ខេត្តរតនគិរី ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ត្រូវបានសមត្ថកិច្ចចាប់ខ្លួនពីបទរំលោភសេពសន្ថវៈ ដោយប្រើអំពើហិង្សាទៅលើស្ត្រីរងយ៉ាងធ្ងន់ធ្ងរ បណ្តាលឱ្យរងបួសបាក់ធ្មេញ និងជាំលើដងខ្លួនទៀតផង។ ការចាប់ខ្លួននេះកើតឡើងកាលពីម៉ោង៨និង១៥នាទីព្រឹក ថ្ងៃទី៤ ខែវិច្ឆិកា…
ខេត្តរតនគិរី ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ត្រូវបានសមត្ថកិច្ចចាប់ខ្លួនពីបទរំលោភសេពសន្ថវៈ ដោយប្រើអំពើហិង្សាទៅលើស្ត្រីរងយ៉ាងធ្ងន់ធ្ងរ បណ្តាលឱ្យរងបួសបាក់ធ្មេញ និងជាំលើដងខ្លួនទៀតផង។ ការចាប់ខ្លួននេះកើតឡើងកាលពីម៉ោង៨និង១៥នាទីព្រឹក ថ្ងៃទី៤ ខែវិច្ឆិកា ឆ្នាំ២០១៩ នៅចំណុចភូមិ០៣ ឃុំត្រពាំងក្រហមស្រុកកឥកូនមុំ ខេត្តរតនគិរី ខណៈពេលជនសង្ស័យគេចខ្លួនមកសំងំនៅទីនោះ។
បើតាមប្រភពពីសមត្ថកិច្ចបានឱ្យដឹងថា ជនសង្ស័យដែលឃាត់ខ្លួនខាងលើនោះឈ្មោះ ស៊ីង ប៊ុតស៊ី ភេទប្រុស អាយុ២៧ឆ្នាំ ជនជាតិខ្មែរ-ឡាវ មុខរបរកសិករ រស់នៅភូមិប៉ុង ឃុំប៉ុង ស្រុកវើនសៃ ខេត្តរតនគិរី ចំណែកស្ត្រីអាយុ២០ឆ្នាំ មុខរបរកសិករ។
ប្រភពដដែលបន្តថា មុនពេលកើតហេតុ កាលពីម៉ោង៨និង៣០នាទីយប់ ថ្ងៃទី៣ ខែវិច្ឆិកានោះ ខណៈស្ត្រីរងគ្រោះត្រឡប់មកពីស្រែចំការវិញនៅចំណុចស្រុកវើនសៃ ស្រាប់តែជួបជនសង្ស័យមកស្ទាក់ចាប់ស្ត្រីរងគ្រោះរំលោភរហូតសម្រេចតែម្តង ។ ថែមទាំងប្រើអំពើហិង្សាលើនាងដោយវាយស្ត្រីរងគ្រោះបណ្តាលឱ្យបាក់ធ្មេញលើចំនួន៣ ដងខ្លួនមានស្នាមជាំនៅលើដើមទ្រូង និងផ្ទៃមុខ រងរបួសធ្ងន់ធ្ងរទៀតផង ។ ក្រោយពីរំលោភ និងប្រើហិង្សាលើស្ត្រីរងគ្រោះរួច ជនសង្ស័យក៏រត់គេចខ្លួនបាត់ស្រមោល ។ បន្ទាប់មកស្ត្រីរងគ្រោះក៏ទៅដាក់ពាក្យបណ្តឹង ដើម្បីតាមចាប់ជនសង្ស័យតែម្តង។
លុះដល់ព្រឹកឡើងថ្ងៃទី០៤ ខែវិច្ឆិកា លោក ទឺ នូថង អធិការនគរបាលស្រុកវើនសៃ បានដឹកនាំកម្លាំងសហការជាមួយកម្លាំងជំនាញជួញដូរមនុស្ស នៃស្នងការដ្ឋាននគរបាលខេត្តស្រាវជ្រាវតាមរក ទើបឈានដល់ធ្វើការឃាត់ខ្លួនបានតែម្តង។
បច្ចុប្បន្ននេះ ជនសង្ស័យត្រូវបានសមត្ថកិច្ចធ្វើការឃុំខ្លួនជាបណ្តោះអាសន្ននៅអធិការដ្ឋាននគរបាលស្រុកវើនសៃ ដើម្បីរង់ចាំបំពេញបែបបទតាមនីតិវិធីបញ្ជូនទៅអយ្យការអមសាលាដំបូងខេត្ត ចាត់ការតាមផ្លូវច្បាប់។ (កែសម្រួលដោយ ៖ បុប្ផា)
ចែករំលែកព័តមាននេះ