រាជធានីភ្នំពេញ ៖ ក្នុងចំណោមកីឡាការិនីផ្នែកប្រដាល់ ដែលបានឡើងកូដនៅក្នុងពិភព ប្រដាល់ គេបានកត់សម្គាល់ថា កីឡាការិនីជម្រើសជាតិកម្ពុជា នៅ ស្រីពៅ ដែលកំពុងហ្វឹកហាត់នៅ…
រាជធានីភ្នំពេញ ៖ ក្នុងចំណោមកីឡាការិនីផ្នែកប្រដាល់ ដែលបានឡើងកូដនៅក្នុងពិភព ប្រដាល់ គេបានកត់សម្គាល់ថា កីឡាការិនីជម្រើសជាតិកម្ពុជា នៅ ស្រីពៅ ដែលកំពុងហ្វឹកហាត់នៅ ប្រទេសជប៉ុនដើម្បីត្រៀមប្រកួតកីឡាស៊ីហ្គេមនាចុងឆ្នាំនេះ ទទួលបាននូវការសរសើរមិនដាច់ពីមាត់ ។
កីឡាការិនីជើងខ្លាំងមួយរូបសញ្ជាតិឥណ្ឌូណេស៊ី បានសរសើរកីឡាការិនីកម្ពុជារូបនេះនៅក្នុងបណ្ដាញសារព័ត៌មានបរទេស ដែលធ្វើឲ្យគេ មើលឃើញថា នៅ ស្រីពៅ មិនត្រឹមតែមានសមត្ថ ភាពខ្លាំងក្នុងរង្វង់កីឡាការិនីក្នុងស្រុកប៉ុណ្ណោះទេ តែនាងក៏ត្រូវបានគូប្រកួតដែលធ្លាប់ស្គាល់ថ្វីដៃ ទទួលស្គាល់ថាជាធនធានល្អរបស់កម្ពុជា ដែលមិនអាចមើលរំលងផងដែរ ។
នៅលើបណ្ដាញសារព័ត៌មានមួយចំនួនបានផ្សព្វផ្សាយថា កីឡាការិនីជើងចាស់ឥណ្ឌូណេស៊ី Priscilla Hertati Lumban Gaol ដែលមានវ័យចំណាស់តែនៅតែល្បីនិងខ្លាំង បានអះអាងថា នៅ ស្រីពៅ គឺជាកីឡាការិនីកម្ពុជាដែលមិនសរសើរមិនបាន ។ ការលើកសរសើរនេះ បន្ទាប់ពីស្រីពៅ ចាញ់ក្រោមកណ្ដាប់របស់ Priscilla កាលខែដើមឧសភា ហើយបន្តឈ្នះកីឡាការិនី
មីយ៉ាន់ម៉ា Bozhena Antoniyar កាលពីថ្ងៃទី ២៥ ខែតុលាកន្លងទៅ ក្នុងកម្មវិធី ONE:
DAWN OF VALOR ដែលធ្វើឲ្យមានការវិភាគថា នៅ ស្រីពៅ ដ្បិតថាបរាជ័យខ្លះ ឈ្នះខ្លះ មិនបានលទ្ធផលល្អគ្រប់សង្វៀន តែនាងជាកីឡាការិនីល្អម្នាក់ ។
ការសរសើររបស់កីឡាការិនីឥណ្ឌូណេស៊ី មិនមែនចេះតែកើតមានឡើងនោះទេ ជាពិសេសប្រ សិនបើគូប្រកួតរបស់កីឡាការិនីរូបនេះមិនមានចំណុចនាំមុខ ។ ម្យ៉ាង នៅក្នុងពិភពប្រដាល់ កីឡាការិនី Priscilla Hertati Lumban Gaol ដែលបច្ចុប្បន្នមានអាយុ៣១ឆ្នាំទៅហើយនោះ
នៅតែបង្ហាញក្បាច់គុនទាក់ភ្នែក និងទទួលបាន ការគាំទ្រច្រើនពីសំណាក់អ្នកគាំទ្រឥណ្ឌូណេស៊ី។
Priscilla ជាកីឡាការិនីម្នាក់មានក្បាច់គុនបាតវូស៊ូ បន្ទាប់ពីហ្វឹកហាត់តាំងពីអាយុ១៧ឆ្នាំ មក ។ កីឡាការិនីមកពីក្លិប Siam Tigershark រូបនេះ បានចុះហត្ថលេខាប្រកួតជាផ្លូវការឲ្យ សង្វៀន ONE Championship តាំងពីដើមឆ្នាំ២០១៧មក ដោយក្នុងការប្រកួតកន្លងមកគឺ នាងត្រូវបានគេចាត់ទុកថាជាកីឡាការិនីលំដាប់ពិភពលោកម្នាក់ ដោយសារតែប្រវត្តិឈ្នះកីឡា ការិនីបរទេសរាប់មិនអស់ គឺមិនមែនមានតែការប្រកួតឈ្នះនៅ ស្រីពៅ នោះទេ ។
កីឡាការិនីម្ចាស់មេដាយពិភពលោក Wushu World Championship រូបនេះ ឡើងសង្វៀន ONE បានចំនួន១១លើក ក្នុងនោះឈ្នះ៧លើក និងចាញ់៤លើក ។ កីឡាការិនីជើងខ្លាំងឥណ្ឌូណេស៊ីរូបនេះ ធ្លាប់បានសរសើរ នៅ ស្រីពៅ ថាជាកីឡាការិនីកម្ពុជាដែលមានសមត្ថភាពមួយ
រូប ហើយបើទោះជានាងបានឈ្នះ តែនាងនៅតែយល់ថា កីឡាការិនីកម្ពុជារូបនេះល្អខ្លាំង។ ជាមួយនឹងសរសើររបស់កីឡាការិនីឥណ្ឌូណេស៊ីប្រាប់បណ្ដាញសារព័ត៌មានបរទេសមួយ កញ្ញា នៅ ស្រីពៅ ក៏បានលើកសរសើរគូប្រកួតរូបនេះផងដែរ ប្រាប់អ្នកសារព័ត៌មានក្នុងស្រុក ដោយបានទាំងចាត់ទុកថាគឺជាគ្រូដ៏ល្អផដែរ ។
ស្រីពៅ និយាយថា ៖ «បង! ខ្ញុំនៅសរ សើរគាត់មានចំណុចល្អច្រើនណាស់ ។ គាត់ [Priscilla] មានកូន មានប្ដី ប៉ុន្តែកម្លាំងរបស់គាត់រក្សាបានល្អដដែល ។ និយាយរួមកីឡាការិនីខ្លះទៀតមានកូនមានប្ដីគេបោះបង់ចោល ហើយ និងកម្លាំងធ្លាក់ចុះខ្លាំង ។ ខ្ញុំមើលទៅ គាត់…គាត់ចាស់មែន ប៉ុន្តែខ្ញីចាស់ តែម្ដង»។ ស្រីពៅ បញ្ជាក់ថា កីឡាការិនី Priscilla ស្អិតខាងក្បាច់ចាប់ក្លេជាងកីឡាការិនីថៃ Rika Ishige ដែលគេធ្លាប់យកឈ្នះនៅសង្វៀន ONE ទៅទៀត ។
នៅ ស្រីពៅ ដែលឈ្នះពានក្នុងនាមកីឡា ការិនីឆ្នើមប្រចាំសង្វៀននៅមីយ៉ាន់ម៉ាឆ្នាំ២០១៨ បានរំឭកថា ពេលប្រកួតប៉ះ Priscilla គឺចាញ់ ដោយច្ចេកទេសចូលចាប់បោក និងក្បាច់ក្លេ ព្រោះហ្វឹកហាត់បានតិចមុនចេញទៅប្រកួត ។ ម្យ៉ាងវិញទៀត ក្បាច់បាតរបស់នាង គឺក្បាច់គុន ខ្មែរមិនមែនក្បាច់MMA ដូចវីរនារីឥណ្ឌូណេស៊ី នេះឡើយ ។
មុនប្រកួតជាមួយ Priscilla នៅ ស្រីពៅ ហ្វឹកហាត់ត្រៀមបានប្រហែលមួយសប្ដាហ៍ ដោយ សារមានឈ្មោះទៅប្រកួតប្រដាល់នៅថៃ មិនដូចកាលនាងត្រៀមបានល្អពេលឈ្នះ Riga នោះឡើយ ។ កីឡាការិនីអាយុ២៤ឆ្នាំរបស់កម្ពុជា រូបនេះ បានប្រៀបធៀបខ្លួនឯងថា ៖ «បើខ្ញុំមានគ្រួសារនៅថ្ងៃមុខ បើគេបន្តឲ្យប្រកួតទៀត ខ្ញុំនឹងដើរតាមគន្លងរបស់ Priscilla ។ ខ្ញុំបានដាក់ចិត្ត ស្រឡាញ់ក្បាច់គុនទៅហើយ ខ្ញុំមិនខ្លាចរឿង ឈឺសាច់ទេ ខ្ញុំនៅតែចង់វ៉ៃទៅថ្ងៃអនាគត បើ គ្រួសារខ្ញុំផ្ដល់ឱកាសឲ្យ» ។
នៅ ស្រីពៅ ក៏ប្រកាសពីការប្រុងប្រយ័ត្នឲ្យយខ្លាំងសម្រាប់ការហ្វឹកហាត់ផងដែរ ជាពិសេសក្នុងឱកាសបង្ហាញខ្លួននៅស៊ីហ្គេមខាងមុខ ។
គួរដឹងថា កីឡាការិនី Priscilla Hertati Lumban Gaol បច្ចុប្បន្នអាយុ៣១ឆ្នាំ រូបនាង ចូលហាត់ក្បាច់គុនដំបូងគឺវូស៊ូ ក្នុងអាយុ១៧ឆ្នាំ ។ Priscilla ធ្លាប់គេចសាលារយៈពេល មួយសប្ដាហ៍ដើម្បីទៅសម្ងំហ្វឹកហាត់ក្បាច់គុនវូស៊ូមិនឲ្យឳពុកម្ដាយដឹង ។ នាងតែងតែដាក់ចិត្ត ចង់ក្លាយជាកីឡាការិនីផង និងជាអ្នករៀនសូត្រ ផងបន្ទាប់ពីឪពុកម្ដាយយល់ព្រម ។ កូនសិស្ស ប្រចាំក្លិប Siam Tigershark រូបនេះជាជើងឯកកីឡាវូស៊ូថ្នាក់ជាតិឥណ្ឌូណេស៊ី និងជាម្ចាស់មេដាយសំរឹទ្ធិពិភពលោក Wushu World Championship ទៀតផង ៕ (កែសម្រួលដោយ ៖ បុប្ផា)
ចែករំលែកព័តមាននេះ