ​គេ​ហៅ​ថា​«​ស៊ី​ឈ្នួល​បូ​ជា​សព​»​នា​ពេល​នេះ​មិន​ក្រោម​ពី​៧០​គ្រួសារ​នោះ​ទេ ៕ (​កែសម្រួល​ដោយ ៖ បុប្ផា​)

អត្ថបទសរសេរ ដោយ

កែសម្រួលដោយ