រាជធានីភ្នំពេញ ៖ មន្ទីរសាធារណការ និងដឹកជញ្ជូនរាជធានីភ្នំពេញ បាននិងកំពុងមមារញឹកក្នុងផែនការតុបតែងកែលម្អ លាប កំបោរតាមគល់ឈើ ខឿនចិញ្ចើមផ្លូវ និងសួនច្បារលាបគំនូសចរាចរណ៍ តុបតែងអំពូលភ្លើងតាមដើមឈើ…
រាជធានីភ្នំពេញ ៖ មន្ទីរសាធារណការ និងដឹកជញ្ជូនរាជធានីភ្នំពេញ បាននិងកំពុងមមារញឹកក្នុងផែនការតុបតែងកែលម្អ លាប កំបោរតាមគល់ឈើ ខឿនចិញ្ចើមផ្លូវ និងសួនច្បារលាបគំនូសចរាចរណ៍ តុបតែងអំពូលភ្លើងតាមដើមឈើ តាមបង្គោលភ្លើង តម្លើងរបាកាត់ទទឹងផ្លូវចំនួន៤ លាងសម្អាត និងពង្រាយបង្គន់អនាម័យជិត៦០០បង្គន់ ដើម្បីត្រៀមចូលរួមអបអរសាទរព្រះរាជពិធីបុណ្យជាតិធំៗ ពិធីបុណ្យឯករាជ្យជាតិ និងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលនឹងប្រព្រឹត្តិទៅបន្តបន្ទាប់គ្នានេះ ។
លោក សាំ ពិសិដ្ឋ នាយកមន្ទីរសាធារណៈការ និងដឹកជញ្ជូន រាជធានីភ្នំពេញ បានអោយដឹងថា អនុវត្តតាមការណែនាំពី លោកឃួង ស្រេង អភិបាលរាជធានីភ្នំពេញ និងដើម្បីចូលរួមអបអរសាទរព្រះរាជពិធីបុណ្យ អុំទូកបណ្តែតប្រទីប និងសំពះព្រះខែនេះ មន្ទីរសាធារណការនិងដឹកជញ្ជូនរាជធានីភ្នំពេញ បាននិងកំពុងរៀបគំនូសចរាចរណ៍លើផ្លូវស៊ីសុវត្ថិ ពីស្ពានមកដល់រង្វង់មូលសម្ដេចជួន ណាត លើផ្លូវសុធារស លើផ្លូវសង្ខាងសួនច្បារសម្តេចហ៊ុន សែន រង្វល់មូលសម្តេចសង្ឃជួន ណាត និងផ្លូវព្រះនរោត្តម លាបគំនូសចរា
ចរណ៍ និងលាបកំបោរជុំវិញវត្តភ្នំ ផ្លូវសុរាម្រឹត ព្រះសីហនុ និងកន្លែងសប្បាយភាពនៅក្នុងខណ្ឌដូនពេញ រួមទាំងស្ពានជ្រោយចង្វារនិងផ្លូវកែវពេជ្រចិន្តាផងដែរ ។
លោកបន្តថា ចំពោះការតុបតែងមានច្រើន ដូចជាការតុបតែងភ្លើង ដោយយើងចាប់ជាព័ន្ធរួម ដូចជាការតុបតែងភ្លើង សួនវិមានឯករាជ្យ តាមផ្លូវព្រះនរោត្តម សួនមាត់ទន្លេ តាមដើមស្លាយក្ស លើនៅរមនីយដ្ឋានវត្តភ្នំ សួនមុខវិមានសន្តិភាព មុខអតីតប៉ុស្តិ៍លេខ៣ និងសួនស្ពានជ្រោយចង្វារ លាបកំបោរតាមគល់ឈើ នៅតាមផ្លូវព្រះនរោត្ដម ផ្លូវព្រះសីហនុ មាត់ទន្លេ ជាមួយនិងការរៀបចំរៀបជាក្រានីតកាត់ស្មៅ ដែលការងារនេះយើងបាននិងកំពុងធ្វើ ហើយការជួសជុលផ្លូវសំបុកមាន់យើងក៏បាននិងកំពុងអនុវត្កនៅក្នុងខណ្ឌដូនពេញ។
លោក សាំ ពិសិដ្ឋ បានអោយដឹងទៀតថា ក្នុងពេលនេះ មន្ទីរកំពុងរៀបចំឈូសឆាយដីនៅក្នុងតំបន់អភិវឌ្ឍន៍ជ្រោយចង្វារ ដើម្បីធ្វើរោងសម្រាប់ស្នាក់នៅអោយកីឡាករអុំទូក និងការ រៀបចំបង្គន់អនាម័យនៅទីនោះ ចំនួន៥៦០បង្គន់ ក្នុងនោះមានបង្គន់ជីកចំនួន៣០០និង បង្គន់ចល័តចំនូន២៦០បង្គន់ ច្រើនជាឆ្នាំកន្លងទៅជិត១០០បង្គន់ ។
លោក ជា សុវណ្ណ ប្រធានការិយាល័យបំភ្លឺសាធារណៈនិងភ្លើងសញ្ញាសារាចរណ៍នៃមន្ទីរ សាធារណការនិងដឹកជញ្ជូនបានឲ្យដឹងថា អាជ្ញាធររាជធានីភ្នំពេញបានបំពាក់អំពូលភ្លើងចម្រុះ ពណ៌ថ្មីៗប្រមាណជាង១ម៉ឺន២ពាន់អំពូល ដើម្បីលម្អនាពេលរាត្រីនៃព្រះរាជពិធីបុណ្យអុំទូក ជួយអោយរាជធានីភ្នំពេញ កាន់តែមានសោភ័ណភាពស្រស់ស្អាតសម្រាប់បង្អួតប្រជាពលរដ្ឋនិងភ្ញៀវទេសចរមកលេងកម្សាន្ត នៅរាជធានីភ្នំពេញ។
លោក បញ្ជាក់ថា ទីតាំងដែលត្រូវបំពាក់អំពូលភ្លើងថ្មីៗចម្រុះពណ៌នេះ មានដូចជា នៅជុំវិញបរិវេណកន្លែងប្រារព្ធពិធីបុណ្យអុំទូកមុខព្រះបរមរាជវាំង នៅមហាវិថីព្រះនរោត្តម មុខទីស្តីការគណៈរដ្ឋមន្ត្រី រហូតដល់មហាវិថីព្រះមុន្នីវង្ស នៅស្ពានជ្រោយចង្វាមិត្តភាពកម្ពុជា-ចិន និងស្ពានជ្រោយចង្វារមិត្តភាពកម្ពុជា ជប៉ុន តំបន់សួនច្បារជ្រោយចង្វារ និងតំបន់សួនច្បារឯករាជ្យ។
ចែករំលែកព័តមាននេះ