រាជធានីភ្នំពេញ ៖ ជប៉ុនបានចាប់ផ្តើមសម្លឹងមើលឃើញពីសក្តានុពលរបស់ខេត្តព្រះសីហនុ ដោយនឹងធ្វើផ្សព្វផ្សាយពីការរីកចំរើនរបស់ខេត្តនោះ ដើម្បីប្រជាជនខ្លួនបានដឹង និងមកទស្សនា ។ នេះបើតាមលោកទូត ជប៉ុនប្រចាំនៅកម្ពុជា ។
ការសម្លឹងមើលឃើញរបស់ជប៉ុននេះ ខណៈជនជាតិចិនមួយចំនួនបានត្រឡប់ជាបន្តបន្ទាប់ពីទៅស្រុកវិញ ក្រោយពីពួកគេរស់នៅ និងរកស៊ីក្នុងខេត្តព្រះសីហនុមួយរយៈពេលកន្លងមក ។ យោងតាមបណ្តាសង្គមរបស់រដ្ឋបាលខេត្តព្រះសីហុបានឲ្យដឹងថា លោក MIKAMI MASAHIRO ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជាបានលើកឡើងក្នុងជំនួបពិភាក្សាជាមួយលោក គួច ចំរើន អភិបាលនៃគណៈអភិបាលខេត្តព្រះសីហនុនៅសាលាខេត្តព្រះសីហនុ នាព្រឹកថ្ងៃទី០៤ ខែវិច្ឆិកានេះ ជាលើកទីមួយ ដែលលោកមកទស្សនកិច្ចខេត្តព្រះសីហនុ បន្ទាប់ពីមកធ្វើការនៅរាជធានីភ្នំពេញ ។
លោកថា កាលពីឆ្នាំមុន លោកបានមកភ្នំពេញចូលរួមកិច្ចប្រជុំអាស៊ាន ហើយមកដល់បច្ចុប្បន្ន កម្ពុជាមានការអភិវឌ្ឍខ្លាំង ។ កម្ពុជាឆ្លងកាត់សង្គ្រាមជាច្រើនឆ្នាំកម្ពុជាសម្រេចបាននូវសុខសន្តិភាព ស្ថេរភាពនយោបាយ ខេត្តព្រះសីហនុ មានអគារខ្ពស់ៗជាច្រើនកំពុងមានការអភិវឌ្ឍខ្លាំងគួរឱ្យចាប់អារម្មណ៍ ។ លោកបញ្ជាក់ថា ៖« រាជរដ្ឋាភិបាលជប៉ុនមានកិច្ចសហប្រតិបត្តិការល្អជាមួយកម្ពុជា ពិសេសជនជាតិជប៉ុនដែលមករកស៊ីនៅខេត្តព្រះសីហនុរងគ្រោះដោយសារការ រលំបាក់អគារកាលពីកន្លងមក ហើយរដ្ឋបាលខេត្តក៏ដូចជា រាជរដ្ឋាភិបាលបានយកចិត្តទុកដាក់ដោះស្រាយបានទាន់ពេលវេលា » ។
ក្នុងជំនួបនោះដែរ លោកឯកអគ្គរាជទូតជប៉ុនចង់ដឹងពីការអភិវឌ្ឍខេត្តលើបញ្ហាផ្លូវលូរទឹកស្អុយ មានបញ្ហាប្រឈមអ្វីខ្លះ និងមានគម្រោងអភិវឌ្ឍខេត្តបែបណា និងថ្លែងអំណរគុណរដ្ឋបាលខេត្តបានសហការនៃកាចូលចតនាវាកងកងទ័ពជើង ទឹកជប៉ុននៅខេត្តព្រះសីហនុ នៅពេលខាងមុខនឹងមាននាវាជាច្រើនទៀតចូលចតនៅកំពង់ផែក្រុងព្រះសីហនុ ។ ជាមួយគ្នានោះដែរលោកបានសន្យាជួយផ្សព្វផ្សាយពីសក្តានុពលខេត្តព្រះសីហនុដល់ប្រជាជនជប៉ុនមកកាន់ខេត្តព្រះសីហនុកន្លងមក ប្រជាជនជប៉ុនស្គាល់តែអង្គរ ខេត្តសៀមរាប ។
នៅក្នុងជំនួបនោះដែរលោក គួច ចំរើន អភិបាលខេត្តព្រះសីហនុ បានថ្លែងអំណរគុណរាជរដ្ឋាភិបាលជប៉ុនគាំទ្រការអភិវឌ្ឍនៅកម្ពុជា ការអភិវឌ្ឍនាពេលបច្ចុប្បន្នធ្វើឲ្យផ្លូវក្នុងក្រុងមានការខូចខាតយ៉ាងធ្ងន់ធ្ងរ ឈានទៅខូចខាតទាំងស្រុង បើយើងមិនបានស្ថាបនាជួសជុលនោះទេ ។ ខេត្តព្រះសីហនុជាខេត្តទេសចរណ៍ ការអភិវឌ្ឍ រយៈពេលប៉ុន្មានឆ្នាំចុងក្រោយនេះធ្វើឲ្យខេត្តព្រះសីហនុក្លាយជាតំបន់សេដ្ឋកិច្ចពហុបំណង មានវិស័យសំខាន់ៗដូចជា វិស័យសំណង់ ឧស្សាហកម្ម ពាណិជ្ជកម្ម ដឹកជញ្ជូន និងទេសចរណ៍ ។
ខេត្តមានកំពង់ផែអន្តរជាតិទឹកជ្រៅ ព្រលានយន្តហោះ ផ្លូវដែក ផ្លូវគោក ដោយសារកំណើននៃការដឹកជញ្ជូនមានការកើនឡើងក្នុងមួយថ្ងៃមានកុងតឺន័រប្រមាណ៧០០ ដឹកចេញទៅកាន់រាជធានីភ្នំពេញ និងបណ្តាខេត្តផ្សេងទៀត ។ លោក អភិបាលខេត្តបានជម្រាបជូនបន្តថា កាលពីថ្ងៃទី៣០ ខែសីហា ២០១៩កន្លង មកក្នុងកិច្ចប្រជុំគណៈរដ្ឋមន្ត្រី សម្តេចតេជោ បានបញ្ចេញកញ្ចប់ថវិកាសាងសង់ផ្លូវក្នុងក្រុងព្រះសីហនុ៣៤ខ្សែគ្រោងនឹងបើកការដ្ឋាននៅថ្ងៃទី១៦ វិច្ឆិកាខាងមុខនេះ ៕ កែសម្រួលដោយ ៖សុឃាក់
ចែករំលែកព័តមាននេះ