រាជធានីភ្នំពេញ ៖ អគ្គស្នងការដ្ឋាននគរបាលជាតិ បានត្រៀមកម្លាំងជិត២ម៉ឺននាក់ ដើម្បីការពារសន្ដិសុខ សណ្ដាប់ធ្នាប់ក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នាពេលខាងមុខនេះ ។ លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ បានឲ្យដឹងថា អគ្គស្នងការដ្ឋាននគរបាលជាតិបានដាក់កម្លាំងជិត២ម៉ឺននាក់នៅតាមគោលដៅនានា ដើម្បីធានាសន្ដិសុខ សុវត្ថិភាព និងសណ្ដាប់ធ្នាប់សាធារណៈ ជូនប្រជាពលរដ្ឋមកកម្សាន្តក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឱ្យកាន់តែមានភាពល្អប្រសើរ ។
លោកឧត្តមសេនីយ៍ឯកបញ្ជាក់ថា ការប្រើប្រាស់កម្លាំងសរុបក្នុងការការពារសន្ដិសុខ សណ្ដាប់ធ្នាប់នៅក្នុងព្រះរាជពិធីបុណ្យអុំទូកឆ្នាំនេះ គឺច្រើនជាងឆ្នាំមុន ព្រោះស្របពេលជាមួយនឹងបុណ្យឯករាជ្យជាតិផងដែរ ។ លោកបានអំពាវនាវដល់ប្រជាពលរដ្ឋ មកលេងកម្សាន្ដក្នុងព្រះរាជពិធីបុណ្យអុំទូកទាំងអស់គ្នា ដោយកុំជឿលើការញុះញង់ និងបំផុសបំផុលរបស់ក្រុមអគតិមួយចំនួន ជាពិសេសក្រុមឧទ្ទាមក្រៅច្បាប់ ។
លោកឧត្តមសេនីយ៍ឯក ឆាយ គឹមខឿន សំណូមពរឱ្យប្រជាពលរដ្ឋទាំងអស់ មានការយោគយល់ចំពោះការបិទផ្លូវមួយចំនួន និងការត្រួតពិនិត្យរបស់សមត្ថកិច្ច ។ ម្យ៉ាងវិញទៀត ប្រជាពលរដ្ឋដែលមកលេងកម្សាន្ដក្នុងព្រះរាជពិធីបុណ្យអុំទូកនេះ ត្រូវមានការប្រុងប្រយ័ត្នខ្ពស់ចំពោះវត្ថុដែលមានតម្លៃ ចៀសវាងការបាត់បង់ ដោយសារជនឆ្លៀតឱកាសមួយចំនួន ។
សូមបញ្ជាក់ថា ក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក កាលពីឆ្នាំ២០១៨កន្លងទៅ អគ្គស្នងការដ្ឋាននគរបាលជាតិ បានដាក់កម្លាំងជាង១ម៉ឺននាក់ ដើម្បីការពារសន្តិសុខជូនប្រជាពលរដ្ឋដែលមកកម្សាន្ត ៕
ចែករំលែកព័តមាននេះ