ខេត្តកោះកុង ៖ សេចក្តីរាយការណ៍បឋមឲ្យដឹងថា បុរសម្នាក់ជាមនុស្សស្រវឹងខួប កាលពីរសៀលថ្ងៃទី២ ខែវិច្ឆិកា បានត្រូវនគរបាលស្រុកស្រែអំបិលឃាត់ខ្លួន ពាក់ព័ន្ធនឹងករណីហិង្សាក្នុងគ្រួសារដោយសារធ្វើអី្វប្រពន្ធមិនកើត ក៏ដុតកម្ទេចម៉ូតូចោលព្រោះតែភ្លើងប្រចណ្ឌ ។
បុរសរូបនេះឈ្មោះ រ៉េត កង អាយុ៣៩ឆ្នាំ មានទីលំនៅភូមិជ្រោយ ឃុំបឹងព្រាវ ស្រុកស្រែអំបិល គ្មានមុខរបរពិតប្រាកដ ។ តាមសេចក្តីរាយការណ៍ឲ្យដឹងថា ជនសង្ស័យជាមនុស្សប្រមឹកស្រវឹងរាល់ថ្ងៃ ហើយតែងតែរករឿងប្រពន្ធដោយសារការប្រចណ្ឌ ។
ជាក់ស្តែង នៅថ្ងៃទី២ ខែវិច្ឆិកានោះ បុរសរូបនេះខណៈផឹកស្រាស្រវឹងបានប្រើអំពើហិង្សាក្នុងគ្រួសារ ជេរប្រមាថ និងវាយប្រពន្ធឈ្មោះ កើត ម៉េវ អាយុ២៩ឆ្នាំ បណ្តាលឲ្យមានរបួសស្នាម ព្រមទាំងធ្វើឲ្យខូចខាតសម្ភារក្នុងផ្ទះ និងដុតបំផ្លាញម៉ូតូមួយគ្រឿងចោលទៀតផង ។
ក្រោយកើតហេតុ សមត្តកិច្ចបានទៅឃាត់ខ្លួនបញ្ជូនទៅកាន់ស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅសាលាដំបូង ៕
ចែករំលែកព័តមាននេះ