រាជធានីភ្នំពេញ ៖ ការប្រកួតកីឡាអត្តពលកម្មជ្រើសរើសជើងឯកថ្នាក់ជាតិឆ្នាំ២០១៩ ដែលចាប់ផ្ដើមពីថ្ងៃទី២៨ ខែតុលា បានបញ្ចប់ហើយនៅល្ងាចថ្ងៃទី៣០ ខែតុលា ។ ប្រការដែលគួរឲ្យកត់សម្គាល់នោះគឺ ការប្រកួតបានចែកចេញជា២ប្រភេទអាយុ គឺប្រភេទអាយុក្រោម១៨ឆ្នាំ មាន១៤វិញ្ញាសា ក្នុងនោះបុរស៧វិញ្ញាសា និងនារី៧វិញ្ញាសា ។
អាយុ១៨ឆ្នាំឡើងមាន១២វិញ្ញាសា គឺបុរសមាន៦វិញ្ញាសា និងនារី៦វិញ្ញាសាដែរ សរុបទាំងអស់មាន២៦វិញ្ញាសា។ មាន១៤សមាគម ក្លិប រាជធានី ខេត្ត និងសា លាចូលរួមដែលមានកីឡាករកីឡាការិនីចំនួន១៥៥រូប ក្នុងនោះកីឡាការិនី៦៣រូប ។
សមាគមកីឡាក្រសួងការពារជាតិ ដណ្តើមបានមេដាយច្រើនជាងគេគឺមេដាយមាស៦គ្រឿងមេដាយប្រាក់៣គ្រឿង និងមេដាយសំរឹទ្ធិ២គ្រឿង ។ រាជធានីភ្នំពេញឈរនៅលំដាប់ ថ្នាក់លេខ២ បានមេដាយមាស៤គ្រឿង ប្រាក់៥គ្រឿង និងសំរឹទ្ធិ១គ្រឿង ។
ខេត្តចំនួន៣ ទទួលបានមេដាយមាសស្មើគ្នាគឺខេត្តកំពត ព្រៃវែង និងកំពង់ឆ្នាំង គឺបាន មេ ដាយមាស៣គ្រឿងដូចគ្នា ។ ក្នុងចំណោមខេត្តទាំង៣នោះ ខេត្តកំពតឈរនៅលើគេដោយបានមេដាយមាស៣គ្រឿង ប្រាក់៦គ្រឿង និងសំរឹទ្ធិ១គ្រឿង ។ ខេត្តព្រៃវែងនៅលំដាប់បន្ទាប់ គឺមេដាយមាស៣គ្រឿង ប្រាក់៣គ្រឿង និងសំរឹទ្ធិ៥គ្រឿង ។ ខេត្តកំពង់ឆ្នាំង បានមេ ដាយមាស៣គ្រឿង ប្រាក់១គ្រឿង និងសំរឹទិ្ធ ៤គ្រឿង ។
សូមបញ្ជាក់ថា ការប្រកួតនេះធ្វើឡើងដោយក្រសួងអប់រំ យុវជន និងកីឡា ជាអ្នកទ្រទ្រង់ថវិកា រួមជាមួយនឹងការជួយមួយផ្នែករបស់ផ្នែកឯកជន។ លោក អ៊ុក ឌីវ៉ង់ អគ្គនាយករងកីឡានៃក្រសួងអប់រំ យុវជន និងកីឡា បានអញ្ជើញចូលរួមបំពាក់មេដាយក្នុងពិធីបិទការប្រកួតនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ