ខេត្តបន្ទាយមានជ័យ ៖ កម្លាំងនគរបាលជាង៦០០នាក់ហ្វឹកហាត់បាញ់គ្រាប់ពិតធុនAK47និងធុនB40 ដើម្បីពង្រឹងសមត្ថភាព ដែលបានធ្វើឡើងនៅព្រឹកថ្ងៃទី១ ខែវិច្ឆិកា ឆ្នាំ២០១៩ នៅទីលានជើងភ្នំកងវ៉ា ក្រុងសិរីសោភ័ណ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានមានប្រសាសន៍ថា ការហ្វឹកហាត់បាញ់គ្រាប់ពិតនេះ រួមមានកម្លាំងស្នងការដ្ឋាននគរបាលខេត្តនិងស្រុក-ក្រុង រួមជាមួយកម្លាំងនគរបាលការពារព្រំដែនគោក បានធ្វើការហ្វឹកហាត់បាញ់គ្រាប់ពិត រួមមានអាវុធធុនAK47ដែលបាញ់ចម្ងាយប្រវែង១២០ម៉ែត្រ និងការបាញ់កាយវិការឈរ និងបាញ់លត់ជង្គង់, បាញ់ក្រាប និងបាញ់អាវុធធុនB40 បាញ់ចម្ងាយប្រវែង៥០ម៉ែត្រ។
លោកបានបញ្ជាក់ថា ការហ្វឹកហាត់ដល់កម្លាំងនគរបាលបាញ់គ្រាប់ពិតនេះគឺពង្រឹងសមត្ថភាពដល់កងកម្លាំងត្រូវខិតខំ និងយកចិត្តទុកដាក់ ដើម្បីការពារបូរណភាពទឹកដី, ការពារព្រះមហាក្សត្រ, ការពាររាជរដ្ឋាភិបាលស្របច្បាប់ និងការពារសន្តិសុខសណ្តាប់ជូនប្រជាពលរដ្ឋអោយមានសុខសន្តិភាព ស្របពេលដែលប្រទេសកម្ពុជាក្រោមការដឹកនាំដ៏ឈ្លាសវៃពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកឧត្តមសេនីយ៍ទោ អាត់ ខែម បានបញ្ជាក់ថា ក្រោយពេលដែលកម្លាំងនគរបាលបានហ្វឹកហាត់បាញ់គ្រាប់ពិត ក៏មានការវាយតម្លៃពីគ្រូបង្វឹកឃើញថាទទួលបានលទ្ធផលល្អប្រសើរ ហើយសូមកោតសសើរចំពោះកងកម្លាំងនគរបាលត្រូវតែខិតខំប្រឹងប្រែងអោយអស់ពីកម្លាំងកាយចិត្តដើម្បីការពាររាជរដ្ឋាភិបាលស្របច្បាប់អោយមានសន្តិភាពពេញលេញ, មានការអភិវឌ្ឍន៍ និងមានការរីកចម្រើនគ្រប់វិស័យនៅកម្ពុជាក្រោមការដឹកនាំដោយសម្តេចតេជោ ហ៊ុន សែន៕( កែសម្រួលដោយ ៖ ធីតា)
ចែករំលែកព័តមាននេះ