ខេត្តបន្ទាយមានជ័យ ៖ ការពិការមានច្រើនប្រភេទ ខ្លះពីកំណើត ខ្លះដោយសារឧប្បត្តិហេតុផ្សេងៗ ហើយខ្លះទៀតដោយសារតែសង្គ្រាម។ តែអកុសលជនពិការប្រុសស្រី3នាក់ មានទាំងកូនតូចបីក្នុងដៃផងនោះ រស់នៅដោយលំបាក មើលទៅពិតជាគួរឲ្យសង្វេគ ទៅណាមកណាត្រូវតោងដៃគ្នាអាស្រ័យលើបុរសម្នាក់ដែលពិការភ្នែកម្ខាង ហើយភ្នែកម្ខាងទៀតមើលបាន តែមិនដល់50ភាគរយ ថែមទាំងមើលមិនបានឆ្ងាយទៀតផង។
ជនពិការទាំង3នាក់ខាងលើនេះ មាន2នាក់ជាប្តីប្រពន្ធ ដោយឈ្មោះឆន តុង ភេទប្រុសអាយុ35ឆ្នាំ និងឈ្មោះ ប្រាក់ សាវេត ភេទស្រី អាយុ24ឆ្នាំ ស្នាក់នៅចល័ត និងមានទីលំនៅភូមិច្រម៉ាស់ ឃុំនិងស្រុកប្រាសាទសំបូរ ខេត្តកំពង់ធំ (ប្តីពិការភ្នែកម្ខាង ចំណែកប្រពន្ធពិការភ្នែកទាំង2)។ ចំណែស្ត្រីម្នាក់ទៀតឈ្មោះ កៅ យ៉ែម ភេទស្រី អាយុ35ឆ្នាំ មានទីលំនៅភូមិពោធិ ឃុំពង្រក្រោម ស្រុកជីក្រែង ខេត្តសៀមរាប (ពិការភ្នែកទាំង2) គឺជាមិត្តភក្តិរបស់បុរសពិការខាងលើ។
គ្រួសាពិការខាងលើ ដែលបុរសជាប្តី អះអាងថា ការពិការនេះ មានតាំងពីអាយុ4ខែមកម្ល៉េះ ដោយសារតែទឹកសាប៊ូ ។ ឯនាងជាប្រពន្ធអះអាងថា ពិការកាលពីអាយុ8ឆ្នាំ ដោយសារជំងឺកញ្ជ្រិល។ ទោះជាយ៉ាងណា គ្រួសាមួយនេះក៏នៅតែចាប់ដៃគ្នាជាប្តីប្រពន្ធបង្កើតបានកូនស្រី2នាក់ មានអវៈយវៈគ្រប់គ្រាន់ជាចំណងដៃ។ ចំណែកស្ត្រីពិការឈ្មោះកៅយ៉ែមវិញ អះអាងថា បានធ្លាក់ខ្លួនពិការតាំងពីកំណើត។
ជនពិការទាំង3នាក់នេះ រស់នៅប្រៀបដូចជាគ្រួសាតែមួយ គឺស្នាក់នៅជុំគ្នា និងទៅណាមកណាជុំគ្នារហូត។ ហើយពួកគាត់ទាំង៣នាក់បានប្រាប់ថា បច្ចុប្បន្ននេះរស់អាស្រ័យលើការចល័តទីតាមបណ្តាខេត្តនានា ដោយដាក់ធុងបាស់ និងអំភ្លីស្រែកច្រៀង ដើម្បីសុំថវិកាពីអ្នកស្រុក ដោយធ្វើដំណើរម្តងទៅខេត្តនេះ និងម្តងទៅខេត្តនោះ។
ពួកគាត់បន្តទៀតថា ការចល័តទីដោយដាក់ធុងបាស់ស្រែកច្រៀងរកប្រាក់ចិញ្ចឹមជីវិតនេះពេលខ្លះក៏មានការថ្នាំងថ្នាក់ពីអ្នកដទៃដែរ តែក៏ចេះតែសុំអង្វរគេទៅ ធ្វើម្តេចបើជីវិតពួកគាត់បែបហ្នឹងទៅហើយ ជាពិសេសដើម្បីចិញ្ចឹមកូនស្រីទាំង2នាក់ដែលនៅតូចៗឲ្យមានអនាគតនឹងគេ។
គ្រួសារជនពិការទាំង៣នាក់បន្តថា អ្វីដែលកាន់តែខ្លោចចិត្តអាណិតថែមទៀតនោះ បុរសពិការភ្នែកខាងលើ បានក្លាយជាអ្នកបើកបរម៉ូតូសណ្តោងរ៉ឺម៉កដឹកប្រពន្ធ និងមិត្តភក្តិស្រី ព្រមទាំងកូនទៅណាមកណាទៀតផង។ ហើយជនពិការទាំង3នាក់ខាងលើ បានសុំពាវនាវយ៉ាងទទូចដល់សប្បុរសជនទាំងក្នុង និងក្រៅប្រទេស មេត្តាជួយដល់ពួកគេផង ជាពិសេសអ្នកស្រុក សូមមេត្តាយោគយល់ពេលពួកគេដាក់ទីតាំងលក់សម្លេង ដើម្បីចិញ្ចឹមជីវិត ព្រោះគ្មានប្រាក់ខែឡើយ។ (កែសម្រួលដោយ ៖ បុប្ផា)
ចែករំលែកព័តមាននេះ