រាជធានីភ្នំពេញ៖ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានអះអាងថាបន្ទាប់ពីដាក់ចេញនូវផែនការយុទ្ធសស្ត្រវិស័យការងារនិងបណ្តុះបណ្តាលវិជ្ជាជីវៈឆ្នាំ២០១៩ដល់ឆ្នាំ២០២៣មកឃើញថាវិស័យការងារបានបន្តរីកចម្រើន ហើយអត្រាមានការងារធ្វើមានកម្រិតខ្ពស់៩៩,៣% ក្នុងចំណោមកំលាំងពលកម្មប្រមាណ១០លាននាក់។
ថ្លែងក្នុងពិធីបើកពិព័រណ៍ពិការងារ និងផលិតភាពជាតិ ឆ្នាំ២០១៩នៅកោះពេជ្រថ្មីៗនេះ លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ មានប្រសាសន៍ថា ក្នុងរយៈពេល១ឆ្នាំកន្លងមកបន្ទាប់ពីរាជរដ្ឋាភិបាលនីតិកាលទី៦ត្រូវបានប្រសូតឡើង ជាមួយនឹងការដាក់ឱ្យអនុវត្តនូវយុទ្ធសាស្ត្រចតុកោណដំណាក់កាលទី៤ ហើយក្រសួងការងារនិងបណ្តុះបណ្តាលវិជ្ជាជីវៈបានដាក់ចេញនៅផែនការអភិវឌ្ឍយុទ្ធសាស្ត្រវិស័យការងារនិងបណ្តុះបណ្តាលវិជ្ជាជីវៈឆ្នាំ២០១៩ដល់ឆ្នាំ២០២៣ ឆ្លើយតបទៅនឹងយុទ្ធសាស្ត្ររបស់រាជរដ្ឋាភិបាលខាងលើ វិស័យការងារនិងបណ្តុះបណ្តាលវិជ្ជាជីវៈបានបន្តរីកចម្រើននិងបានផ្តល់ប្រយោជន៍ជាច្រើនដល់ប្រជាពលរដ្ឋតាមរយៈបង្កើតបានការងារថ្មីៗដែលមានគុណភាពកាន់តែល្អ កិច្ចគាំពារសង្គមកាន់តែទូលំទូលាយនិងការវិវឌ្ឍជំនាញជំនាញសមត្ថភាពកាន់តែខ្ពស់ឡើង។
លោករដ្ឋមន្ត្រីបានគូសបញ្ជាក់ថា «ជាក់ស្តែងអត្រាមានការងារធ្វើមានកម្រិតខ្ពស់៩៩,៣% ក្នុងចំណោមកំលាំងពលកម្មប្រមាណ១០លាននាក់។ គ្រឹះស្ថានសេដ្ឋកិច្ចក្នុងប្រពន្ធ័ដែលបានចុះបញ្ជីនៅក្នុងក្រសួងការងារនិងបណ្តុះបណ្តាលវិជ្ជាជីវៈមានប្រមាណជាង១ម៉ឺនកន្លែងដែលក្នុងនោះមានកំលាំងពលកម្មជាង១,៤លាននាក់, សហគ្រាសគ្រឹះស្ថានសេដ្ឋកិច្ចក្រៅប្រព័ន្ធមានប្រមាណជិត៦សែន ដែលមានកម្មករនិយោជិកជាង២,៤លាននាក់,វិស័យកសិកម្ម ជាង៤លាននាក់,ពលករដែលកំពុងធ្វើនៅក្រៅប្រទេសមានប្រមាណ១,២លាននាក់និងមន្ត្រីសាធារណៈប្រមាណ៥សែននាក់»។ លោកបានលើកឡើងថា ក្នុងរយៈពេលមួយឆ្នាំកន្លងមកនេះក្រសួងការងារបានធ្វើទំនើបកម្មប្រពន្ធ័អប់រំបណ្តុះបណ្តាលបច្ចេទេសវិជ្ជាជីវៈតាមរយៈការពង្រឹងការអនុវត្តគោលនយោបាយជាតិស្តីពីការអប់រំបណ្តុះបណ្តាលបច្ចេកទេសនិងវិជ្ជាជីវៈ ហើយនិយោជកក៏អាចរើសកំលាំងពលកម្មបានភ្លាមៗដោយងាយស្រួលនៅនឹងកន្លែងឬនៅពេលវេលានិងទីកន្លែងណាក៏បាន។
បើតាមលោករដ្ឋមន្ត្រីក្រសួងការងារ ស្របពេលស្ថានភាពសេដ្ឋកិច្ចជាតិកំពុងមានកំណើនខ្ពស់ដូចកម្ពុជាភាពគ្មានការងារធ្វើមិនបណ្តាលមកពីខ្វះការងារនោះទេ តែវាកើតឡើងដោយសារតែការខកឱកាសនិងភាពមិនស៊ីសង្វាក់គ្នានៅក្នុងព័ត៌មានទីផ្សារការងារ។ការខកឱកាសដោយសារអ្នកស្វែងរកការងារធ្វើនិងនិយោជកមិនអាចជួបគ្នាឬមិនអាចទទួលបានព័ត៌មានពេញលេញពីគ្នាទៅវិញទៅមកបានទាន់ពេលវេលា។
ចំណែកភាពមិនស៊ីគ្នាកើតឡើងដោយសារជំនាញអ្នកស្វែងរកការងារធ្វើខុសគ្នាទៅនិងជំនាញដែលនិយោជកត្រូវការកំលាំងពលកម្ម។ លោកបានបញ្ជាក់ថា «ដើម្បីដោះស្រាយបញ្ហានេះក្នុងឆ្នាំកន្លងមកទីភ្នាក់ងារជាតិនិងមុខរបរនិងការងារបានបង្កើតការប្រមូលផ្តុំផ្សព្វផ្សាយព័ត៌មាននិងពីឱកាសការងារប្រមាណជិត១សែនកន្លែង ព្រមទាំងបានផ្តល់ព័ត៌មានអំពីការអប់រំបណ្តុះបណ្តាល និងចុះឈ្មោះអ្នកស្វែងរកការងារធ្វើជាង១,៦ម៉ឺននាក់ ហើយក្លាយជាមូលដ្ឋានទិន្នន័យធំមួយនៅកម្ពុជា»៕ កែសម្រួលដោយ ៖ សុឃាក់
ចែករំលែកព័តមាននេះ