ឃុន ច័ន្ទមូនណា អតីត Freshie Girls លេខ៥ ចោលស្នេហាស្រវាសិល្បៈ
- ភ្នំពេញ
រាជធានីភ្នំពេញ ៖ អតីត Freshie Girls លេខ៥ កាលពីឆ្នាំ២០១៣ កញ្ញា ឃុន ច័ន្ទមូនណា…
រាជធានីភ្នំពេញ ៖ អតីត Freshie Girls លេខ៥ កាលពីឆ្នាំ២០១៣ កញ្ញា ឃុន ច័ន្ទមូនណា បានអះអាងថា នាងបានបដិសេធស្នេហ៍ពីបុរសជាបន្តបន្ទាប់ ដើម្បីចាប់យកអាជីពសម្តែងឲ្យបានពេញដៃ ក្នុងពេលដែលសិល្បៈ គឺជាប្រណងប្រាថ្នារបស់នាងតាំងពីតូច ។
មិនមែនមិនធ្លាប់ទទួលយកស្នេហាពីបុរសណាពីមុននោះទេ ប៉ុន្តែ ឃុន ច័ន្ទមូនណា ក៏ធ្លាប់មានសង្សារម្នាក់ផងដែរ តែបានបែកបាក់គ្នាវិញ ដែលរហូតមកទល់ពេលនេះនាងហាក់ខ្លាចរអា និងមិនទាន់ចង់មានស្នេហាក្នុងពេលនេះឡើយ ។
កញ្ញា ឃុន ច័ន្ទមូនណា បានឲ្យដឹងថា ពេលនេះ អាជីពសិល្បៈរបស់នាងកំពុងតែបោះជំហ៊ានទៅមុខ ដោយនៅក្នុងនោះនាងថតបានជាង ១០ រឿងហើយ ខណៈពេលដែលនាងក៏បានបង្ហាញវត្តមានសម្តែងច្រើននៅក្នុងបទចម្រៀងរបស់លោក ហង្ស សុវណ្ណរិទ្ធ និង ទឹកភ្នែកអាល័យរបស់លោក ខេមរៈ សិរីមន្ត ។
នាងបញ្ជាក់ថា បច្ចុប្បន្ននាងមានការមមាញឹកយ៉ាងខ្លាំងនៅក្នុងវិស័យសិល្បៈនេះ ដោយនាងទទួលយកការសម្តែងជាបន្តបន្ទាប់ ហេតុនេះនាងនៅមិនទាន់ទទួលយកស្នេហ៍នៅក្នុង អំឡុង ពេលនេះឡើយ ដោយទុកពេលប្រឡូកសិល្បៈឲ្យបានរឹងមាំជាមុនសិន ។
ចូលប្រឡូកក្នុងសិល្បៈប្រមាណជា៤ឆ្នាំមកនេះ ឃុន ច័ន្ទមូនណា បានបង្ហាញវត្តមានសម្តែងជាបន្តបន្ទាប់ ហើយសម្រាប់ដើមឆ្នាំក្រោយនេះនាងក៏គ្រោងចេញថតខ្សែភាពយន្ត និងបទចម្រៀងថ្មីៗបន្ថែមទៀតផងដែរ ។
ស្ថិតក្នុងវ័យ២២ឆ្នាំ ឃុន ច័ន្ទមូនណា បានអះអាងថា បើទោះបីជានាងគឺជាតារាសម្តែងជើងថ្មីក៏ដោយ ប៉ុន្តែនាងតែងតែហ្វឹកហាត់សមត្ថភាពខ្លួនឯងបន្ថែម ដើម្បីទទួលបានការគាំទ្រពីទស្សនិកជនឲ្យកាន់តែច្រើន ។
នាងបញ្ជាក់ថា ក្រៅពីខិតខំចាប់យកការសម្តែងនេះ នាងក៏មិនភ្លេចសិក្សារៀនសូត្រទៅលើមុខជំនាញរកស៊ីថែមទៀតផងដែរ ព្រោះទៅថ្ងៃមុខនាងក៏ចង់ក្លាយជារកស៊ីម្នាក់ផងដែរ ព្រោះសិល្បៈក៏មិនអាចឲ្យយើងរស់មួយជីវិតដែរ ។
ជាការកត់សម្គាល់នៅពេលដែលនាងបានប្រឡូកក្នុងសិល្បៈ និងមានឈ្មោះបោះសំឡេងម្នាក់ផងនោះ ឃុន ច័ន្ទមូនណា មិនអាចគេចផុតក្រសែភ្នែកបុរសៗដែលមានបំណងប្រលោមស្នេហ៍នោះឡើយ ។ ប៉ុន្តែនាងហាក់មិនសូវជាចាប់អារម្មណ៍ និងទទួលយកនោះឡើយ ដោយសារតែពេលខ្លះនាងគិតថា ជាការស្រឡាញ់ក្លែងក្លាយ ខណៈពេលដែលនាងក៏មិនទាន់ចង់គិតអ្វី ក្រៅពីពង្រឹងអាជីពសិល្បៈនេះឲ្យរឹងម៉ាំជាងនេះ៕ (កែសម្រួលដោយ ៖ បុប្ផា)
ចែករំលែកព័តមាននេះ