រាជធានីភ្នំពេញ ៖ នៅក្នុងរយៈពេលប៉ុន្មានថ្ងៃចុងក្រោយនេះ បណ្តាអ្នកលេងហ្វេសប៊ុកបាននាំគ្នាសម្តែងការភ្ញាក់ផ្អើល និងបានចែកចាយនូវវីដេអូស្តីពីសកម្មភាពតារាសម្តែងខ្មែរប្រុសស្រីមួយគូ បានអោបថើបគ្នាយ៉ាងស្រើបស្រាលនៅក្នុងការសម្តែងបទចម្រៀងមួយបទ។ វីដេអូមួយនេះ បាននាំឲ្យមហាជន ជាពិសេសអ្នកដែលលេងហ្វេសប៊ុកនាំគ្នាយកមកជជែកគ្នាយ៉ាងផុសផុល ជាមួយនឹងសម្លេងរិះគន់យ៉ាងកងរំពង ក្នុងពេលដែលសកម្មភាពមួយនេះត្រូវបានចាត់ទុកថា បានបំពុលដល់តម្លៃនៃសិល្បៈខ្មែរផងដែរ។
ជាមួយនឹងសកម្មភាពនេះ លោក ហេង ឡុង ទេសាភិបាលសមាគមសិល្បៈករខ្មែរក៏បានចូលរួមក្នុងការរិះគន់ផងដែរ ដោយលោកបានបង្ហោះសារថា ដើម្បីតែខ្លួនល្បី អ្វីក៏ហ៊ានធ្វើដែរ។ លោកបញ្ជាក់ថា ថ្មីៗនេះ មាន MV វីដេអូមួយ ថតបង្ហាញភាពសិចស៊ីជ្រុល ខ្ញុំបានទាក់ទៅក្រសួងវប្បធម៌ និងវិចិត្រសិល្បៈហើយ ក្រសួងកំពុងតែស្វែងរកព័ត៌មានលម្អិតពាក់ព័ន្ធនឹងផលិតកម្មដែលផលិតឃ្លីបវីដេអូនេះ។
លោកបន្តថា បើតាមព័ត៌មានមិនទាន់ផ្លូវការបានបញ្ជាក់ថា ឃ្លីបវីដេអូនេះមិនមែនផលិតដោយផលិតកម្មដែលមានច្បាប់អនុញ្ញាតត្រឹមត្រូវនោះទេ នេះបើតាមការឲ្យដឹងពីលោក ប៉ុក បូរក្ស ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ។
ជុំវិញបញ្ហាខាងលើនេះ នាយកដ្ឋានភាពយន្ត និងផ្សព្វផ្សាយវប្បធម៌ក៏បានបង្ហោះសារតាមផេករបស់ខ្លួនថា ករណីនៃសកម្មភាពថត Music Video បទ «សង្សារផិត មិត្តក្បត់» ដែលបានបង្ហាញពីការអោបថើបរវាងតួអង្គប្រុសស្រី មានលក្ខណៈស្រើបស្រាល ប្រាសចាកពីប្រពៃណី វប្បធម៌ជាតិ និងបង្ហោះក្នុងបណ្តាញទំនាក់ទំនងសង្គម កាលពីពេលថ្មីៗនេះ នាយកដ្ឋានសិល្បភាពយន្ត នៃក្រសួងវប្បធម៌ និងវិចិត្រសិល្បៈ កំពុងស្វែករក ក្រុមផលិត MV នេះ ដើម្បីធ្វើការព្រមាន និងចាត់វិធានការ។
ពាក់ព័ន្ធបញ្ហានេះតារាស្រីដែលសម្តែងនៅក្នុងឈុតមួយនេះនាង ហាស់ វីរ៉ាស្រីរ័ត្ន ហៅRose បានអះអាងប្រាប់កោះសន្តិភាពតាមសារអេឡិចត្រូនិចនៅថ្ងៃនេះថា អ្វីដែលមហាជនបានឃើញនៅក្នុងវីដេអូនេះ គឺជាឈុតក្រៅឆាកនៅក្នុងបទចម្រៀងប៉ុណ្ណោះ។ នាងបញ្ជាក់ថា នៅក្នុងបទចម្រៀងទាំងមូល គឺមិនមានឈុតនេះទេ គឺមានតែតួស្រី និងតូប្រុសដើរប៉ះគ្នានៅពីក្រោយឡានប៉ុណ្ណោះ ពោលគឺមិនមានអ្វីលើសពីនេះឡើយ។
បើតាម ហាស់ វីរ៉ាស្រីរ័ត្ន បន្តថា ឈុតអោបថើបនេះ គឺតួប្រុសបានថតលេងដោយឱ្យមិត្តភក្តិម្នាក់ទៀតយកទូរស័ព្ទ ដើម្បីបង្ហោះលេង ប៉ុន្តែក្រោយពីបង្ហោះទៅឃើញថា មិនសមរម្យទើបតួប្រុសនោះបានលុបចេញវិញ តែនាងមិនដឹងអ្នកណាដែលយកទៅបង្ហោះបន្តនោះឡើយ។
យ៉ាងណាជុំវិញការរិះគន់ពីមហាជនចំពោះសកម្មភាពមួយនេះ នាងមិនធ្វើការអធិប្បាយ ឬបកស្រាយយ៉ាងណានោះឡើយ ព្រោះនេះជាសិទ្ធិរបស់មហាជន ខណៈពេលដែលនាងក៏គ្មានសិទ្ធិទៅហាមឃាត់គេមិនឲ្យរិះគន់នោះឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ