ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍មួយបានកើតឡើង ខណៈរថយន្តហ៊ីយ៉ាន់ដាយមួយគ្រឿងដោយមានសណ្តោងកន្ទុយរ៉ឺម៉ក ហើយមានដឹកស៊ីទែនទឹកពីលើ បានបាក់ជន្ទាលខាងមុខធ្វើឱ្យស៊ីទែននោះរុញមកមុខបុកនឹងក្បាលរថយន្ត បណ្តាលឱ្យមនុស្ស៣នាក់រងរបួសធ្ងន់-ស្រាល ក្នុងមានម្នាក់កៀបជាប់ក្នុងរថយន្ត ចំណែកបើកបររត់គេចខ្លួនបាត់ ហេតុការណ៍បង្កឱ្យមានការភ្ញាក់ផ្អើលកាលពីម៉ោង១១និង២០នាទីយប់ ថ្ងៃទី៣១ ខែតុលា ឆ្នាំ២០១៩ លើផ្លូវជាតិលេខ4 គីឡូម៉ែត្រលេខ 55-56 ស្ថិតក្នុងភូមិឡ ឃុំកាហែង ស្រុកសំរោងទង ខេត្តកំពង់ស្ពឺ។
សេចក្តីរាយការណ៍បន្តថា ជនរងគ្រោះខាងលើ ១-ឈ្មោះ សុខ យំ ភេទស្រី អាយុ46ឆ្នាំ ( របួសស្រាល) ២-ឈ្មោះ រ៉េត យុត្រា ភេទប្រុស អាយុ25ឆ្នាំ ( របួសស្រាល ) ៣-ឈ្មោះ ហឿន នីតា ភេទស្រី អយុ09ឆ្នាំ ( របួសធ្ងន់ ) អ្នកទាំង៣នាក់ រស់នៅភូមិត្បែង ឃុំតាកូវ ស្រុកកំពង់ត្របែក ខេត្តព្រៃវែង។
ចំណែកអ្នកបើកឈ្មោះ សុខ ធៀន ភេទប្រុស អាយុ42ឆ្នាំ ( រត់គេចខ្លួនបាត់ )។
ប្រភពពីសមត្ថកិច្ចបានឱ្យដឹងថា មុនពេលកើតហេតុ មានរថយន្ត1គ្រឿងម៉ាកហ៊ីយ៉ាន់ដាយ ពណ៌ការ៉ុត ពាក់ផ្លាកលេខ ភ្នំពេញ 3E-6398 មានសណ្តោងកន្ទុយរ៉ឺម៉ក ដោយមានដឹកស៊ីទែនពីលើ ដែលបានបើកពីពីលិចទៅកើត លុះមកដល់ចំណុចកើតហេតុខាងលើ
ស្រាប់តែរថយន្តខាងលើនេះបានបាក់ជន្ទាសផ្នែកខាងមុខ បណ្តាលឱ្យស៊ីទែនដែលដឹកពីលើរុញមកខាងមុខមុខបុកនឹងក្បាលរថយន្ត បង្កឱ្យរបួសមនុស្សចំនួន03នាក់ ក្នុងនោះស្រី02នាក់ ដែលជិះក្នុងកាប៊ីនរថយន្តរងរបួសធ្ងន់-ស្រាល ដោយមានក្មេងស្រីម្នាក់កៀបជាប់ក្នុងរថយន្តផងដែរ និងរថយន្តរងការខូចខាតស្រាល ។
បើតាមការសាកសួរស្ត្រីរងគ្រោះឈ្មោះ សុខយំ បានរៀបរាប់ថា មុនពេលកើតហេតុ ថៅកែឱ្យដឹកស៊ីទែនទឹក ទៅឱ្យគេម្នាក់នៅខាងលិចកំពង់ស្ពឺ តែមិនស្គាល់ទីតាំងទេ ទាល់តែតៃកុងទើបស្គាល់ លុះពេលធ្វើដំណើរមកដល់ចំណុចកើតហេតុ ស្រាប់តែរថយន្តបាក់ជន្ទាសជួបហេតុការណ៍អាក្រក់បែបនេះតែម្តង។
ប្រភពដដែលបន្តថា ក្រោយពេលកើតហេតុ សមត្ថកិច្ចបានទាក់ទងទៅរថយន្តស្ទូចមកស្ទូចយករថយន្តខាងលើទៅរក្សាទុកនៅអអិការដ្ឋាននគរបាលស្រុក ដើម្បីរង់ចាំស្រាវជ្រាវរកម្ចាស់មកបំពេញបែបបទទទួលយកទៅវិញ។
ចំណែកអ្នករបួសដែលកៀបជាប់ក្នុងរថយន្ត សមត្ថកិច្ចបានយកចេញរួចហើយ រួចបានបញ្ជូនទៅធ្វើការសង្គ្រោះនៅមន្ទីរពេទ្យឯកជន៕ (កែសម្រួលដោយ ៖ បុប្ផា)
ចែករំលែកព័តមាននេះ