សំណុំរឿងប៉ូលិសស័ក្តិ៤វាយប្រពន្ធរហូតរលូតកូន មិនទាន់បញ្ជូនទៅតុលាការទេ
- កណ្តាល
ខេត្តកណ្តាល ៖ នៅថ្ងៃទី៣១ ខែតុលា ឆ្នាំ២០១៩ លោក ទិន សុចិត្រា អ្នកនាំពាក្យអយ្យការអមសាលាដំបូងខេត្តកណ្តាល ថ្លែងប្រាប់អោយដឹងថា…
ខេត្តកណ្តាល ៖ នៅថ្ងៃទី៣១ ខែតុលា ឆ្នាំ២០១៩ លោក ទិន សុចិត្រា អ្នកនាំពាក្យអយ្យការអមសាលាដំបូងខេត្តកណ្តាល ថ្លែងប្រាប់អោយដឹងថា សំណុំរឿងលោកស័ក្តិ៣ ជិន ជឿន ប៉ូលិសផ្នែកបុគ្គលិកនៃស្នងការដ្ឋាននគរបាលខេត្តកណ្តាល ដែលជាប់ពាក់ព័ន្ធករណីវាយប្រពន្ធមិនទាន់រៀបការរហូតរលូតកូនអាយុ៤ខែ មិនទាន់ឃើញបញ្ជូនមកកាន់តុលាការនៅឡើយទេ តែលោក ទិន សុចិត្រា ក៏បានអះអាងថា សមត្ថកិច្ចកំពុងចាត់ការសំណុំរឿងនេះហើយ ។
បន្ទាប់ពីទទួលពាក្យបណ្តឹងរបស់ស្ត្រីរងគ្រោះរួចរាល់ហើយ រហូតមកទល់ពេលនេះ លោកស័ក្តិ៣ ជិន ជឿនប៉ូលិសផ្នែកបុគ្គលិកនៃស្នងការដ្ឋាននគរបាលខេត្តកណ្តាល កំពុងបន្តរស់នៅក្រៅសំណាញ់ច្បាប់ ។ ចំណែកមហាជនកំពុងរង់ចាំមើលចំណាត់ការរបស់សមត្ថកិច្ចខេត្តកណ្តាល តើអាចចាត់ការតាមផ្លូវច្បាប់ ដោយឈរលើភាពយុត្តិធម៌ចំពោះករណីមន្ត្រីប៉ូលិសម្នាក់នេះដែលប្រព្រឹត្តខុសដែរឬទេ?
ទោះបីយ៉ាងណា ក៏ពុំទាន់សុំការបញ្ជាក់ពីលោកវរសេនីយ៍ឯករស់ សាវិន នាយការិយាល័យប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តកណ្តាល បាននៅឡើយទេ ដោយសារទូរស័ព្ទចូលគ្មានអ្នកទទួល ។
ពាក់ព័ន្ធនឹងករណីខាងលើនេះដែរ កន្លងមកលោកប៉ូលិសស័ក្តិ៣ ជិន ជឿន ធ្លាប់ចេញវីដេអូឃ្លីបបដិសេធថា មិនបានវាយស្ត្រីរងគ្រោះរហូតរលូតកូននោះទេ ពោលគឺ ស្ត្រីរងគ្រោះដួលដោយខ្លួនឯង ។
សូមបញ្ជាក់ថា រឿងរ៉ាវរបស់លោក ជិន ជឿន ជាមន្ត្រីបម្រើការងារនៅស្នងការនគរបាលខេត្តកណ្តាល ផ្នែកបុគ្គលិក កំពុងធ្វើឱ្យមហាជនមានការចាប់អារម្មណ៍ ព្រោះតែការប្រើអំពើហិង្សាលើប្រពន្ធមិនទាន់រៀបការរហូតរលូតកូនអាយុ៤ខែ ដែលនាំអោយមហាជនខឹងសម្បារជំនួសយ៉ាងខ្លាំង ។ រឿងរ៉ាវបានទម្លាយបន្ថែមទៀតគឺ លោក ជិន ជឿន ធ្លាប់ប្រើហិង្សាលើប្រពន្ធជាច្រើនលើកច្រើនសាររហូតមានបណ្តឹងចូលស្នងការនគរបាលខេត្តកណ្តាលថែមទៀតផង ។
យោងតាមពាក្យបណ្តឹងកាលពីថ្ងៃទី២៩ ខែឧសភា ឆ្នាំ២០១៩ កន្លងទៅ គឺស្ត្រីរងគ្រោះឈ្មោះ ស៊ាង ស្រីល័ក្ខ អាយុ២៧ឆ្នាំ ធ្លាប់បានប្តឹងលោក ជិន ជឿន ពីបទប្រើអំពើហិង្សាផងដែរ ។ ដោយឡែក ថ្មីៗនេះនារីរងគ្រោះបានដាក់ពាក្យបណ្តឹងថ្មីមួយទៀតទៅកាន់លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល ដើម្បីសុំអោយជួយរកយុត្តិធម៌លើករណីប្តីមិនទាន់រៀបការជាប៉ូលិសនៃស្នងការដ្ឋាននគរបាលខេត្តកណ្តាលពីបទមនុស្សឃាតដោយចេតនា និងហិង្សាមានស្ថានទម្ងន់ទោស ។
យោងតាមពាក្យបណ្តឹងរបស់ឈ្មោះ ស៊ាង ស្រីល័ក្ខ ភេទស្រី អាយុ២៧ឆ្នាំ មានទីលនៅបច្ចុប្បន្នភូមិសុកុំផ្ញើឃុំគងជ័យ ស្រុកអូរាំងឪ ខេត្តត្បូងឃ្មុំ បានប្តឹងឈ្មោះ ជិន ជឿន ភេទប្រុស ជាមន្ត្រីបម្រើការងារនៅស្នងការនគរបាលខេត្តកណ្តាល ផ្នែកបុគ្គលិក មានទីលំនៅភូមិកោះគរ ឃុំរកាខ្ពស់ ស្រុកស្អាង ខេត្តកណ្តាល ពីបទប៉ុនប៉ងមនុស្សឃាតដោយចេតនានិងហិង្សាមានស្ថានទម្ងន់ ។
តាមប្រភពពីនារីរងគ្រោះរៀបរាប់ឱ្យដឹងថា កាលពីវេលាម៉ោង១០និង៣០នាទីយប់ថ្ងៃទី១៤ ខែតុលា ឆ្នាំ២០១៩ ឈ្មោះ ជិន ជឿន ដែលជាប្ដីរស់នៅដំបូលផ្ទះតែមួយ ដោយមិនទាន់រៀបការ បានប៉ុនប៉ងធ្វើឃាត និងប្រើអំពើហិង្សាមកលើនាង បណ្តាលឲ្យរលូតកូននៅក្នុងផ្ទៃដែលមានអាយុ៤ខែ។ ពាក់ព័ន្ធនឹងករណីនេះ នារីរងគ្រោះស្នើសុំលោកស្នងការនគរបាលខេត្តកណ្តាលមេត្តាជួយរកយុត្តិធម៌ និងចាត់វិធានការតាមផ្លូវច្បាប់ផងដែរ ៕ (កែ(កែសម្រួលដោយ ៖ ធីតា)
ចែករំលែកព័តមាននេះ