រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី៥ ខែវិច្ឆិកា បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជា ធ្វើដំណើរចាកចេញពីក្រុងបាងកក ប្រទេសថៃ បន្ទាប់ពីបានអញ្ជើញចូលរួមក្នុងកិច្ចប្រជុំកំពូលអាស៊ានលើកទី៣៥ និងកិច្ចប្រជុំកំពូលពាក់ព័ន្ធនានា មកដល់រាជធានីភ្នំពេញវិញហើយ តាមអាកាសយានពិសេសរបស់ព្រះរាជាណាចក្រកម្ពុជា ។
នៅឯអាកាសយានដ្ឋានអន្តរជាតិភ្នំពេញ អញ្ជើញទៅទទួលស្វាគមន៍ប្រមុខរាជរដ្ឋាភិបាលកម្ពុជា មានវត្តមានសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងលោក លោកជំទាវ ជាឧបនាយករដ្ឋមន្ត្រី និងលោកនាយឧត្តមសេនីយ៍នៃកងយោធពលខេមរភូមិន្ទ ។
កិច្ចប្រជុំកំពូលអាស៊ានលើកទី៣៥ និងកិច្ចប្រជុំកំពូលពាក់ព័ន្ធនានា គឺក្នុងគោលបំណងឆ្ពោះទៅសម្រេចបានអាស៊ានមួយប្រកបដោយចីរភាព តាមរយៈការបង្កើនសន្តិសុខប្រកបដោយចីរភាព ការលើកកម្ពស់ការតភ្ជាប់ក្នុងតំបន់អាស៊ានប្រកបដោយភាពរលូន ដែលភ្ជាប់អាស៊ានទៅកាន់ពិភពលោក និងបន្តឲ្យមានការអភិវឌ្ឍប្រកបដោយចីរភាព ដើម្បីបង្កើនតម្លៃយុទ្ធសាស្ត្ររបស់អាស៊ាន នឹងនាំមកនូវស្ថិរភាព និងវិបុល
ភាពក្នុងតំបន់ ។
ជាពិសេសទៀតនោះ នៅក្នុងឱកាសនៃកិច្ចប្រជុំនេះ ក៏មានពិធីចុះហត្ថលេខាលើអនុស្សរណៈនៃការយោគយល់គ្នារវាងអាស៊ាននិងសមាគមនៃសហព័ន្ធបាល់ទាត់ពិភពលោក ក្នុងការចូលរួមចំណែកអភិវឌ្ឍន៍វិស័យកីឡាបាល់ទាត់ ក្នុងចំណោមប្រទេសជាសមាជិកអាស៊ាន ដែលមានប្រជាជនរស់នៅជាង៦៥០លាននាក់ ។
លោកប្រធានសហព័ន្ធកីឡាបាល់ទាត់ពិភពលោក បានវាយតម្លៃខ្ពស់និងចាត់ទុកថា នេះគឺជាលើកទីមួយហើយដែលបានចុះហត្ថលេខាលើអនុស្សរណៈនៃការយោគយល់គ្នារវាងអាស៊ាន និងសមាគមនៃសហព័ន្ធបាល់ទាត់ពិភពលោក ក្នុង ការរួមចំណែកបណ្ដុះបណ្ដាលធនធានមនុស្សលើវិស័យកីឡាបាល់ទាត់ ក្នុងចំណោមបណ្ដាប្រទេស ក្នុងតំបន់អាស៊ាន ឲ្យកាន់តែមានភាពប្រកួតប្រជែងឡើងថែមទៀត ពិសេសជាមួយនឹងបណ្ដាប្រទេសក្នុងតំបន់អឺរ៉ុប និងប្រទេសក្នុងទ្វីបដទៃទៀតក្នុងពិភពលោក ៕
ចែករំលែកព័តមាននេះ