ខេត្តប៉ៃលិន ៖ មានហេតុការណ៍គួរឲ្យភ្ញាក់ផ្អើលមួយបានកើតឡើង ដោយពលរដ្ឋបានឃើញមន្ត្រីអនុរក្សពន្ធនាគារខេត្តជាច្រើននាក់នាំគ្នារត់ឆ្លេឆ្លា និងស្រែកឆោឡោរុករកអ្នកទោសម្នាក់ពេញព្រៃក្នុងចម្ការដំឡូងមីរបស់ពួកគាត់ ។
តាមប្រភពព័ត៌មានថា ពេលពួកគាត់សួរនាំមន្ត្រីទាំងនោះទើបដឹងថា ពួកគេតាមរកចាប់អ្នកទោសម្នាក់ដែលលួចរត់ផ្លោះរបងពន្ធនាគារគេចខ្លួនចូលទៅក្នុងព្រៃ ។ ហេតុការណ៍អ្នកទោសផ្លោះរបងរត់គេចខ្លួននេះ បានកើតឡើងកាលពីវេលាម៉ោងប្រមាណ១និង២០នាទីរសៀលថ្ងៃទី៣០ ខែតុលា ឆ្នាំ២០១៩ នៅពន្ធនាគារខេត្ត ក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ។
បើតាមប្រភពច្បាស់ការណ៍មួយបានបង្ហើបឲ្យដឹងថា មានអ្នកទោសជាមនុស្សប្រុសម្នាក់ អាយុប្រហែលជាង២០ឆ្នាំ បានផ្លោះរបងគុករត់គេចខ្លួន ក្រោយពីអនុរក្សពន្ធនាគារបានបញ្ចេញមកខាងក្រៅបន្ទប់ឃុំឃាំង ។ ប្រភពដដែលបន្តថា មន្ត្រីអនុរក្សពន្ធនាគារនិងប្រធាន មិនហ៊ានប្រាប់ឈ្មោះឱ្យដឹងទេ គ្រាន់តែបង្ហើបទាំងលាក់លៀមហើយរហូតមកដល់វេលាម៉ោងប្រមាណ៨និង៣០នាទីយប់ថ្ងៃដដែលនោះ អ្នកទោសដែលផ្លោះ របងគុករត់គេចខ្លួន នៅមិនទាន់តាមចាប់បាននៅឡើយទេ ។ នេះបើតាមការអះអាងរបស់មន្ត្រីអនុរក្សពន្ធនាគារខេត្ត ។
ពាក់ព័ន្ធទៅនឹងបញ្ហានេះ លោក លីម វាសនា ប្រធានពន្ធនាគារខេត្ត បានប្រាប់តាមទូរស័ព្ទយ៉ាងខ្លីថា ពិត ជាមានអ្នកទោសរត់គេចខ្លួនមែន ហើយខាងពន្ធនាគារកំពុងតាមរកគ្រប់ច្រកល្ហក រួចក៏បិទទូរស័ព្ទទៅ ៕
ចែករំលែកព័តមាននេះ