រាជធានីភ្នំពេញ៖ ជនសង្ស័យម្នាក់បានធ្វើសកម្មភាពឆ្កឹះសោបន្ទប់ជួលរបស់កម្មការិនីរោងចក្រ រួចចូលទៅសម្ងំក្នុងបំណងលួចទ្រព្យសម្បត្តិ តែត្រូវបានមីងរបស់ម្ចាស់បន្ទប់មកទាន់ក៏ចាក់សោពីខាងក្រៅ រួចរាយការណ៍ប្រាប់សមត្ថកិច្ចឱ្យចុះមកចាប់ខ្លួនបានតែម្តង។
ហេតុការណ៍ខាងលើនេះបានកើតឡើងកាលពីវេលាម៉ោង១០និង៤០នាទីព្រឹកថ្ងៃទី២ ខែវិច្ឆិកា ឆ្នាំ២០១៩ នៅបន្ទប់ជួលមួយកន្លែងស្ថិតក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះចំរើន បញ្ញា ភេទប្រុស អាយុ២៧ឆ្នាំ មុខរបរនិងទីកន្លែងស្នាក់នៅមិនពិតប្រាកដ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ ម្ចាស់បន្ទប់បានចាក់សោត្រឹមត្រូវ ហើយចេញទៅធ្វើការងារបាត់អស់ លុះមកដល់វេលាកើតហេតុ ស្រាប់តែមានជនសង្ស័យម្នាក់បានធ្វើសកម្មភាពឆ្កឹះសោបន្ទប់រួចចូលសម្ងំ ក្នុងគោលបំណងលួចទ្រព្យសម្បត្តិ តែត្រូវបានមីងរបស់ម្ចាស់បន្ទប់មកទាន់ ក៏ចាក់សោពីខាងក្រៅ រួចរាយការណ៍ទៅសមត្ថកិច្ចឱ្យចុះមកឃាត់បានភ្លាមៗតែម្តង។
បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌនៃអធិការនគរបាលខណ្ឌពោធិ៍សែនជ័យដើម្បីចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ