ប្រទេសយេម៉ែន ៖ រដ្ឋាភិបាលយេម៉ែនទទួលស្គាល់ដោយសហគមន៍អន្តរជាតិ បានចុះហត្ថលេខាកាលពីថ្ងៃទី៥វិច្ឆិកានាទីក្រុងរីយ៉ាដនូវកិច្ចព្រមព្រៀងបែងចែកអំណាចគ្នាជាមួយពួកបំបែកខ្លួននិយម ដើម្បីបញ្ចប់ជម្លោះនៅភាគខាងត្បូងយេម៉ែន ជាប្រទេសដែលហែកហួដោយសង្គ្រាមដែលមានរណសិរ្សច្រើន។
ជម្លោះនោះដែលនាំឲ្យពួកបំបែកខ្លូននិយមភាគខាងត្បូង ដណ្ដើមត្រួតត្រាទីក្រុងអាដេនជាទីក្រុងធំនៅភាគខាងត្បូងប្រទេស ចាត់ទុកជារដ្ឋធានីបណ្ដោះអាសន្នដោយរដ្ឋាភិបាលជួយទ្រង់ដោយក្រុមចម្រុះអារ៉ាប់ នាំមុខដោយអារ៉ាប៊ីសាអូឌីតក្នុងជម្លោះប្រឆាំងពួកឧទ្ទាមហ៊ូធី មកពីភាគខាងជើងយេម៉ែន ជាអ្នកត្រួតត្រារដ្ឋធានីសាណានិងដែនដីដ៏ធំរបស់ប្រទេស។
ព្រះអង្គម្ចាស់រជ្ជទាយាទអារ៉ាប៊ីសាអូឌីតម៉ូហាមេដប៊ីនសាល់ម៉ាន ក្នុងពិធីចុះហត្ថលេខាលើកិច្ចព្រមព្រៀងនោះ ដែលផ្សាយតាមទូរទស្សន៍ ថ្លែងថា កិច្ចព្រមព្រៀងបើកនូវដំណាក់កាលថ្មីមួយនៃស្ថេរភាពនៅយេម៉ែន។ អារ៉ាប៊ីសាអូឌីតស្ថិតនៅខាងអ្នក។ នេះជាទិវាដ៏រីករាយមួយសម្រាប់អារ៉ាប៊ីសាអូឌីត ពេលដែលឃើញពលរដ្ឋយេម៉ែនរួបរួមគ្នា។
កិច្ចព្រមព្រៀងនេះគ្រោងបញ្ចូលពួកបំបែកខ្លួននៃក្រុមប្រឹក្សាបណ្ដោះអាសន្នភាគខាងត្បូង ទៅក្នុងរដ្ឋាភិបាល និងការវិលត្រឡប់របស់ក្រុមប្រឹក្សានោះមកកាន់ក្រុងអាដេនវិញ។ កងកម្លាំងបំបែកខ្លួនត្រូវបញ្ចូលក្នុងក្រសួងការពារប្រទេសនិងក្រសួងមហាផ្ទៃ។ បេសកជនអ.ស.បសម្រាប់យេម៉ែន លោកMARTIN GRIFFITHS បានអបអរសាទរ ចំពោះការចុះហត្ថលេខាលើកិច្ចព្រមព្រៀងនោះ ដែលលោកថាជាដំណាក់កាលសំខាន់សម្រាប់ការខិតខំប្រឹងប្រែងរួម សំដៅស្វែងរកដំណោះស្រាយដោយសនិ្តវិធីមួយនៃជម្លោះនៅយេម៉ែន។
កងកម្លាំងបំបែកខ្លួនវាយដណ្ដើមត្រួតត្រាក្រុងអាដេនកាលពីខែសីហា ខណៈទីក្រុងនោះជាមូលដ្ឋានសម្រាប់ការដកខ្លួនថយរបស់រដ្ឋាភិបាល ដែលបណ្ដេញចេញពីរដ្ឋធានីសាណាកាលពីឆ្នាំ២០១៤ដោយពួកឧទ្ទាមហ៊ូធី។ ការប៉ះទង្គិចគ្នារវាងពួកបំបែកខ្លួននិយមនិងកងកម្លាំងរដ្ឋាភិបាល ដែលជាគោលការណ៍ជាសម្ព័ន្ធមិត្តក្នុងសង្គ្រាម ប្រឆាំងពួកហ៊ូធីនាំឲ្យមានការភ័យខ្លាចពីការផ្ទុះបែករបស់ប្រទេស។
ពិធីចុះហត្ថលេខាលើកិច្ចព្រមព្រៀងនោះចូលរួមដោយ ប្រធានាធិបតីយេម៉ែនលោកអាប់រ៉ាបបូម៉ានសួរហាឌី ប្រមុខពួកបំបែកខ្លួនលោក អាអ៊ីដារូសអាល់ហ្សូបីឌី និងព្រះអង្គម្ចាស់រជ្ជទាយាទអាប៊ូដាប៊ីជាបុរសខ្លាំងនៃអេមីរ៉ាត់អារ៉ាប់រួម។
យោងតាមពួកអ្នកវិភាគថាកិច្ចព្រមព្រៀងនេះបានរំងាប់សភាពការណ៍នៅភាគខាងត្បូងយេម៉ែន ក៏ទោះបីពួកបំបែកខ្លូនទាមទារឲ្យមានរដ្ឋឯករាជ្យមួយអាចកើតឡើងវិញនៅភាគខាងត្បូងយេម៉ែនក្ដី៕ (កែសម្រួលដោយ ៖ បុប្ផា)
ចែករំលែកព័តមាននេះ