ខេត្តកណ្តាល៖ មានករណីនារីម្នាក់ដេកទ្រាំនឹងការឈឺចាប់ចុកពោះរហូតដល់ស្លាប់ ខណៈអាជ្ញាធរ និងក្រុមគ្រូពេទ្យអះអាងថា នារីរងគ្រោះចុកពោះរហូតដល់ស្លាប់គឺអាចបណ្តាលមកពីមានកូនក្រៅស្បូន ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៨និង៤៥នាទីព្រឹកថ្ងៃទី៣១ ខែតុលា ឆ្នាំ២០១៩ នៅចំណុចផ្ទះជនរងគ្រោះ ស្ថិតក្នុងភូមិលេខ១(ក) សង្កាត់ស្វាយរលំ ក្រុងតាខ្មៅ ខេត្តកណ្តាល ។
ជនរងគ្រោះដែលស្លាប់ឈ្មោះ គុណ ស្រីការ ភេទស្រី អាយុ១៩ឆ្នាំ មុខរបរកម្មការិនី រស់ភូមិឃុំកើតហេតុខាងលើ ។
តាមការបំភ្លឺពីក្រុមគ្រួសាររបស់នារីរងគ្រោះបានឲ្យដឹងថា មុនពេលកើតហេតុ កាលពីវេលាម៉ោង៧យប់ថ្ងៃទី២៨ តុលា ឆ្នាំ២០១៩ នារីរងគ្រោះបានទៅជាមួយសង្សារដែលរស់នៅជាមួយគ្នាដូចប្តី ដោយនារីរងគ្រោះប្រាប់អ្នកផ្ទះថា ទៅមន្ទីរពេទ្យ ព្រោះនាងមានផ្ទៃពោះ២ខែហើយ ដោយទៅបាត់មិនឃើញមកវិញនោះទេ ។
តាមប្រភពដដែលបានបន្តថា លុះដល់វេលាម៉ោង៨យប់ថ្ងៃទី៣០ តុលា ឆ្នាំ២០១៩ ក៏ ឃើញនារីរងគ្រោះត្រឡប់មកផ្ទះវិញ ដោយប្រាប់ប្អូនថា នាងចុកពោះណាស់ បន្ទាប់មកប្អូនបានឲ្យប្រេងខ្យល់នាងលាបពោះ ហើយនារីរងគ្រោះក៏បានរាងធូរស្រាល ។ រហូតដល់វេលាម៉ោង៥ព្រឹកថ្ងៃទី៣១ តុលា ២០១៩ នារីរងគ្រោះនិយាយថា ចុកពោះណាស់ រួចក៏បានទៅដេកខាងក្រៅបន្ទប់ជាមួយប្អូន ។
តាមប្រភពដដែលបានបន្តទៀតថា រហូតដល់ម៉ោងវេលាម៉ោង៧ព្រឹកថ្ងៃទី៣១ តុលា ក៏ឃើញនារីរងគ្រោះវារទៅដេកក្នុងបន្ទប់វិញ ប្រហែលមួយសន្ទុះក្រោយមក ក៏នាំគ្នាដាស់នារីរងគ្រោះឲ្យឡើងហូបបាយ ស្រាប់តែនាងស្ងាត់មាត់ឈឹង ទើបនាំគ្នាយកទឹកជូតមុខ និងអង្រួននារីរងគ្រោះឲ្យដឹងខ្លួនដែរ ប៉ុន្តែនាងមិនដឹងខ្លួនឡើយ ទើបនាំគ្នាដឹងថា នារីរងគ្រោះបានស្លាប់បាត់ទៅហើយ ។ បន្ទាប់មកក៏បានរាយការណ៍ជូនសមត្ថកិច្ចឱ្យចុះមកពិនិត្យតែម្តង។
ក្រោយពេលទទួលបានព័ត៌មានខាងលើភ្លាម សមត្ថកិច្ចបានចុះមកដល់កន្លែងកើតហេតុ ដើម្បីពិនិត្យសពនារីរងគ្រោះ ។ តាមការពិនិត្យរបស់សមត្ថកិច្ចជំនាញ និងក្រុមគ្រូពេទ្យកោសល្យវិច័យមន្ទីរពេទ្យបង្អែកជ័យជំនះខេត្តកណ្តាល បានឱ្យដឹងថា នារីរងគ្រោះស្លាប់ដោយសារចុកពោះ អាចបណ្តាលឲ្យមកពីមានកូនក្រៅស្បូន។
បច្ចុប្បន្ន សពនារីរងគ្រោះត្រូវបានសមត្ថកិច្ចប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ