រាជធានីភ្នំពេញ ៖ ឆ្នាំ២០១៩នេះ នៅទូទាំងរាជធានីភ្នំពេញមានសិស្សពូកែទាំងពីរភេទសរុបជាង៣ពាន់នាក់ ដែលជាប់ចំណាត់ថ្នាក់លេខ១ ដល់លេខ៣ ពីថ្នាក់ទី៩ ដល់ថ្នាក់ទី១២ ត្រូវបានអាជ្ញាធររាជធានីលើកទឹកចិត្ត និងផ្តល់រង្វាន់ជូន ខណៈដែលវិស័យអប់រំធ្វើកំណែទម្រង់ចម្រាញ់យកគុណភាព ។
ក្នុងពិធីបើកបវេសនកាល និងចែករង្វាន់ដល់សិស្សពូកែរាជធានីភ្នំពេញសម្រាប់ឆ្នាំសិក្សា២០១៩-២០២០ នៅវិទ្យាល័យជាស៊ីមសន្ធម៉ុក នាពីព្រឹកថ្ងៃទី០១ ខែវិច្ឆិកា លោក ឃួង ស្រេង អភិបាលរាជធានីភ្នំពេញបានលើកឡើងថា ការផ្តល់រង្វាន់ដល់សិស្សពូកែនេះ គឺជាការលើកទឹកចិត្តឲ្យសិស្សានុសិស្សកាន់តែខិតខំរៀនសូត្រកាន់តែពូកែ ដែលក្លាយជាធនធានដ៏សំខាន់សម្រាប់កិច្ចអភិវឌ្ឍន៍ជាតិ ។
លោកបញ្ជាក់ថា រាជរដ្ឋាភិបាលបានធ្វើកំណែទម្រគុណភាព ដើម្បីសម្រិតសម្រាំងរកធនធានមនុស្សពិត ចំណេះវិជ្ជាពិត និងការងារពិត ដើម្បីអាចឆ្លើយតបបានទៅជាមួយ និងតម្រូវការអភិវឌ្ឍនៃសង្គម ដូច្នេះសិស្សានុសិស្សត្រូវតែបន្តការយកចិត្តទុកដាក់រៀនសូត្រឲ្យបានជាប់ជាប្រចាំ ។
លោកហែម ស៊ីណារ៉េ ប្រធានមន្ទីរអប់រំយុវជន និងកីឡារាជធានីភ្នំពេញបានបញ្ជាក់ថា ឆ្នាំសិក្សា២០១៨-២០១៩កន្លងទៅនេះ រាជធានីភ្នំពេញមានសិស្សពូកែជាប់ចំណាត់ថ្នាក់លេខ១ ដល់លេខ៣ ពីថ្នាក់៩ ដល់ថ្នាក់ទី១២ តាមគ្រឹះស្ថានមធ្យមសិក្សាសាធារណៈមានចំនួន៣.៦០៩នាក់ សិស្សស្រី២.៤១១នាក់ ។ លោកបានបញ្ជាក់ថា លទ្ធផលដែលសិស្សទទួលបាននាពេលនេះ គឺសិស្សានុសិស្សខ្លួនឯងផ្ទាល់បានព្យាយាមរៀនសូត្រ ក្នុងនាមជាកូនល្អ សិស្សល្អហើយលោកគ្រូ អ្នកគ្រូបានយកចិត្តទុកដាក់ខ្ពស់ក្នុងការបង្រៀន ។
លោកបានបញ្ជាក់ថា ការប្រកួតប្រជែងសម្រាប់សិស្សពូកែជារៀងរាល់ឆ្នាំនេះ គឺបានធ្វើឡើងស្របតាមអនុសាសន៍របស់ប្រមុខរាជរដ្ឋាភិបាល ព្រមទាំងបើកឲ្យមានការប្រកួតប្រជែងរហូតចេញទៅប្រឡងនៅថ្នាក់តំបន់ និងនៅលើពិភពលោកទៀតផង ។ លោកបានបន្ថែមថា ផ្តើមចេញពីការលើកឡើងនូវអនុសាសន៍បែបនេះ ពិតជាមានប្រសិទ្ធិភាព ដើម្បីឲ្យសិស្សខិតខំរៀនសូត្រយកស្នាដៃព្រោះថា នេះជាកម្លាំងចលករលើកទឹកចិត្ត ដើម្បីបំផុសស្មារតីដល់គណនាយកសាលា លោកគ្រូ អ្នកគ្រូ បុគ្គលិកអប់រំទាំងក្នុង និងក្រៅប្រព័ន្ធក៏ដូចជា មាតា បិតាអណាព្យាបាលបានយល់ដឹងរួមគ្នាយកចិត្តទុកដាក់ ៕ កែសម្រួលដោយ ៖ សុឃាក់
ចែករំលែកព័តមាននេះ