បរទេស ៖ លោកម៉ាក ហ្សាក់កាប៊ឺក (Mark Zuckerberg) ដែលជាស្ថាបនិក និងនាយកប្រតិបត្តិរបស់ក្រុមហ៊ុន Facebook តែងតែគោរពតាមច្បាប់មួយពេលដែលជ្រើសបុគ្គលិកសម្រាប់ក្រុមហ៊ុនលោក។ លោកបានចែករំលែកមកថា មនុស្សដែលធ្វើការផ្ទាល់ជាមួយលោកតែងតែជាមនុស្សដែលលោកចង់ធ្វើការឲ្យ។
ប្រាកដណាស់ អ្នកគ្រប់គ្រងក្រុមហ៊ុនឬអាជីវកម្មជាទូទៅតែងតែមានកិច្ចការត្រូវបំពេញច្រើនជាងបុគ្គលិកធម្មតា ប៉ុន្តែលោកនាយកប្រតិបត្តិខាងលើនេះបាននិយាយថាម្ចាស់អាជីវកម្មមិនគួរសម្រេចចិត្តជ្រើសបុគ្គលិកដោយទាន់ហន់ទេ។ លោកបានបន្តថា ក្នុងរយៈពេលវែង អ្នកនឹងទទួលបានកិច្ចការល្អប្រសើរប្រសិនបើអ្នករកបានមនុស្សដែលពិតជាមានសមត្ថភាពខ្ពស់ពិតមែន។
អ្នកស្រី សឺរី សានបឺក (Sheryl Sandberg) គឺជាឧទាហរណ៍ដ៏ល្អមួយដែលលោកហ្សាក់កាបឺកអះអាងថាលោកនឹងសប្បាយរីករាយក្នុងការធ្វើការឲ្យអ្នកស្រី។ លោកបានបន្តទៀតថា បុគ្គលដែលជះឥទ្ធិពលដល់ជីវិតលោកច្រើនជាងគេគឺមិត្តរួមការងារដែលលោកជួបជារៀងរាល់ថ្ងៃ។ ហើយប្រាកដណាស់ ការទាក់ទាញបុគ្គលិកក៏មានសារៈសំខាន់ស្មើការជ្រើសរើសដែរ។ គន្លឹះសំខាន់ក្នុងការទាក់ទាញមនុស្សដែលមានសមត្ថភាពសម្រាប់លោកហ្សាក់កាបឺកគឺភាពស្មោះត្រង់ទាក់ទិននឹងអ្វីដែលអ្នកជឿនិងគាំទ្រ។ ឧទាហរណ៍ដូចជា Facebook ដែលមានបេសកកម្មក្នុងការតភ្ជាប់ពិភពលោកជាដើម។
ចុងក្រោយ លោក ហ្សាក់កាបឺក ក៏បានបន្ថែមយោបល់ទាក់ទិននឹងការចាត់ចែងការងារដែរ។ លោកជាមនុស្សបត់បែនពេលដែលគ្រប់គ្រងមនុស្ស ហើយលោកបានបកស្រាយថា “បុគ្គលិកត្រូវការសមត្ថភាពក្នុងការប្រើគំនិតច្នៃប្រឌិត និងសមត្ថភាពពេញលេញរបស់ពួកគេ បើមិនដូច្នេះទេពួកគេមិនអាចជះឥទ្ធិពលបានច្រើនលើពិភពលោកទេ ហើយពួកគេនឹងចង់ធ្វើអ្វីផ្សេង។”
ជាមួយគ្នានេះផងដែរ លោកតែងតែព្យាយាមរក្សាក្រុមការងារមួយ និងសម្រេចកិច្ចការដោយខ្លួនឯងឲ្យបានច្រើនតាមសមត្ថភាពរបស់ខ្លួន។ Facebook បម្រើមនុស្សច្រើនជាង ១ប៊ីលាននាក់ទៅទៀតជុំវិញពិភពលោក តែពឹងផ្អែកលើក្រុមការងារតិចជាង ១០,០០០នាក់ទៅទៀត ៕ កែសម្រួលដោយ ៖ សុឃាក់
ចែករំលែកព័តមាននេះ