ខេត្តកំពត ៖ មានករណីអំពើហិង្សាមួយបានកើតឡើងកាលពីវេលាម៉ោង៨និង១៥នាទីយប់ថ្ងៃទី១ ខែវិច្ឆិការ ឆ្នាំ២០១៩ នៅចំណុចដីចំការមួយកន្លែងខាងជើងភ្នំជប់ ស្ថិតក្នុងភូមិថ្មី ឃុំថ្មី ស្រុកទឹកឈូ ខេត្តកំពត ។
យោងតាមប្រភពព័ត៌មានពីស្ត្រីម្នាក់ឈ្មោះ ឡុច អូន អាយុ៣៤ឆ្នាំ ត្រូវជាប្រពន្ធជនរងគ្រោះ និងជាម្តាយចុងរបស់ជនដៃដល់បានឲ្យ កោះសន្តិភាព ដឹងថា មុនពេលកើតហេតុប្អូនប្រុសរបស់ជនដៃដល់ឈ្មោះ សន ទូច អាយុ២៥ឆ្នាំ មុខរបរបើករថយន្តដឹកដីដូចជនដៃដល់ជាបងដែរបានមកលេងផ្ទះឪពុក ដែលកូនបងជាជនដៃដល់រស់នៅក្នុងបន្ទុកជាមួយឪពុកដែរ ។
ប្រភពដដែលបានបន្តថា ក្រោមមិនដឹងជាមានមូលហេតុអ្វីកូនប្រុសទាំងពីរបានទាស់សំដីគ្នា ដោយជនដៃដល់រកប្រើអំពើហិង្សាមកលើកូនប្រុសប្អូនពេលឃើញដូច្នេះឪពុកជាជនរងគ្រោះក៏បានទៅឃាត់កូនទាំងពីរកុំឈ្លោះគ្នា និងរារាំងកុំឲ្យកូនច្បងជាជនដៃដល់ប្រើហិង្សាទៅលើកូនប្អូន ពេលនោះកូនប្រុសបងជាជនដៃដល់បានកាប់ឪពុកមួយពូថៅចំថ្ងាសខាងឆ្វេងបណ្តាលឲ្យផុងលលាដ៏ក្បាល និងវាយបន្ថែមបាក់ឆ្អឹងដងកាំបិតមួយពូថៅទៀត បណ្តាលឲ្យរងរបួសធ្ងន់
ហើយត្រូវបានប្រពន្ធ និងសាច់ញាតិជិតខាងជួយដឹកទៅសង្គ្រោះនៅមន្ទីរពេទ្យបង្អែកខេត្ត។ ចំណែកជនដៃដល់ជាកូនក្រោយពីធ្វើសកម្មភាពបានរត់គេចខ្លួនបាត់ ។
ជនដៃដល់មានឈ្មោះ សន សុខ ភេទប្រុស អាយុ៣០ឆ្នាំ មុខរបរបើករថយន្តដឹកដី មានប្រពន្ធ និងកូន១នាក់ រស់នៅក្នុងបន្ទុកជាមួយឪពុកដែលជាជនរងគ្រោះឈ្មោះ សោ សាន អាយុ៥៣ឆ្នាំ រស់នៅភូមិឃុំកន្លែងកើតហេតុខាងលើ ។
ប្រភព័ត៌មានពីសាច់ញាតិនៃជនរងគ្រោះបានឲ្យដឹងថា ជនដៃដល់កន្លងមកធ្លាប់ប្រើអំពើហិង្សាមកលើបងប្អូននៅជិតគ្នាដោយវាយគេឲ្យរបួសដេរជាង១០ថ្នេរម្តងរួចមកហើយតែករណីប្រើអំពើហិង្សានោះមិនបានប្តឹងផ្តល់គ្នាទេ ដោយឪពុកចេញមុខផ្សះផ្សារ និងចេញសំណងព្យាបាលដល់
ជនរងគ្រោះដោយគ្មានការប្តឹងផ្តល់អ្វី ទើបតែពេលនេះកូនអកតញ្ញូរូបនេះកាប់អ្នកផ្សះផ្សារដែលជាឪពុកឲ្យរងរបួសធ្ងន់តែម្តង ។
ក្នុងករណីហិង្សាខាងលើនេះត្រូវបានកូនជនរងគ្រោះជាកូនប្អូនបានដាក់ពាក្យបណ្តឹងទៅនគរបាលប៉ុស្តិ៍ដើម្បីតាមស្រាវជ្រាវចាប់ជនដៃដល់ជាបងមកផ្តន្ទាទោសតាមផ្លូវច្បាប់ រីឯសមត្ថកិច្ចក្រោយពីទទួលពាក្យបណ្តឹងកំពុងតាមប្រមាញ់រកជនដៃដល់ដើម្បីឃាត់ខ្លួនយកមកផ្តន្ទាទោសផងដែរ ៕
កែសម្រួលដោយ ៖ សំណាង
ចែករំលែកព័តមាននេះ