រាជធានីភ្នំពេញ ៖ រថយន្តកាមរីឆ្លាមមួយគ្រឿងជិះជាលក្ខណៈគ្រួសារ ខណៈត្រឡប់មកពីបុណ្យកឋិនវិញ សង្ស័យបើកបរក្នុងស្ថានភាពមេឃកំពុងតែភ្លៀងមើលផ្លូវមិនច្បាស់ ក៏ជ្រុលទៅបុកក្បាលនាគពុះចែកផ្លូវ បណ្ដាលឲ្យរងការខូចខាត កាលពីវេលាម៉ោង១០យប់ថ្ងៃទី៣ ខែវិច្ឆិកា ឆ្នាំ២០១៩…
រាជធានីភ្នំពេញ ៖ រថយន្តកាមរីឆ្លាមមួយគ្រឿងជិះជាលក្ខណៈគ្រួសារ ខណៈត្រឡប់មកពីបុណ្យកឋិនវិញ សង្ស័យបើកបរក្នុងស្ថានភាពមេឃកំពុងតែភ្លៀងមើលផ្លូវមិនច្បាស់ ក៏ជ្រុលទៅបុកក្បាលនាគពុះចែកផ្លូវ បណ្ដាលឲ្យរងការខូចខាត កាលពីវេលាម៉ោង១០យប់ថ្ងៃទី៣ ខែវិច្ឆិកា ឆ្នាំ២០១៩ នៅចំណុចទល់មុខក្រសួងមហាផ្ទៃ តាមបណ្តោយផ្លូវព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចំការមន ។
រថយន្តមួយគ្រឿងខាងលើម៉ាកកាមរីឆ្លាម ពណ៌ប្រផេះ ពាក់ស្លាកលេខ ភ្នំពេញ ២U-៧១១៥ អ្នកបើកបរមិនស្គាល់អត្តសញ្ញាណ ។
តាមប្រភពពីម្ចាស់រថយន្តខាងលើបានឲ្យដឹងថា មុនពេលកើតហេតុ គាត់បានបើករថយន្តមួយគ្រឿងម៉ាកកាមរីឆ្លាមមានដឹកក្រុមគ្រួសារចេញពីបុណ្យកឋិននៅខេត្តព្រៃវែង ក្នុងគោលបំណងត្រឡប់ទៅផ្ទះវិញ នៅម្ដុំសាលាលេខ៥ ខេត្តកំពង់ឆ្នាំង ។
តាមប្រភពដដែលបានបន្តថា ខណៈគាត់បើករថយន្តមួយគ្រឿងខាងលើធ្វើដំណើរតាមផ្លូវព្រះនរោត្តម ក្នុងទិសដៅពីត្បូងទៅជើង លុះមកដល់ចំណុចកើតហេតុ ដោយសារតែមេឃភ្លៀងខ្លាំង ធ្វើឲ្យគាត់មើលផ្លូវមិនច្បាស់ ទើបជ្រុលទៅបុកក្បាលនាគពុះចែកផ្លូវ បណ្ដាលឲ្យរងការខូចខាតអស់ចំនួន១កង់ ចំណែករថយន្តរងការខូចខាតខ្ទេចផែ្នកខាងមុខចំហៀងខាងឆ្វេង តែមិនមានគ្រោះថ្នាក់ដល់មនុស្សដែលជិះនៅក្នុងរថយន្តនោះទេ ។
ក្រោយពេលកើតហេតុ គេឃើញកម្លាំងសមត្ថកិច្ចមូលដ្ឋាននិងជំនាញចរាចរណ៍បានចុះទៅកន្លែងកើតហេតុ រួចហើយក៏បានស្ទូចយករថយន្តមួយគ្រឿងខាងលើទៅរក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញដើម្បីរង់ចាំធ្វើការដោះស្រាយនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ