រាជធានីភ្នំពេញ ៖ កសិករកម្ពុជា នាពេលបច្ចុប្បន្ននេះ បាននិងកំពុងផ្លាស់ប្តូរពីការធ្វើកសិកម្ម សម្រាប់តែបំពេញតម្រូវការរបស់ខ្លួន ឬសម្រាប់តែផ្គត់ផ្គង់ក្នុងស្រុក មកជាការធ្វើកសិកម្មដើម្បីនាំចេញទៅកាន់ទីផ្សារអន្តរជាតិ ដូច្នេះកសិករកម្ពុជា ត្រូវការយល់ដឹងបន្ថែមទៀតពីការធ្វើពិពិធកម្មវិស័យកសិកម្ម…
រាជធានីភ្នំពេញ ៖ កសិករកម្ពុជា នាពេលបច្ចុប្បន្ននេះ បាននិងកំពុងផ្លាស់ប្តូរពីការធ្វើកសិកម្ម សម្រាប់តែបំពេញតម្រូវការរបស់ខ្លួន ឬសម្រាប់តែផ្គត់ផ្គង់ក្នុងស្រុក មកជាការធ្វើកសិកម្មដើម្បីនាំចេញទៅកាន់ទីផ្សារអន្តរជាតិ ដូច្នេះកសិករកម្ពុជា ត្រូវការយល់ដឹងបន្ថែមទៀតពីការធ្វើពិពិធកម្មវិស័យកសិកម្ម ដើម្បីបង្កបង្កើនផលឱ្យបានច្រើនដើម្បីបម្រើឱ្យការនាំចេញរបស់ខ្លួន ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅក្នុងវេទិកាថ្នាក់ជាតិស្តីពីវិធានការចម្រុះ គ្រប់គ្រងដំណាំ និងសុវត្ថិភាពស្បៀងអាហារ កាលពីថ្ងៃតី ២៩ខែតុលា ឆ្នាំ ២០១៩ ថា ការវិវឌ្ឍន៍រីកចម្រើនក្នុងវិស័យកសិកម្ម បានលើកស្ទួយប្រទេសកម្ពុជាឱ្យក្លាយជាប្រទេសមួយក្នុងចំណោមប្រទេសនាំចេញអង្ករធំៗចំនួន ១០ និងជាប្រទេសទី ៥ ដែលកំពុងនាំចេញអង្ករសរីរាង្គទៅកាន់ទីផ្សារអឺរ៉ុប ហើយក្នុងឆ្នាំ ២០១៨កន្លងទៅនេះ កម្ពុជាផលិតស្រូវបានចំនួនជាង ១០,៨លានតោន សល់ស្រូវចំនួនជាង ៥,៨លានតោនសម្រាប់នាំចេញ ។ ឆ្នាំកន្លងទៅនេះដែរ កម្ពុជាបាននាំចេញអង្ករជាផ្លូវការចំនួនជាង ៦៣៥ពាន់តោន និងបាននាំចេញផលិតផលកសិកម្មសរុប ៤,២៣លានតោនផងដែរ ។
លោកបន្តថា ទាំងអស់នេះបញ្ជាក់យ៉ាងច្បាស់ថា ប្រជាកសិករកម្ពុជាកំពុងកែប្រែទម្លាប់ ពីការផលិតសម្រាប់បម្រើសេចក្ដីត្រូវការរបស់ខ្លួន មកជាការផលិតតាមលក្ខណៈប្រពលវប្បកម្ម ឈានដល់ការផលិតសម្រាប់នាំចេញ និងការប្រកួតប្រជែងទីផ្សារនៅអន្តរជាតិព្រោះមានតម្រូវការទីផ្សារខ្ពស់ ។ ដូច្នេះ ការរៀបចំវេទិកាថ្នាក់ជាតិស្តីពី វិធានការចម្រុះគ្រប់គ្រងដំណាំ និងសុវត្ថិភាពស្បៀងអាហារនាពេលនេះ គឺសមស្របនឹងនិន្នាការពិភពលោក ដែលបានងាកទៅរកការប្រើប្រាស់ផលិតផលកសិកម្មមានគុណភាព និងមិនប៉ះពាល់ដល់សុខភាព ដូចជាកសិផលសរីរាង្គ ការអនុវត្តកសិកម្មល្អតាមស្តង់ដារ និងកសិផលក្នុងប្រព័ន្ធធានាសុវត្ថិភាពដើម្បីទទួលបាននូវឧត្តមភាពប្រកួតប្រជែងនៅលើទីផ្សារអន្តរជាតិ ។
លោកបន្ថែមថា ដោយទទួលបានកិច្ចគាំទ្រយ៉ាងល្អប្រសើរពីដៃគូអភិវឌ្ឍន៍ ក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវគោលការណ៍ និងរូបសញ្ញាជាតិនៃការអនុវត្តកសិកម្មល្អកម្ពុជា ជាស្តង់ដារជាតិ ដែលជាវិធាននៃការអនុវត្ត និងអាចបញ្ជាក់បានទាំងគុណភាព និងសុវត្ថិភាពនៃផលិតផលកសិកម្ម ជាពិសេសលើដំណាំបន្លែ និងផ្លែឈើ ។
កន្លងមកមន្ត្រីជាន់ខ្ពស់ក្រសួងកសិកម្មរុក្ខាប្រមាញ់និងនេសាទ បានលើកទឹកចិត្តឱ្យកសិកម្មនៅតាមជនបទចងក្រងជាសហគមន៍ ដើម្បីងាយស្រួលក្នុងការស្វែងរកទីផ្សារ និងងាយស្រួលសម្រាប់ឈ្មួញទិញកសិផលផងដែរ ព្រោះឈ្មួញទៅតែមួយកន្លែងអាចទិញបានគ្រប់ចំនួនដែលចង់បាន ។ តែបើសិនជាកសិករនៅរាយប៉ាយ នោះការប្រមូលទិញ ក៏ពិបាកហើយអាចនឹងមានតម្លៃទាបទៀតផង ។
តាមការព្យាករណ៍របស់ធនាគារអភិវឌ្ឍន៍អាស៊ី បានបង្ហាញផងដែរថា ក្នុងឆ្នាំ ២០១៩ នេះវិស័យកសិកម្មអាចនឹងមានកំណើនត្រឹមតែ ១,១ភាគរយប៉ុណ្ណោះ ។ ការព្យាករណ៍នេះ ដោយសារតែកម្ពុជាបានជួបបញ្ហានូវគ្រោះរាំងស្ងួតអូសបន្លាយជិតកន្លះឆ្នាំ ដែលធ្វើឱ្យកសិផលមានការធ្លាក់ចុះជាពិសេសទៅលើវិស័យជលផល ។
យោងតាមរបាយការណ៍របស់ក្រសួងកសិកម្មរុក្ខាប្រមាញ់និងនេសាទ បានបង្ហាញថា ក្នុងរយៈពេលជិត ១០ខែ ដើមឆ្នាំ ២០១៩នេះ ការនាំចេញកសិផលតាមច្រកចេញចូលតែមួយរបស់កម្ពុជា មានបរិមាណ ប្រមាណជាង ៣លាន ៣សែន ៥ម៉ឺនតោន ។ ហើយក្រៅពីនោះ ក៏មានការនាំចេញមិនឆ្លងតាមច្រកចេញចូលជាង ១លាន ៧សែនតោនផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ