ក្រុងហុងកុង ៖ ក្នុងបាតុកម្មកាលពីថ្ងៃទី២វិច្ឆិកានៅក្រុងហុងកុង ប៉ូលិសបានប្រើធម៌ក្ដៅ ដោយបង្កើនការចាប់ខ្លួនបាតុករ ស្និទ្ធលទ្ធិប្រជាធិបតេយ្យច្រើននាក់ និងឲ្យពួកគេលុតជង្គុង លើកដៃឡើងលើ រួចបុរសនិងនារីត្រូវបំបែកចេញពីគ្នា។
តាមបណ្ដាញសង្គមគេឃើញរូបភាពនៃការចាប់ខ្លួនដ៏ច្រើន ក្នុងឱកាសនៃបាតុកម្មថ្មីនាថ្ងៃទី២វិច្ឆិកា។ ក្បួនហែរបស់បាតុកម្មដោយគ្មានការអនុញ្ញាតត្រូវបានប្រែក្លាយយ៉ាងឆាប់រហ័សទៅជាការប៉ះទង្គិចគ្នាជាមួយប៉ូលិស ដែលបង្កើនការចាប់ខ្លួន។ ដូចរូបភាពក្នុងវីដេអូគេអាចឃើញសភាពនៃការប៉ះទង្គិចគ្នា រវាងប៉ូលិសនិងពួកបាតុករពោរពេញដោយហិង្សា ដែលលើកនេះហាក់មានភាពកាន់តែពុះកញ្ជ្រោល ៥ខែក្រោយបាតុកម្មដំបូងនៅដែនដីអតីតអាណានិគមអង់គ្លេសនោះ។
ទោះជាមានការព្រមានថ្មីរបស់ក្រុងប៉េកាំង បាតុកម្មហិង្សានៅបន្តហើយការចាប់ខ្លួនមនុស្សមានការកើនឡើង។ ដូចការបង្ហោះរូបភាពរបស់ពួកបាតុករតាមបណ្ដាញសង្គម ពួកបាតុករត្រូវគេឲ្យលុតជង្គង់ លើកដៃឡើងលើហើយបុរសនិងនារីត្រូវបំបែកចេញពីគ្នា។ ដូចបាតុកម្មលើកមុនៗដែរ បាតុកម្មពេលនេះក៏គ្មានការអនុញ្ញាត។
ជាមួយការបាញ់ឧស្ម័នបង្ហូរទឹកភ្នែកនិងកាណុងបាញ់ទឹក ប៉ូលិសបានដេញតាមប្រមាញ់បណ្ដាក្រុមអ្នកតវ៉ាដែលរាំងខ្ទប់ផ្លូវនានា និងបង្កើតរបាំងរាំងផ្លូវ ព្រមទាំងអុកឡុកវាយបំផ្លាញហាងទំនិញនានា ព្រមទាំងគប់បំបែកកញ្ចក់ការិយាល័យរបស់ទីភ្នាកងារព័ត៌មានរដ្ឋចិនស៊ីនហួ។
ឧប្បត្តិហេតុបែបនេះបន្ទាប់មករាលដាលដល់សង្កាត់ឯទៀតៗនៃក្រុងហុងកុង។ក្រោយឧប្បត្តិហេតុមួយក្នុងចំណោមឧប្បត្តិហេតុទាំងនេះ គេឃើញមនុស្សប្រមាណជា១០០នាក់ត្រូវចាប់ខ្លួន ហើយប៉ូលិសនាំខ្លួនពួកគេទៅតាមរថយន្តក្រុង៕ (កែសម្រួលដោយ ៖ បុប្ផា)
ចែករំលែកព័តមាននេះ