រាជធានីភ្នំពេញ ៖ សេចក្តីរាយការណ៍បឋមបានឲ្យដឹងមេប៉ោងដុះស្លែដែលមានរហស្សនាម «អាខ្លា» ត្រូវបានកម្លាំងនគរបាលខណ្ឌឬស្សីកែវចាប់វាយខ្នោះ ហើយរួមជាមួយស្ត្រីជាអ្នកចាក់ម្នាក់នៅក្នុងការបង្ក្រាបល្បែងស៊ីសង ។ ការបង្ក្រាបវង់អាប៉ោងនេះធ្វើឡើង កាលពីវេលាម៉ោងប្រមាណ១០និង៣០នាទីព្រឹក ថ្ងៃទី៣១ ខែតុលានេះ នៅចំណុចអតីតផ្លូវរថភ្លើង ក្នុងភូមិទួលសង្កែ១ ខណ្ឌឬស្សីកែវ ។
មេប៉ោងល្បីឈ្មោះដែលត្រូវឃាត់ឈ្មោះ ជា សំ អាយុ៥៩ឆ្នាំ ដែលមានរហស្សនាមអាខ្លានិងឈ្មោះ ស៊ឹម សារ៉េត ភេទស្រី អាយុ៥៦ឆ្នាំ មុខរបរជាគ្រូទាយជាអ្នកចាក់ ។ អ្នកទាំង២នាក់ មានលំនៅភូមិខាងលើ ។
តាមព័ត៌មានបានឲ្យដឹងថា ការបង្ក្រាបវង់អាប៉ោងដឹកនាំដោយលោកវរៈសេនីយ៍ទោ លឹម សេរីសោភ័ណ្ឌ អធិការរងខណ្ឌឬស្សីកែវ បន្ទាប់ពីមានបញ្ជាពីលោកវរៈសេនីយ៍ឯក ហ៊ាង ថា រ៉េត អធិការខណ្ឌឬស្សីកែវ ។
ប្រភពព័ត៌មានឲ្យដឹងថា នៅមុនពេលកើតហេតុគេឃើញមេអាប៉ោងដែលមានរហស្សនាម អាខ្លា បានបាញ់អាប៉ោងដោយមានអ្នកញៀនល្បែងបាននាំគ្នាចាក់យ៉ាងពពាក់ពពួន ។ ខណៈនោះសមត្ថកិច្ចក៏បាននាំគ្នាស្ទុះចូលទៅបង្ក្រាប និងដេញចាប់ប្រផាត់ព្រភីងធ្វើឲ្យក្រុមអ្នកញៀនល្បែងរត់ប្រសាច ។
តាមព័ត៌មានឲ្យដឹងទៀតថា នៅការបង្ក្រាបល្បែង សមត្ថកិច្ចជាច្រើននាក់បាននាំគ្នាដេញតម្រង់ចាប់មេដែលល្បីឈ្មោះបាននឹងចាប់វាយខ្នោះ ព្រមទាំងឃាត់ខ្លួនបានស្ត្រីជាអ្នកលេងម្នាក់ទៀត ។
តាមនគរបាលឲ្យដឹងថា មេជាអ្នកបាញ់អាប៉ោងម្នាក់រួមទាំងអ្នកចាក់ត្រូវបានឃាត់ខ្លួន ព្រមទាំងដកហូតបានចាន់អាប៉ោង និងកំរាលផងដែរ ។
គួរបញ្ជាក់ថា ទីតាំងបាញ់អាប៉ោងដុះស្លែយូរមកហើយ ពុំដែលបង្ក្រាបនោះទេ មានមេល្បីឈ្មោះរហស្សនាម «អាខ្លា» ដោយសារតែសមត្ថកិច្ចមួយចំនួនដែលទទួលជំនាញក៏បានលាភសើមមាត់សើមកដែរ ។ នៅក្នុងការបង្ក្រាបនេះដែលអធិការខណ្ឌមិនបានប្រើអធិការរងទទួលផែនព្រហ្មទណ្ឌនោះទេ ទើបចាប់បានមេរហស្សនាម «អាខ្លា»នេះ ៕ កែសម្រួលដោយ ៖ សុឃាក់
ចែករំលែកព័តមាននេះ