រាជធានីភ្នំពេញ ៖ កម្មការនីរោងចក្រម្នាក់ត្រូវបានក្រុមជនអនាមិកទូរស័ព្ទចូលទៅកាន់លេខទូរស័ព្ទរបស់នាងហើយបានប្រាប់ថា «លោកអ្នកឈ្នះរង្វាន់ធំនូវទឹកប្រាក់ចំនួន២៥.០០០ដុល្លារពីធនាគារ ប៉ុន្តែខាងធនាគារសុំលុយខ្លះដើម្បីទៅរត់ការជូន ទើបឈានដល់ការបើកលុយរង្វាន់ធំនេះជូន»។ បន្ទាប់ពីបានឮបែបនេះ នាងការត្រេកអរខ្លាំងណាស់ ក៏បានវេរលុយតាមវីងទៅកាន់លេខដែលបានខលចូលទូរស័ព្ទរបស់នាងជាបន្តបន្ទាប់រហូតអស់សរុប៣ពាន់ដុល្លារ។
លុះថ្ងៃបន្ទាប់គឺនៅវេលាព្រឹកថ្ងៃទី៣១ ខែតុលា ឆ្នាំ២០១៩ ជនអនាមិកនោះបានទាមទារឲ្យនាងវេរទៅឲ្យចំនួន២ពាន់ដុល្លារទៀត តែនាងគ្មានលុយក៏ខលទៅខ្ចីសាច់ញាតិនៅឯស្រុកកំណើតដោយប្រាប់ពីរឿងឈ្នះរង្វាន់ ហើយត្រូវសាច់ញាតិប្រាប់ថា នាងចាញ់បោកគេហើយ ទើបនាងភ្ញាក់ខ្លួនហើយក៏បានធ្វើដំណើរទៅកាន់ប៉ុស្តិ៍រដ្ឋបាលនគរបាលខណ្ឌពោធិ៍សែនជ័យ ដាក់ពាក្យបណ្តឹងសុំឲ្យនគរបាលជួយអន្តរាគមន៍តែម្តង។
នារីរងគ្រោះឈ្មោះ រ៉ូ សុខលាភ អាយុ១៨ឆ្នាំ ជាកម្មការិនី ស្នាក់នៅផ្ទះជួលក្នុងភូមិអង្គកែវ សង្កាត់ចោមចៅ៣ ខណ្ឌពោធិ៍សែនជ័យ និងមានស្រុកកំណើតនៅក្នុងភូមិ ចុងអំពិល ឃុំចុងអំពិល ស្រុកកញ្ច្រៀច ខេត្តព្រៃវែង។ នាងបានចាញ់បោកជនអនាមិកខាងលើនោះអស់ប្រាក់ចំនួន៣ពាន់ដុល្លារ។
នារីរងគ្រោះបានរៀបរាប់ប្រាប់នគរបាលឱ្យដឹងថា មុនពេលកើតហេតុ កាលពីវេលាព្រឹកថ្ងៃទី៣០ ខែតុលា ឆ្នាំ២០១៩ ខណៈដែលនាងកំពុងកំពុងស្ថិតនៅក្នុងភូមិអង្គកែវ សង្កាត់ចោមចៅ៣ ខណ្ឌពោធិ៍សែនជ័យ ស្រាប់តែមានទូរស័ព្ទ១ខ្សែបានខលចូលលេខទូរស័ព្ទរបស់នាងដោយបានប្រាប់ថា « លោកអ្នកឈ្នះរង្វាន់ធំនូវទឹកប្រាក់ចំនួន២៥.០០០ដុល្លារពីធនាគារ ប៉ុន្តែខាងធនាគារសុំលុយខ្លះដើម្បីទៅរត់ការជូន ទើបឈានដល់បើកលុយរង្វាន់ធំនេះជូន»។
តាមប្រភពដដែលបានបន្តថា ខណៈនោះនាងត្រេកអរខ្លាំងណាស់ហើយបានខ្ចីលុយបងប្រុសនៅឯស្រុកផង បូករួមលុយខ្លួនឯងដែលខំសន្សំយូរមកហើយខ្លះផង សរុបចំនួន៣ពាន់ដុល្លារផ្ញើរតាមវីងផង, ផ្ញើតាមទ្រូម៉ាន់នីផងទៅកាន់លេខទូរស័ព្ទដែលបានខលចូលមកប្រាប់ថានាងឈ្នះរង្វាន់ធំនោះ។
តាមប្រភពដដែលបានបន្តទៀតថា លុះមកដល់ព្រឹកថ្ងៃទី៣១ ខែតុលា ជនអនាមិកខាងលើបានទូរស័ព្ទចូលមកម្ដងទៀត និងបានទាមទារឲ្យផ្ញើរលុយបន្ថែមចំនួន២ពាន់ដុល្លារទៀត ដោយសារតែនាងអស់លុយពីខ្លួនទៅហើយ និងចង់បានលុយរង្វាន់ធំនោះ ទើបនាងទូរស័ព្ទទៅរកខ្ចីលុយបងប្អូននៅឯស្រុកកំណើត ហើយត្រូវបងប្អូនប្រាប់ថា នាងចាញ់បោកគេហើយ ទើបនាងភ្ញាក់ខ្លួន និងបានកាន់វិក្កយប័ត្រវីង និងទ្រូម៉ានីដែលវេរលុយឲ្យជនអនាមិកនោះទៅប្ដឹងនគរបាលប៉ុស្តិ៍ចោមចៅឲ្យជួយតែម្តង។
ពាក់ព័ន្ធនឹងករណីខាងលើនេះ នគរបាលបានដាស់តឿនដល់ប្រជាពលរដ្ឋទាំងអស់ សូមឲ្យមានការប្រុងប្រយ័ត្នពីបញ្ហានេះ ដែលនេះមិនមែនជាលើកទី១ទេគឺកើតឡើងច្រើនលើកមកហើយដែលក្រុមជនខិលខូចបានប្រើល្បិចបោកដដែលៗ និងប្រើលេខទូរស័ព្ទដែលគ្មានអត្តសញ្ញាណប័ណ្ណថែមទៀតផង ដូច្នេះមិនងាយនឹងស្រាវជ្រាវរកឃើញមុខសញ្ញាជនខិលខូចទាំងនោះឡើយ៕ (កែសម្រួលដោយ ៖ ធីតា)
ចែករំលែកព័តមាននេះ