ខេត្តត្បូងឃ្មុំ ៖ ក្នុងរដូវទឹកសម្រកនៅក្នុងឃុំជីរោទ៍ទី១ ស្រុកត្បូងឃ្មុំ នៅជួរតាមដងទន្លេមេគង្គនៅជាប់នឹងផ្លូវបេតុងគេឃើញមានដំណាំដាំដុះក្នុងនោះមានពោត ល្ពៅ ស្ពៃក្ងោក ព្រមទាំងដំណាំរួមផ្សំផ្សេងៗទៀតជាច្រើនមុខ ដើម្បីលក់ដោះស្រាយជីវភាពគ្រួសារ ។ ពេលណាដំណាំហុចផលត្រូវបានឈ្មួញកណ្ដាលចុះមកប្រមូលទិញ ដើម្បីយកទៅលក់បន្តនៅតាមទីផ្សារនានា ក្នុងខេត្តត្បូងឃ្មុំ និងក្រុងកំពង់ចាម ។
អ្នកស្រីគឹម ស្រឿន អាយុ៥០ឆ្នាំ រស់នៅភូមិជីរោទ៍ក្រោមទី១ ឃុំជីរោទ៍ទី១ បានប្រាប់ឲ្យដឹងនៅព្រឹកថ្ងៃទី០៦ វិច្ឆិកានេះថា ក្នុងពេលរដូវទឹកទន្លេមេគង្គបានឡើងមកជនលិចភូមិឋានរបស់គាត់ធ្វើឲ្យផ្ទៃដីចម្ការប្រមាណជាកន្លះហិចតាត្រូវបានជន់លិច ។ ហើយក្រោយពីទឹកទន្លេស្រកទៅវិញផ្ទៃដីត្រូវបានព្រួសគ្រាប់ស្ពៃក្ងោក ដោយចំណាយអស់ជាង២គីឡូក្រាម ហើយក្នុងមួយគីឡូតម្លៃ១៨ម៉ឺនរៀល ដែលទិញមកពីផ្សារធំ ក្រុងកំពង់ចាម ។
អ្នកស្រីបានប្រាប់បន្តថា ក្នុងពេលដែលដើមស្ពៃដុះចេញមកប្រវែង៣ថ្នាំងដៃ មនុស្សចាស់ ដោយមានស្មៅដុះច្រើនគាត់ត្រូវជួលកម្មករបីបួននាក់មកជួយសម្អាត ។ ប្រសិនបើអាកាសធាតុល្អស្ពៃនេះមានរយៈពេលត្រឹមតែ ២៥ថ្ងៃនឹងអាចកាត់ស្លឹកលក់បានជាមួយក៏មានឈ្មួញកណ្ដាលចុះមកទិញដល់កន្លែងជូនក្នុងមួយគីឡូក្រាមបាន ៣០០០រៀល ឬក៏ជាង២០០០ រៀល ហើយចុះថោកជាងនេះទៀតនឹងត្រូវចូលថ្លៃដើម ។
ទោះបីគាត់ជាស្ត្រីមេម៉ាយមានកូននៅក្នុងបន្ទុកគ្រួសារយ៉ាងណាក្តី ត្រូវតែតស៊ូពុះពារជម្នះរាល់ឧបសគ្គតូចធំ ដីចម្ការពីរបីកន្លែងនៅក្នុងភូមិគាត់ដាំដុះផលដំណាំ គឺអាចផ្គត់ផ្គង់ជីវភាពគ្រួសារបានសមល្មម ។ ហើយផ្ទៃដីដាំស្ពៃនេះគាត់តែងតែផ្លាស់ប្ដូរដាំដំណាំទៅតាមរដូវកាលនីមួយៗ ដើម្បីថែរក្សាគុណភាពដីមិនឲ្យខូច ។
លោកស្រ៊ុន វណ្ណៈ អាយុ៥១ឆ្នាំ នៅភូមិជីរោទ៍ក្រោមទី១ ប្រាប់ថា គាត់មានផ្ទៃដីប្រមាណជាងពីរហិចតាក្នុងនោះមានដាំពោតល្ពៅ និងស្ពៃក្ងោក ។ ស្ពៃដាំលើផ្ទៃដីប្រមាណ២០អា គឺមិនទាន់ច្រូតនៅឡើយទេ ដោយទុកឲ្យចេញផ្កា និងគ្រាប់ទុំត្រៀមច្រូតទុកហាលឲ្យស្ងួតល្អសម្រាប់ដាំដុះនៅឆ្នាំខាងមុខទៀត ។ ជួនកាលក៏មានអ្នកភូមិគេមកទិញគ្រាប់ស្ពៃក្ងោកលក់បានមួយគីឡូតម្លៃ ១៨ម៉ឺនរៀល ។ នៅលើផ្ទៃដីដដែលគាត់តែងតែដាំដំណាំឆ្លាស់គ្នា ដើម្បីថែរក្សាគុណភាពដីមិនឲ្យហិរខូចនោះទេ ឲ្យបច្ចេកទេសនេះមិនមានអ្នកណាមកបង្រៀនឡើយ គឺចេះពីឪពុកម្ដាយក្នុងគ្រាដែលគាត់នៅកម្លោះមិនទាន់មានប្រពន្ធ ។
ក្នុងពេលខាងមុខស្ពៃក្ងោករបស់គាត់នឹងត្រូវច្រូតហើយ ដើមដែលនៅសល់ពាក់កណ្ដាលទៀត និងប្រើគ្រឿងចក្រកែច្នៃ ដើម្បីឲ្យទៅជាជីធម្មជាតិសម្រាប់ដាក់ផលដំណាំដាំដុះបន្តទៀត ។ ជាមួយនោះគាត់ក៏បានប្រើប្រាស់ជីសរីរាង្គដាក់លើដំណាំមានពោតល្ពៅ និងស្ពៃដោយមិនប៉ះពាល់សុខភាព ហើយអ្នកដែលយកទៅទទួលទានក៏គេចូលចិត្តហូបដែរ ។
លោកស្រ៊ុន វណ្ណៈ បន្តថា ផលដំណាំដែលបានដាំដុះនៅក្រោយរដូវទឹកសម្រកសម្រាប់ផលកម្រៃដែលប្រមូលលក់បាននៅលើទីផ្សារ គឺអាចដោះស្រាយជីវភាពគ្រួសារបានដោយផ្គត់ផ្គង់ឲ្យកូនកូនចំនួន៣នាក់បានរៀនសូត្រនៅសាលាផងដែរ ។ ដីចម្ការនេះអាចបង្កបង្កើនផលបានតែនៅក្រោយរដូវទឹកសម្រកប៉ុណ្ណោះ ។
ប្រជាកសិកររស់នៅក្នុងឃុំជីរោទ៍ទី១បានលើកឡើងថា ផលដំណាំដែលដាំដុះបានជួនលក់បានថ្លៃទទួលប្រាក់ចំណេញគ្រាន់បើ ហើយក៏មានពេលខ្លះទៀតលក់បានថោកត្រូវចូលដើមក៏មានព្រោះតម្លៃស្ថិតនៅលើមាត់របស់ឈ្មួញកណ្ដាល ៕ កែសម្រួលដោយ ៖សុឃាក់
ចែករំលែកព័តមាននេះ