ខេត្តកំពង់ចាម ៖ បើតាមសេចក្តីរាយការណ៍បានឱ្យដឹងថា ដោយពិនិត្យឃើញស្ថានភាពស្ពានបេតុងព្រែកគៀនជ្រៃ នៅឃុំគៀនជ្រៃ ស្រុកកំពង់សៀម មានសភាពទ្រុឌទ្រមដោយសារតែគ្រោះទឹកជំនន់នោះ ពេលនេះត្រូវបានអជ្ញាធរសម្រេចផ្អាកមិនឲ្យធ្វើដំណើរឆ្លងកាត់ទៅវិញទៅមកនោះទេ នាព្រឹកថ្ងៃទី31 ខែតុលា…
ខេត្តកំពង់ចាម ៖ បើតាមសេចក្តីរាយការណ៍បានឱ្យដឹងថា ដោយពិនិត្យឃើញស្ថានភាពស្ពានបេតុងព្រែកគៀនជ្រៃ នៅឃុំគៀនជ្រៃ ស្រុកកំពង់សៀម មានសភាពទ្រុឌទ្រមដោយសារតែគ្រោះទឹកជំនន់នោះ ពេលនេះត្រូវបានអជ្ញាធរសម្រេចផ្អាកមិនឲ្យធ្វើដំណើរឆ្លងកាត់ទៅវិញទៅមកនោះទេ នាព្រឹកថ្ងៃទី31 ខែតុលា ឆ្នាំ2019នេះ ព្រោះតែខ្លាចបង្កគ្រោះថ្នាក់ជាយថាហេតុណាមួយដល់អាយុជីវិតមនុស្ស។
បើតាមលោកអ៊ុន ចាន់ដា អភិបាលនៃគណៈអភិបាលខេត្ត បានមានប្រសាសន៍ឲ្យដឹងថាដោយយោងតាមក្រុមបច្ចេកទេសរបស់ក្រសួងអភិវឌ្ឍន៍ជនបទ ដែលចុះមកពិនិត្យស្ពានព្រែកគៀនជ្រៃដោយផ្ទាល់នាម្សិលមិញថ្ងៃទី30 តុលានោះ ឃើញថា តុងផ្នែកខាងលើនៃតួស្ពានត្រូវគម្លាតពីគ្នា6សង់ទីម៉ែត្រ ហើយគ្រឹះសសរស្ពានផ្នែកខាងក្រោម ត្រូវទឹកហូរច្រោះស្ទើរតែដាច់ ។ ដោយឃើញស្ថានភាពបែបនេះ រូបលោក រួមជាមួយប្រធានមន្ទីរពាក់ព័ន្ធក៏ប្រញាប់ចុះមកពិនិត្យដោយផ្ទាល់នាព្រឹកថ្ងៃទី31 តុលា និងបានណែនាំដល់កម្លាំងសមត្ថកិច្ច ព្រមទាំងអាជ្ញាធរមូលដ្ឋានដោយសម្រេចផ្អាកមិនឲ្យធ្វើដំណើរឆ្លងកាត់បន្តទៀតទេ។
លោកអភិបាលខេត្តមានប្រសាសន៍បន្តថា ដើម្បីបញ្ចៀសនូវការកកស្ទះ រូបលោកសូមឱ្យប្រជាពលរដ្ឋដែលធ្វើដំណើរតាមកង់ ម៉ូតូ និងថ្មើរជើង ត្រូវឆ្លងស្ពានឈើនៅក្នុងបរិវេណវត្តកៀនជ្រៃក្នុងវិញ សូមឱ្យមានការយោគយល់ និងអត់ធ្មត់។ ជាមួយនោះ ក្រុមបច្ចេកទេសរបស់ក្រសួងអភិវឌ្ឍន៍ជនបទ នឹងចុះមកសិក្សាដើម្បីរៀបចំសាងសង់ស្ពានបេតុងថ្មីជំនួសវិញ ដែលមានទទឹងទំហំ 10 ម៉ែត្រ ងាយស្រួលដល់ប្រជាពលរដ្ឋធ្វើដំណើរឆ្លងកាត់។
លោកបានទៀតថា គ្រោះធម្មជាតិទឹកទន្លេមេគង្គនៅឆ្នាំ2019នេះ បានឡើងរហ័ស ហើយស្រកក៏រហ័សជាមួយនោះ ស្រុកដែលនៅជាប់ដងទន្លេមេគង្គដែលរងគ្រោះជាងគេ គឺស្រុកកំពង់សៀមនេះឯង។ សម្រាប់មធ្យោបាយរថយន្តតូច-ធំមិនអាចបើកកាត់ស្ពានគៀនជ្រៃនេះបន្តទៀតបានទេ ត្រូវធ្វើដំណើរដោយជិះវាងទៅតាមផ្លូវស្រក ហើយឡើងមកតាមជើងភ្នំហាន់ជ័យ ដើម្បីឆ្ពោះទៅកាន់ស្រុកស្ទឹងត្រង់។
បើតាមអ្នកស្រី អ៊ា ចាន់ថុល មេឃុំគៀនជ្រៃវិញ បានប្រាប់ឲ្យដឹងថា បន្ទាប់ពីស្ដាប់ប្រសាសន៍ណែនាំរបស់លោកអភិបាលខេត្ត ក៏ដូចជាលោកអភិបាលស្រុកកំពង់សៀម និងរៀបចំដោយប្រើដែកស័ង្កសីផ្សារបិទនៅក្បាលស្ពានទាំងសងខាងមិនឱ្យអ្នកដំណើរថ្មើរជើង ម៉ូតូ និងរថយន្តតូច-ធំឆ្លងកាត់បន្តទៀតនោះទេ។
អ្នកស្រីក៏លើកឡើងទៀតថា យោងតាមក្រុមបច្ចេកទេសរបស់ក្រសួងអភិវឌ្ឍន៍ជនបទបានវាយតម្លៃថា ស្ពានបេតុងគៀនជ្រៃនេះ ត្រូវបានទឹកហូរច្រោះគ្រឹះសសរផ្នែកខាងក្រោមជាខ្លាំងមានន័យថា សសរស្ពាន ទ្រតួស្ពានស្ទើរមិនកើតនោះទេ ហើយវាអាចនឹងបាក់ ឬស្រុតនៅពេលណាមួយ ដោយមិនប្រាប់ឲ្យយើងដឹងមុននោះទេ ហេតុដូច្នេះហើយត្រូវតែមានការប្រុងប្រយ័ត្នខ្ពស់ ដើម្បីកុំឲ្យអ្នកភូមិគៀនជ្រៃ និងអ្នកធ្វើដំណើរផ្សេងទៀត គ្រោះថ្នាក់ ដូច្នេះត្រូវតែបិទមិនឲ្យធ្វើដំណើរតាមស្ពាននេះទេ។ (កែសម្រួលដោយ ៖ បុប្ផា)
ចែករំលែកព័តមាននេះ