ខេត្តព្រះសីហនុ ៖ ប្តីប្រពន្ធ២នាក់បានស្លាប់ភ្លាមៗនៅនឹងកន្លែងកើតហេតុ ក្នុងហេតុការណ៍គ្រោះថ្នាក់ចរាចរណ៍រវាងរថយន្តបុកជាមួយម៉ូតូក្នុងទិសដៅស្របគ្នាកាលពីវេលាម៉ោង៤និង៤៥នាទីទៀបភ្លឺថ្ងៃទី៥ ខែវិច្ឆិកា ឆ្នាំ២០១៩ តាមបណ្តោយផ្លូវជាតិលេខ៤ ចន្លោះគីឡូម៉ែត្រចំណោតអូរត្រាវ ស្ថិតនៅភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ ។
ភាគីខាងម៉ូតូមួយគ្រឿងម៉ាកហុងដា ធុនC125 ពណ៌ខ្មៅ ពាក់ផ្លាកលេខ ភ្នំពេញ១BU-០៩៣២ បើកបរដោយបុរសជាប្តីឈ្មោះ ម៉ាក រស់ អាយុ៤៧ឆ្នាំ មុខរបរកម្មករសំណង់ បានស្លាប់ និងអ្នករួមដំណើរជាប្រពន្ធឈ្មោះ ប៉ុក ង៉ែត អាយុ៤៥ឆ្នាំ មុខរបរនៅផ្ទះ ។ ជនរងគ្រោះទាំង២នាក់មានទីលំនៅក្នុងស្រុកព្រៃកប្បាស ខេត្តតាកែវ ។
ចំណែកភាគីខាងរថយន្តមួយគ្រឿងម៉ាកឡិចស៊ីស RX300 ពាក់ស្លាកលេខ ភ្នំពេញ ២M-៦២៩១ អ្នកបើកបរមិនស្គាល់អត្តសញ្ញាណ បានបើកគេចបាត់ស្រមោល ។
តាមប្រភពព័ត៌មានបានឱ្យដឹងថា មុនពេលកើតហេតុ គេឃើញរថយន្តមួយគ្រឿងម៉ាកឡិចស៊ីស RX300 ធ្វើដំណើរក្នុងទិសដៅពីខេត្តព្រះសីហនុឆ្ពោះទៅភ្នំពេញ លុះដល់ចំណុចខាងលើបានបុកពីខាងក្រោយម៉ូតូមួយគ្រឿងម៉ាកហុងដា ដែលជិះគ្នា២នាក់ប្តី កំពុងធ្វើដំណើរក្នុងទិសដៅស្របគ្នា បណ្តាលឱ្យប្តីប្រពន្ធទាំង២នាក់ស្លាប់ភ្លាមៗនៅនឹងកន្លែងកើតហេតុ ចំណែករថយន្តបង្កបានបើកគេចបាត់ស្រមោល ដោយបន្សល់ទុកនូវស្លាកលេខរថយន្តនៅកន្លែងកើតហេតុ។
ក្រោយពេលកើតហេតុ សមត្ថកិច្ចបានយកម៉ូតូមួយគ្រឿងខាងលើមករក្សាទុកនៅការិយាល័យនគរបាលចរាចរណ៍ផ្លូវគោក ហើយសមត្ថកិច្ចជំនាញកំពុងស្រាវជ្រាវតាមរករថយន្តបង្កដើម្បីឱ្យចូលមកដោះស្រាយតាមច្បាប់ ។ ចំណែកសពជនរងគ្រោះទាំង២នាក់ប្តីប្រពន្ធត្រូវបានសមត្ថកិច្ចប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ