ប្រទេសថៃ ៖ ក្នុងកិច្ចប្រជុំកំពូលប្រចាំឆ្នាំលើកទី៣៥ ដែលបើកធ្វើកាលពីថ្ងៃទី២វិច្ឆិកានៅក្រុងបាងកក បណ្ដាមេដឹកនាំអាស៊ានបានស្នើឲ្យមានការបើកចំហទីផ្សារតំបន់ ហើយកិច្ចប្រជុំកំពូលនោះផ្ដោតលើសន្ធិសញ្ញាផ្លាស់ប្ដូរសេរីអាស៊ីប៉ាស៊ីហ្វិក ដូចការជម្រុញរបស់ចិន។
ចិនដែលកំពុងមានសង្គ្រាមពាណិជ្ជកម្មជាមួយសហរដ្ឋអាមេរិក ប៉ុនប៉ងពង្រឹងឥទ្ធិពលរបស់ខ្លួនដោយការពារកិច្ចព្រមព្រៀងនោះដែលគេហៅថា ភាពជាដៃគូសេដ្ឋកិច្ចតំបន់គ្រប់ជ្រុងជ្រោយ។ ប្រសិនបើត្រួវបានអនុម័ត នោះនឹងជាការផ្លាស់ប្ដូរសេរីធំជាងគេបំផុតនៃពិភពលោក ជាមួយប្រជាជនជិតពាក់កណ្ដាលនៃចំនួនប្រជាជនពិភពលោក និងតំណាងឲ្យជាង៣០%នៃផលទុនសរុបរបស់ពិភពលោក។
ពេលបើកកិច្ចប្រជុំកំពូលនោះនាយករដ្ឋមន្ត្រីថៃ លោកប្រាយុទ្ធចាន់អូចាថ្លែងថា គេត្រូវផ្ដល់អាទិភាពដល់កិច្ចសហប្រតិបត្តិការតំំបន់ ជាមួយទិសដៅការតភ្ជាប់គ្នាដ៏ធំរវាងបណ្ដាប្រទេសរបស់យើង។ ចំណែកសមភាគីម៉ាឡេសីុលោកមហាធៀរម៉ូហាម៉ាត់អះអាងថា គេត្រូវប្រើដោយពេញលេញកម្លាំងរឹងមាំរបស់យើងក្នុងទីផ្សារយើង។
កិច្ចប្រជុំកំពូលនោះបើកធ្វើពីថ្ងៃទី២ដល់ថ្ងៃទី៤វិច្ឆិកាក្នុងរាជធានីថៃ ដោយមានការចូលរួមរបស់មេដឹកនាំនៃប្រទេសអាស៊ានទាំង១០។ ប្រធានាធិបតីកូរ៉េខាងត្បូងលោកMOON JAE IN នាយករដ្ឋមន្ត្រីចិនលោកLI KEQIANG នាយករដ្ឋមន្ត្រីរុស្ស៊ីលោកឌីមីឌ្រីម៉េដវេដេវនិងនាយករដ្ឋមន្ត្រីជប៉ុនលោកសីុនហ្សួអាបេ ក៏អញ្ជើញមកចូលរួមក្នុងកិច្ចប្រជុំកំពូលប្រចាំឆ្នាំនេះដែរ។ លោកដូណាល់ត្រាំអវត្តមានក្នុងកិច្ចប្រជុំនោះ ដោយបញ្ជូនតំណាងលោកWILBUR ROSSរដ្ឋមន្ត្រីពាណិជ្ជកម្មនិងទីប្រឹក្សាសន្តិសុខជាតិលោកROBERT O’BRIENមកជំនួស។
លោកTHITINAN PONGSUDHIRAKនៃសាកលវិទ្យាល័យជូឡាឡុងកនក្រុងបាងកកយល់ថា ដោយបណ្ដោយឲ្យក្រុងប៉េកាំងគ្របដណ្ដប់លើតំបន់នេះ អាមេរិកបានបង់ឱកាស ក្នុងការឈរជើងនៅទីនោះ។ ក្នុងកិច្ចប្រជុំកំពូល៣ថ្ងៃនោះ ចិនប៉ុនប៉ងធ្វើឲ្យកិច្ចព្រមព្រៀងផ្លាស់ប្ដូរសេរីអាស៊ីប៉ាស៊ីហ្វិកមានការជឿនលឿនទៅមុខ។
លើកឡើងកាលពីឆ្នាំ២០១២គម្រោងនោះចូលរួមដោយប្រទេសទាំង១០ជាមាជិកអាស៊ាន ព្រមទាំងចិន ឥណ្ឌា ជប៉ុន កូរ៉េខាងត្បូង អូស្ត្រាលី និងនូវែលហ្សេឡង់។ ប្រទេសទីម័រខាងកើតដែលបានដាក់បេក្ខភាពចូលអាស៊ានតាំងពីថ្ងៃទី២៣កក្កដាឆ្នាំ២០០៦មក ត្រូវចូលជាសមាជិកអាស៊ានថ្មីចាប់ពីចុងឆ្នាំ២០១៩នេះទៅ៕ (កែសម្រួលដោយ ៖ បុប្ផា)
ចែករំលែកព័តមាននេះ