មន្ត្រីជាន់ខ្ពស់រាជរដ្ឋាភិបាល…ទាត់ចោលសម្តីមេបាតុករហុងកុង
- ភ្នំពេញ
រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា លោកផៃ ស៊ីផាន បានសម្តែងការសោកស្តាយយ៉ាងខ្លាំង ដែលលោកចូូសហ័រ វ៉ុង (Joshua Wong)…
រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា លោកផៃ ស៊ីផាន បានសម្តែងការសោកស្តាយយ៉ាងខ្លាំង ដែលលោកចូូសហ័រ វ៉ុង (Joshua Wong)…
រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា លោកផៃ ស៊ីផាន បានសម្តែងការសោកស្តាយយ៉ាងខ្លាំង ដែលលោកចូូសហ័រ វ៉ុង (Joshua Wong) មេដឹកនាំមួយរូបនៃចលនាបាតកម្មយ៉ាងកក្រើកនៅទីក្រុងហុងកុង ប្រទេសចិន បានចំអកឡកឡឺយ និងប្រឆាំងលទ្ធិប្រជាធិបតេយ្យ និងនីតិរដ្ឋរបស់កម្ពុជា និងបានប្រកាសគាំទ្រការវិលចូលកម្ពុជារបស់លោក សម រង្ស៊ី ថែមទៀត ។ លោកផៃ ស៊ីផាន បានសរសេរលើបណ្តាញសង្គមហ្វេសបុកនៅថ្ងៃទី១ វិច្ឆិកា ឆ្នាំ២០១៩ ថា «ខ្ញុំមានសេចក្តីសោកស្តាយ និងហួសចិត្តចំពោះការលើកឡើងរបស់មេបាតុករនៅទីក្រុងហុងកុង លោក ចូសហ័រ វ៉ុង ដែលតាំងខ្លួនជាបងធំនយោបាយនៅក្នុងតំបន់ ។
ការលើកឡើងនេះ គឺមិនត្រឹមតែបង្ហាញការយល់ដឹងមិនច្បាស់ចំពោះបញ្ហានយោបាយនៅកម្ពុជាប៉ុណ្ណោះទេ ថែមទាំងជាការចំអកឡកឡឺយដ៏ធ្ងន់ធ្ងរមួយប្រឆាំងនឹងលទ្ធិប្រជាធិបតេយ្យ និងនីតិរដ្ឋកម្ពុជា» ។ លោកបន្ដថា សម រង្ស៊ី មិនមែនជាមេបាតុកម្មនោះទេ ខុសគ្នាពីលោក ចូសហ័រ វ៉ុង ដែលជាមេបាតុករ នៅទីក្រុងហុងកុង ។ សម រង្ស៊ី ជាមេដឹកនាំរដ្ឋប្រហារផ្ដួលរំលំរាជរដ្ឋាភិបាលស្របច្បាប់ កើតចេញពីការបោះឆ្នោតនាពេលកន្លងទៅ ។ លោក ផៃ សុីផាន បញ្ជាក់ថា សម រង្ស៊ី ជាអ្នកដឹកនាំធ្វើរដ្ឋប្រហារដែលមានគម្រោងថវិការៀបចំកងកម្លាំងប្រដាប់អាវុធ ក្នុងកិច្ចបម្រើ សកម្មភាពក្បត់ជាតិរបស់ខ្លួននិងបក្សពួក ។
សម រង្ស៊ី រៀបចំសកម្មភាពញុះញង់យុវជន កម្មករ និងប្រជាពលរដ្ឋ ក្នុងចលនារដ្ឋប្រហារ និងភាពរងគ្រោះរបស់មហាជនជាចំណាប់ខ្មាំង ដើម្បីជោគជ័យក្នុងកិច្ចរដ្ឋប្រហាររបស់ខ្លួន ។ លោក ផៃ សុីផាន អះអាងថា សម រង្ស៊ីធ្វើវិទ្ធង្សនានិងវិច្ឆេទកម្មក្នុងវិស័យសង្គមកិច្ច និងសេដ្ឋកិច្ច ដែលមិនអាចអត់ឱនឲ្យបានឡើយ។សម រង្ស៊ី ត្រូវបានតុលាការផ្ដន្ទាទោសជាច្រើនករណី និងជាឧក្រិដ្ឋជន ។ សម រង្ស៊ី និងបក្សពួកជាក្រុមបំផ្លាញជាតិ សាសនា ព្រះមហាក្សត្រ និងសន្តិភាពកម្ពុជា ។ សូមជម្រាបថា ការសម្តែងការសោកស្តាយនេះ បន្ទាប់ពីលោក ចូសហ័រ វ៉ុង តាំងខ្លួនជាបងធំនយោបាយនៅក្នុងតំបន់ ។
តាមរយៈបណ្តាញសង្គមធ្វីតធ័រ (Twitter) កាលពីថ្ងៃទី៣១ ខែតុលា លោក ចូសហ័រ វ៉ុងមេដឹកនាំក្រុមបាតុករនៅទីក្រុងហុងកុង បានសរសេរដូច្នេះថា ៖ «លោក ហៃ វណ្ណា នឹងត្រឡប់ទៅកាន់ប្រទេសកម្ពុជាជាមួយមេដឹកនាំរបស់គាត់ គឺលោក សម រង្ស៊ី ដែលជាប្រធានស្តីទីគណបក្សសង្គ្រោះជាតិ នៅថ្ងៃទី៩ ខែវិច្ឆិកា ដើម្បីស្តារលទ្ធិប្រជាធិបតេយ្យ និងសិទ្ធិមនុស្សឡើងវិញនៅកម្ពុជា ។ ដូច្នេះហើយ ខ្ញុំសូមអំពាវ
នាវឱ្យសហគមន៍អន្តរជាតិធ្វើការឃ្លាំមើលពីព្រឹត្តិការណ៍នេះផង»។ ជាមួយនឹងការអំពាវនាវនេះ មេបាតុករវ័យក្មេងរូបនេះក៏បានបង្ហាញការគាំទ្រដល់ដំណើរមាតុភូមិនិវត្តន៍របស់លោក សម រង្ស៊ី ផងដែរ ដោយបញ្ជាក់ពីជំហរឈរខាងលោក សមរង្ស៊ី ព្រោះលោកចាត់ទុកថា ដំណើរវិលត្រឡប់របស់លោក សម រង្ស៊ីនេះ គឺដើម្បីលទ្ធិប្រជាធិបតេយ្យ ។
ឆ្លើយតបនឹងការអំពាវនាវនេះដែរ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានប្រតិកម្មយ៉ាងខ្លីថា រាជរដ្ឋាភិបាល និងអាជ្ញាធរកម្ពុជា មិនចាប់អារម្មណ៍បន្តិចសោះឡើយចំពោះការលើកឡើងរបស់មេបាតុករហុងកុងរូបនេះ ហើយថាស្ថានភាពនៅកម្ពុជាមិនដូចនៅហុងកុងនោះទេ ។ ចំពោះផែនការវិលត្រឡប់របស់លោក សម រង្ស៊ី វិញ លោកសុខ ឥសាន បានគូសបញ្ជាក់ជាថ្មីថា អាជ្ញាធរកម្ពុជានឹងចាត់វិធានការទៅតាមផ្លូវច្បាប់ និង បានអះអាងថា វាសនារបស់លោក សម រង្ស៊ី នឹងត្រូវស្ថិតនៅក្នុងពន្ធនាគារបើហ៊ានចូលមកកម្ពុជា ។
ទោះបីជាលោក សម រង្ស៊ី បានប្រកាសយកទឹកដីថៃដើម្បីឈរជើងយ៉ាងណាក្តី ក៏លោក អ៊ូ ច័ន្ទរ័ត្ន អះអាងថាគ្មានលទ្ធភាពមកកម្ពុជានោះទេ ដោយសារថៃមិនចង់ប៉ះពាល់ជាមួយកម្ពុជា និងអាមេរិក ។ លោក អ៊ូ ច័ន្ទរ័ត្ន អតីតសមាជិកគណបក្សសង្គ្រោះជាតិ បានផ្តល់បទសម្ភាសន៍ជាមួយ កោះសន្តិភាពនៅថ្ងៃទី៣ ខែវិច្ឆិកា យ៉ាងដូច្នេះថា៖ «សម រង្ស៊ី គ្មានលទ្ធភាពដើម្បីត្រឡប់ចូលមកក្នុងប្រទេសទេ ។ គាត់ធ្វើបែបនេះនឹងធ្វើឲ្យអ្នកគាំទ្រក្លាយជាអ្នករងគ្រោះចំនួនច្រើន»។ លោកបញ្ជាក់ថា ៖ «ខ្ញុំគ្មានជំនឿថាលោក សម រង្ស៊ី នឹងជាន់ទឹកដីថៃទេ ។ យើងឃើញ ហើយ លោកស្រី មូរ សុខហួរ មានសញ្ជាតិ អាមេរិកផងនៅតែចូលទឹកដីថៃមិនបាន ។ ដូច្នេះខ្ញុំជឿថា ក្រុមគាត់មិនអាចចូលបាននោះទេ»។
លោក អ៊ូ ច័ន្ទរ័ត្ន បន្តថា មូលហេតុចូលមិនបាននោះ ដោយសារថៃមិនចង់ប៉ះពាល់ជាមួយអាមេរិកទេ ហើយថៃក៏មិនចង់ប៉ះពាល់ជាមួយកម្ពុជាដែរ ដោយសារតែថៃមានពាណិជ្ជកម្មជាមួយកម្ពុជាខ្ពស់ ។ ដូច្នេះថៃមិនធ្វើឲ្យប៉ះពាល់ដល់សេដ្ឋកិច្ចរបស់គេនោះទេ ។លោកបន្តថា បើសិនលោក សម រង្ស៊ី មកស្រុកមែននោះ គឺមិនបានផ្តល់លទ្ធផលជាវិជ្ជមានសម្រាប់សង្គមជាតិនោះទេ ។ យុទ្ធសាស្ត្ររបស់លោក សម រង្ស៊ី តាំងពីដើមមកគឺជាយុទ្ធសាស្ត្រមិនគ្រប់ជ្រុងជ្រោយ ដោយគ្មានទទួលលទ្ធផលចុងក្រោយ ហើយធ្វើដោយប្រថុយ ។ ដូច្នេះលោក សម រង្ស៊ី បាននិងកំពុងរុញខ្លួនឲ្យផុត តាមរយៈយុទ្ធសាស្ត្រមិនគ្រប់ជ្រុងជ្រោយនេះ ឯង ។
ជាមួយគ្នានេះ លោក អ៊ូ ច័ន្ទរ័ត្ន បានលើកឡើងថា យុទ្ធសាស្ត្ររបស់លោក សម រង្ស៊ី បាននិងកំពុងតែរុញច្រានអ្នកគាំទ្រខ្លួនឲ្យរងគ្រោះហើយទីបំផុតមិនទទួលបានលទ្ធផលជាវិជ្ជមាននោះទេ ក្នុងការរកដំណោះស្រាយនយោបាយ។ លោកបញ្ជាក់ថា៖ «រងគ្រោះនេះ យើងឃើញ មិនទាន់ថ្ងៃ៩វិច្ឆិកាមកដល់ផង អ្នកដែលចួលរួមក្តី ហើយអ្នកខ្លះមិនយល់ពីផែកការរបស់គាត់ក្តី ក៏បានក្លាយជាជនរងគ្រោះ ដោយសារការចាប់ខ្លួនពីដីកាតុលាការ ។ លើសពីនេះ បើគាត់មិនត្រឡប់មកស្រុកវិញ ហើយពលករមួយចំនួនដែលចាំហែហម និងសម្រេចចិត្តមកដោយគ្មានគាត់ នឹងក្លាយជាជនរងគ្រោះ ដោយប្រឈមជាមួយអាជ្ញាធរនិងកងកម្លាំងប្រដាប់វុធ»។
លោកបានលើកឡើងថា ភាគីទាំងក្រុមលោក សម រង្ស៊ី និងរាជរដ្ឋាភិបាល មិនគួរយកខ្មែរនិងខ្មែរទៅបញ្ជល់គ្នានោះដែរ សម្រាប់សម័យកាលនេះ ។ ទោះជាយ៉ាងណាក្តី លោក អ៊ូ ច័ន្ទរ័ត្ន ដែលធ្លាប់ជាអ្នកនយោបាយជាមួយអតីតគណបក្សប្រឆាំងអះអាងថា លោក សម រង្ស៊ី កំពុងធ្វើនយោបាយមួយដែលមិនអាចអត់លោក កឹម សុខា បាន ដោយរុញច្រានលោក កឹម សុខា ឲ្យនៅតែជាដៃគូរហូត ។ ដូច្នេះបើសិនជាលោក កឹម សុខា នៅតែជាដៃគូរហូតនោះ លោក កឹមសុខា នៅតែបន្តជាប់ឃុំឃាំងដោយមិនអាចថ្លែងបាន ។លោកគូសបញ្ជាក់ថា៖ «ខ្ញុំនៅតែគិតថា កឹមសុខា នៅតែជនរងគ្រោះក្នុងល្បែងនយោបាយ របស់លោក សម រង្ស៊ី ។ កឹម សុខា កំពុងក្លាយជាកូនអុក ឬចំណាប់ខ្មាំងរបស់ សម រង្ស៊ីសម្រាប់ធ្វើនយោបាយ ។ ជាក់ស្តែង ដូចជាការយកសេរីភាពលោក កឹម សុខា មកភ្នាល់គ្នា ធ្វើឲ្យ កឹម សុខា ជាប់ឃុំរហូត ។ ជាក់ស្តែងភ្នាល់គ្នាមកដល់ថ្ងៃ ៩វិច្ឆិកានេះ អស់ពេលច្រើនខែមកហើយ» ។
លោក អ៊ូ ច័ន្ទរ័ត្ន បានលើកឡើងថា លោក សម រង្ស៊ី បានកំពុងតែបិទសេរីភាពលោក កឹម សុខា ដោយអាងខ្លួនមានសេរីភាពនៅខាងក្រៅចេះតែស្រែករហូត ។ លោកថា៖ «នយោបាយសម រង្ស៊ី មិនមែនមានភាពចាស់ទុំនោះទេ នៅក្នុងសង្គមប្រជាធិបតេយ្យ ឬនៅក្នុងប្រទេសកំពុងអភិវឌ្ឍន៍នោះ» ។ លោកគូសបញ្ជាក់ទៀតថា ៖ «សម រង្ស៊ីបាននិងកំពុងធ្វើយុទ្ធសាស្ត្រខុសហើយ អ្នកដែលរុញឲ្យគាត់ធ្វើដោយអះអាងថាអាយុចាស់ហើយជានយោបាយចុងក្រោយនោះ គឺជាការខុស ព្រោះថា យើងមិនអាចធ្វើនយោបាយសម្រាប់បុគ្គលម្នាក់នោះទេ ។ បើតាមលោក អ៊ូ ច័ន្ទរ័ត្ន បានលើកឡើងថា បើសិនលោក សម រង្ស៊ី មកស្រុកវិញមែន មានតែអ្នកគាំទ្រមួយចំនួនតិច ហើយអ្នកគាំទ្រនោះនឹងអន់ថយនៅថ្ងៃបន្តបន្ទាប់ ។ សូមជម្រាបថា លោក សម រង្ស៊ី និងបក្ខពួកបានសម្រេចយកទឹកដីថៃជាកន្លែងឈរជើង ដើម្បីចូលមកស្រុកខ្មែរវិញនៅថ្ងៃទី៩ ខែវិច្ឆិកា ខាងមុខនេះ ។
យោងតាមសេចក្តីថ្លែងការណ៍របស់អតីតគណបក្សសង្គ្រោះជាតិចេញផ្សាយនៅថ្ងៃទី២ ខែ វិច្ឆិកា បានលើកឡើងថា «ទោះជាមានការទប់ស្កាត់តាមគ្រប់មធ្យោបាយយ៉ាងណាក៏ដោយ ក៏លោក សម រង្សុី និងថ្នាក់ដឹកនាំគណបក្សសង្គ្រោះជាតិ នៅតែប្រកាន់ជំហរយ៉ាងម៉ឺងម៉ាត់ ក្នុងការវិលត្រឡប់មកមាតុភូមិកម្ពុជាវិញ នៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ តាមការគ្រោងទុក ដោយឥតប្រែប្រួល ហើយគណៈកម្មការរៀបចំដំណើរមាតុភូមិនិវត្តន៍របស់ថ្នាក់ ដឹកនាំគណបក្សសង្គ្រោះជាតិ បានកំណត់យកប្រទេសថៃជាច្រកឆ្លងកាត់ចូលមកកាន់ប្រទេសកម្ពុជា» ។ លោក អ៊ូ ច័ន្ទរ័ត្ន បានលើកឡើងថា ប្រសិន បើរាជរដ្ឋាភិបាលចាត់វិធានការក្តៅចំពោះអ្នកគាំទ្រលោក សម រង្ស៊ី ចូលស្រុកនោះ ជៀសមិនផុតនោះទេដែលអាចនឹងមានសម្ពាធផ្សេងៗពីអន្តរជាតិ ៕
ចែករំលែកព័តមាននេះ