រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសស្ត្រី២នាក់ប្តីប្រពន្ធជិះម៉ូតូចេញពីកម្មវិធីជប់លៀងឡើងផ្ទះបងប្អូនត្រឡប់មកវិញ ក៏ត្រូវក្រុមជនសង្ស័យធាក់វាយប្លន់យកម៉ូតូម៉ាកស្កុបពីស៊េរី២០២០បានសំរេច បង្កឲ្យមានការភ្ញាក់ផ្អើលកាលពីម៉ោង៨និង២០នាទីយប់ ថ្ងៃទី១ ខែវិច្ឆិកា ឆ្នាំ២០១៩ នៅតាមបណ្តោយផ្លូវបេតុងជិតវត្តអង្គរជ័យសង្កាត់ស្នោរ ខណ្ឌកំបូល។
សេចក្តីរាយការណ៍បន្តថា ជនរងគ្រោះមានឈ្មោះ សេង ថា ភេទប្រុស អាយុ39ឆ្នាំ មុខរបរកសិករ ភូមិតាពិចឃុំ ឈ្វាំង ស្រុកពញាឭ នៅខេត្តកណ្តាល ចំណែកម៉ូតូដែលជនសង្ស័យ ប្លន់បានសំរេច ម៉ាកស្កុបពី ពណ៌ស អ៊ុតតែមពណ៌ទឹកមាស ពាក់ស្លាកលេខ កណ្តាល 1AF-1320 ។
បើតាមប្រភពពីជនរងគ្រោះ បានឱ្យដឹងថា នៅមុនកើតហេតុ ជនរងគ្រោះធ្វើដំណើរមកពីកម្មវិធីជប់លៀងឡើងផ្ទះបងប្អូននៅម្តុំកំបូល ដោយជិះ២នាក់ប្តីប្រពន្ធ ខណៈកំពុងធ្វើដំណើរទៅផ្ទះវិញ លុះបើកមកដល់ចំណុចកើតហេតុ ឃើញជនសង្ស័យជិះម៉ូតូម៉ាកហុងដាឌ្រីម ជិះគ្នា៣នាក់ តាមពីក្រោយ។ ពេលនោះដោយជនរងគ្រោះមិនដឹងថា ជាក្រុមចោរនោះទេ លុះនៅដល់ជិតរបងវត្ត ស្រាប់តែជនសង្ស័យជិះមកធាក់ម៉ូតូជនរងគ្រោះ បណ្តាលឲ្យដួលរងរបួសទាំង២នាក់ប្តីប្រពន្ធ ដោយប្តីប៉ោងភ្នែកខាងឆ្វេង ហើយប្រពន្ធរលាត់ជង្គង់ទាំង២ ហើយពេលនោះជនសង្ស័យម្នាក់ចុះមកលើកម៉ូតូរបស់គាត់ជិះរត់គេចខ្លួនបាត់។
ប្រភពពីជនរងគ្រោះ បានបន្តទៀតថា ខណៈពេលដែលជនសង្ស័យប្លន់ជនរងគ្រោះភ្លាមៗ ដោយជនរងគ្រោះភិតភ័យខ្លាំងពេកបានរត់ឱ្យលោកសង្ឃនៅក្នុងវត្តជួយ ហើយនៅពេលនោះដែរ កូនសិស្សលោកក៏បានតេទៅប្រាប់សមត្ថកិច្ចភ្លាមៗផងដែរ ។
ក្រោយពេលកើតហេតុ ជនរងគ្រោះទាំង២នាក់ប្តីប្រពន្ធ ត្រូវបានសមត្ថកិច្ចនាំមកដាក់ពាក្យបណ្ដឹងភ្លាមៗផងដែរ ដើម្បីសួរនាំនឹងកំណត់មុខសញ្ញា និងស៊ើបសង្កេតមុខសញ្ញាមកផ្តន្ទាទោសតាមច្បាប់ ។ (កែសម្រួលដោយ ៖ បុប្ផា)
ចែករំលែកព័តមាននេះ